Үдергеновке үміт артты

482 Views

Өткен аптада Жамбыл облыстық полиция департаменті бастығының бірінші орынбасары Бауыржан Үдер­генов ауданымызда болып, «Нұр Отан» партиясы Тұрар Рысқұлов аудандық филиалында қоғамдық қабылдау өт­кізді. Тұрғындардың тілегіне Бауыржан Арынұлымен бірге аудандық полиция бөлімінің басшысы Қайрат Қапаров пен партия аудандық филиалы төраға­сының бірінші орынбасары Қанатбек Арыстанбеков те құлақ түрді. Каменка ауылының тұрғыны Гаухар Мұсабекова 2016-2017 жылдары танысына банктен екі жүз мың теңгеден екі мәрте несие алып берген екен. Танысы төлемей кеткен. Сот арқылы өндірмек болғанына қарамастан танысы соттың шешімін орындамай қашып жүрсе керек. Енді соны өндіріп беруді сұрап, Үдергеновке үміт артты. Абай ауылының тұрғыны Біржан Сейтовтың жағдайы да Гаухар­дың оқиғасына ұқсас. Оның айтуынша оған белгісіз бір адам Нұрсұлтаннан хабарласып тұрғанын айтып, «Әлеу­мет­тік көмек алуға өтініш берген екенсіз, алайда банкте қарызыңыз бар көрінеді. Соны тездетіп жапсаңыз біз сізге жеті жүз жиырма мың теңге аударамыз» деп сендірген. Қарызданып жүріп несиесін жапқанмен әлеуметтік көмек әлі түспепті. Осының ақ-қарасын анықтап беруін өтініп келіпті.
Қоғамдық қабылдауға келгендердің өзгесі қоғамдық тәртіпті ретке келтіру мәселесін көтеріп, ұсыныс-тілектерін жеткізді. Мәселен, Құлан ауылының тұрғыны Марат Чулекеев Панфилов көшесіне бейнебақылау орнату, ондағы көпқабатты үйлердің айналасында бола­тын тәртіпсіздіктер жөнінде сөз қозғаса, Сапаралы Қоңыратбаев қо­ғамдағы құқық бұзушылықты азай­ту үшін учаскелік полиция инс­пек­торларының санын арттыру керек деп есептейді. Сол секілді Абай ауыл­дық ардагерлер кеңесінің төрағасы Рысқұлбек Секербеков учаскелік поли­ция инспекторларын қызметтік көлікпен қамтамасыз ету керектігін сөз етті.
Қабылдауға жазылған әр тұрғынның тілегін мұқият тыңдаған Бауыржан Үдергенов көтерілген мәселелердің шешілу жолдарын көрсетіп, аудандық полиция бөлімінің бастығы Қайрат Қапаров пен оның бірінші орынбасары Қайсар Сүлейменге нақты тапсырмалар берді.
Р.S. Қоғамдық қабылдауда учас­келік полиция инспекторлары үшін жағымды жаңалықты естідік. Бауыр­жан Арынұлының айтуынша ке­лер жылдың көктемінде аудандағы бар­лық учаскелік полиция инс­пек­­торлары су жаңа қызметтік көлік­термен қамтамасыз етіледі екен.

Мереке Ержанұлы.

Поделиться ссылкой: