Жерлесіміз жүлдемен оралды

492 Views

Облыстық «Aq jol» газетінің бөлім редакторы, ақын Табиғат Абаилдаевтың еңбек жолын аудандық «Qulan tany» газетінен бастаға­нын оқырман қауым жақсы біледі. Әріптесіміз жуырда ғана Қарағанды қаласында өткен «Дүниеге келер әлі талай Қасым» атты республикалық жыр мүшәйрасынан жүлделі екінші орын алып, жазиралы Жамбыл жұр­тын қуантып еді. Енді міне, жерлесі­міз тағы да жүлдемен оралды. Бұл жолы Атырау қаласында қазақ әдебиетінің алыбы Әбіш Кекілбайұлының 80 жылдық мерейтойына орай өткен жыр бәйгесінен бәйге алды.
«Алаштың айбоз Әбіші» атты республикалық мүшәйраға елімізден 180 ақын қатысып, кіл мықтылардың ішінен 8 ақын жүлдеге ілікті. Қазақстан жазушылар одағы төрағасының орынбасары Мереке Құлкенов бас­таған алты алашқа аты мәлім Серік Ақсұңқарұлы, Светқали Нұржанов, Гүлнар Салықбай сынды қазылар алқа­сы Табиғаттың «Альциона», «Миллениум» атты өлеңдерін жоғары бағалады. Жыр аламанынан екінші орынды енші­леген жерлес ақын 400000 теңге қаржы­лай сыйлыққа ие болды. Біз әріптесімізді жүлдесімен құттықтап, биік шыңдар­дан көріне беруіне тілектестік білдіреміз.
Жерлес ақын Табиғат Абаилдаевтың жыр мүшәйрасынан жүлде алған өлеңдерін 4 беттен оқи аласыздар.

Поделиться ссылкой: