Еткен еңбек, төккен тер елеусіз қалмайды

968 Views

«Ортақ Отан — Қазақстан»

«Мұғалім өзінің білімін үздіксіз көтеріп отырғанда ғана мұғалім, оқуды, ізденуді тоқтатысымен оның мұғалімдігі жойылады» деген К.Д.Ушинскийдің ұлағаты үнемі ізденіс үстінде жүретін, бар білгенін өзгелермен бөлісе білетін Роза Мамбетияроваға қарата айтылғандай. Біз бүгін білім берудегі тың әдіс-тәсілдерімен талайды тамсандырған озат әрі тәжірибелі педагог жайында кеңінен сыр шертетін боламыз.

Роза Арыстанбайқызы — Тұрар Рысқұлов атындағы мектеп-лицейінің қазақ тілі мен әдебиеті пәнінің мұғалі­мі. Ол білім саласына республикалық жә­­не облыстық деңгейде өз үлесін қосып келеді. Педагог-шебер санатын­дағы білімді де білікті ұстаз мұғалім­дік қызметін алғаш бастаған сәттен-ақ көпке үлгілі, өз ортасына сыйлы, ата-аналар мен оқушылар арасында беделді болды. Шәкірттерінің жүрегіне ізгі­лік дәнін сепкен дарынды ұстаздың оқыту үрдісі тікелей оқушы мен мұға­лім арасындағы ынтымақтастыққа негізделді. Сабағында жаңа инно­ва­циялық технологияларды пайдалану арқылы оқушыларын сыни ойлауға, шығармашылыққа, бәсекеге қабілет­ті болуға тәрбиелейді. Әр сабағы ұлт­тық құндылықтарға толы десек артық айтқандығымыз емес. Сонымен қатар, өнердің қолдаушысы, ана тілінің жа­нашыры ретінде ұжымда да, қоғамда да белсенділік танытып келе жатқан жаңашыл ұстаз.
Ұлағатты ұстаздың білім, тәр­бие саласындағы жетістіктері мен ең­бегі ұшан теңіз. Атап айтар болсақ, ол Қазақстан Республикасы педагог кадрларының біліктілігін арттыру­дың деңгейлі бағдарламалары аясын­да І (ілгері) деңгей бағдарламасын игерген көшбасшы мұғалім. Одан бөлек, Қазақстан Республикасы Білім және ғылым министрлігі тарапынан ұйымдастырылған «Оқулықтар, оқу-әдіс­темелік кешендер мен оқу-әдіс­темелік құралдарға сараптама жасау және сынақтан өткізу нәтижелерін қарастыру» жөніндегі пәндік комис­сияның» мүшесі. «Ұлттық тестілеу ор­талығының» ҰБТ пәндері бойынша тест тапсырмаларының сарапшысы жә­не аты аталған орталықтың жоғары оқу орындарына түсу емтихандарына ар­наған тест тапсырмаларын әзір­леу­ші. Сонымен қатар, ҰБТ-ны өткізу кезін­де апелляцияларды қарау үшін құры­ла­тын республикалық апелляциялық ко­миссия мен облыстық білім басқар­масы тарапынан құрылған ең үздік шығармашыл ұстаздар тобының бел­ді мүшесі болып табылады. Бұлар­дың барлығы Роза Арыстанбайқызының білім беру саласында жоғары деңгей­де атқарып жүрген шығармашылық еңбектері және республикамыздың бі­лім саласына қосқан қомақты үлестері деуге болады.
Еліміздің өркендеуіне елеулі үлес қосып келе жатқан ұстаздың жазған еңбектері де өте көп. Солардың бірі — «Рухани жаңғыру жағдайында зама­науи білім берудің инновациялық тәсіл­дері» атты еңбегі. Аталмыш жұмысы Нұр-Сұлтан қаласында өткен «Білім беру­дегі инновациялар: ізденіс және шешім­дер» атты V халық­аралық ғылыми-практикалық конфе­ренциясында ұстаздарға ұсынылған болатын. Сонымен қатар, Ақтөбе қа­ласында өткен «Ақтөбе облысы үздік педагогтерінің іс-тәжірибе жұмыста­рын тарату» атты республикалық се­минарға, Тараз қаласында өткен «Мәңгілік Ел идеясы және білім беру­дегі модернизация», «Ұлы Дала Елі құндылықтары және білім беру ин­дустриясындағы интеграция» атты рес­пуб­ликалық ғылыми-практикалық конфе­­ренцияларға қатысқан. Шараға ұсын­ған баяндамасы мен мақаласы жинаққа енгізілген. Сондай-ақ, Роза Арыстанбайқызы облыстық және рес­публикалық деңгейде бірнеше ашық және шеберлік сынып сабақтарын өткізген мұғалім. Дәлірек айтар бол­сақ, «Ежелгі дәуір әдебиеті» тақыры­бын­да республикалық онлайн сабақ, республикалық семинарда «Мезгіл бағыныңқылы сабақтастың жасалу жол­дары» тақырыбында ашық сабақ, облыстық үздік педагог байқауында «Ақан серінің әні «Балқадиша» тақы­рыбында ашық сабақ, «Оқу сауат­тылығының негізі – мәтінмен жұ­мыс» тақырыбында республикалық шебер­лік сынып сабағы, облыстық онлайн-семинарда «Мәтіннің түрлері» тақырыбында шеберлік сынып сабақ­тарын көпке үлгі етуге болады. Ұстаз­дың шығармашылық еңбегінің бір па­расы ғылым саласымен де ұштаса­ды. Бұл орайда оның жүлделі орынға ие болған және аудан, облыс көлемін­де таратылған авторлық бағдарламала­рын мысал ретінде келтіруге болады. Мысалы, «Жай сөйлем синтаксисі», «Сөз тіркесі синтаксисі», «Құрмалас сөйлем синтаксисі», «Ежелгі дәуір әдебиеті», «Ежелгі дәуірдегі бала­лар әдебиеті», «Түркі халықтарының әдебиеті», «Эссе жазудың теориясы мен әдістемесі» атты авторлық бағ­дарламаларын және педагогика са­ласына арналған әдістемелік ең­бек­терін көмекші құрал ретінде аудан, облыс көлеміндегі көптеген мұға­лім­дер пайдалануда. Сондай-ақ, аудан­дық, облыстық, республикалық басы­лымдарда өлеңдері, мақалалары, баян­дамалары мен педагогикалық ең­бектері үздіксіз жарияланып келеді.
Өз бақытын білім саласынан тап­қан ұстаз, қаланың емес ауыл балаларын оқытуды, оларға сапалы білім беруді таңдапты. Кейкеріміздің ойынша да­рынды балалардың басым көпшілігі ауылдан шығады деп есептейді. Тек есептеп қана қоймай, сол ойын іске асыра білген мұғалім талай дарынды балалардың бағын ашқан. Олардың қатарында медиа саласында еңбек етіп келе жатқан біздің әріптестеріміз Айжан Қасымова мен Әлішер Өмірзақ бар.
Кездесу барысында кейіпкеріміз­ге «Оқушыларын осындай жетістік­тер­ге жеткізудің сыры неде?» деп сауал жолдадық. Біздің тараптан қойылған сауалға ұлағатты ұстаз былай деп нақ­­­ты жауап қайтарды. «Дарынды оқу­шыларды дайындауда мұғалім «Ерінбей еңбек етсең, алынбайтын асу жоқ» деген ұстанымға сүйенуі қажет. Ұстаз бұл ұстанымын оқушыларынан да талап еткені дұрыс. Сонда ғана ай­тарлықтай нәтижеге жетуге бола­ды. Мәселен, мен дарынды балаларды жеке дайындаймын. Шындығын айту керек, кейде оқушы саны мыңнан асып жығылатын үлкен мектепте дарынды балаларды дайындау мүмкіндігі бол­май жатады. Бірақ, ол мен үшін сыл­тау емес. Оның да жолын табуға бола­ды. Қажет болса, оқушыны үйіне алып кетіп дайындаймын. Осылайша оқушыға көбірек көңіл бөлуге ты­ры­самын. «Ұстаз талантты болса, шә­кірті талапты болады» дейді халық даналығы. Сол айтқандай, шәкірт тәрбиелеуде жетістіктерге жетудің сы­ры, ең әуелі, ұстаздың талантты бо­лу­ында, екіншіден, білім мен еңбек­ті тә­жі­рибеде ұштастыра білуінде жа­тыр» деп жауап берді.
Еткен еңбек, төккен тер ешқашан елеусіз қалмайтыны белгілі. Роза Арыстанбайқызының білім саласына қос­қан елеулі үлестері аудан, облыс, республика тарапынан жоғары баға­ланып, төмендегідей марапаттаулар берілген. Атап айтар болсақ, Респуб­ли­ка­лық, облыстық «Үздік педагог — 2013» байқауының жеңімпазы ата­нып, Қазақстан Республикасы «Білім беру ұйымының үздік педагогі» төс­белгісімен марапатталған. Сонымен қатар, Қазақстан Республикасы Білім және ғылым министрлігі тара­пынан «Қазақстан Республикасы Білім беру саласының Құрметті қыз­меткері» төсбелгісі кейіпкеріміздің кеу­­десінен орын тапқан. Сондай-ақ, Роза Арыстанбайқызы білім беру са­ласындағы жемісті еңбегі үшін сан түр­лі мекемелердің Алғыс хаттары­­мен ма­рапатталған.
Ұстаз дейтін ұлы қызметті мінсіз атқарып, еліміздің білім беру саласы­на елеулі үлес қосып жүрген қандас бауырымыз Роза Мәмбетиярованың еңбек жолы жайлы сыр шерткенде, батыр атамыз Бауыржан Момышұлы­ның «Ұстаз – ұлық емес, ұлы қызмет» деген сөзі еріксіз ойға оралды. Шыны­менде, кездесу барысында ұлы қыз­меттің ауыр жүгін ар­қалаған ұстаздың оқушы жүрегінен орын алғанына көзіміз әбден жетті.

Жәнібек БАЗЫЛБЕКОВ.

Поделиться ссылкой: