Қош келдің, Мәуліт айы!

707 Views

Мәуліт арабша «туылу», «туыл­ған уақыты» деген мағыналарды білдіреді. Адамзаттың асылы, пайғамбарлардың ардақтысы Мұхаммедтің (с.ғ.с.) туған уақытына байланысты тойланатын мейрам Мәуліт мерекесі деп аталады. Қия­мет күн­гі шапағатшымыз, ұлы ұстазымыз, жолбасшымыз Пайғамбардың (с.ғ.с.) туған күнін атап өту – құптарлық жақсы амал. Мұсылмандардың өміріндегі басты идеал болуы тиіс пайғамбардың (с.ғ.с.) өнегелі өмірі мен өсиетін, тығылымы толассыз ғибратты ғұмырын халқымызға насихаттау – баршаға ортақ игі іс. Бұл дінімізді насихаттаудың, жас ұрпақты имандылыққа, жақсы мінез-құлыққа шақырудың орайлы бір сәті.Әлемдердің Раббысы қасиетті Құранда пайғамбарымызды (с.ғ.с.): «Шын мәнінде сен әлбетте ұлы мінезге иесің» (Қалам сүресі, 4-аят), – деп сипаттаса, тағы бір аятта барша адамзатты Алла Елшісінен (с.ғ.с.) өнеге алуға шақырады: «Расында сендер үшін, Алланы да ақырет күнін де үміт еткендер және Алланы көп еске алған кісілер үшін Алланың Елшісінде көркем өнегелер бар» (Ахзаб сүресі, 21-аят). Салауат айтудың пайдасы зор. Ол біздің барлық өмірімізді қамтиды. Пайғамбарымыз (с.ғ.с): «Кім маған күніне 100 рет салауат айтса, Алла соның қажетін ашады»-деген. Салауат айту уайым мен қайғыдан арылтады. Пайғамбарға салауат айту – құлшылықтың қабыл болуының, деннің сау болуының кепілі. Бұл жүрек нұры. Алла елшісіне салауат айту – Алла Тағаланың өз құлының құлшылығы мен ісін қабыл етуіне себеп болмақ.Ұлы сахабалардың бірі Убай ибн Каб: «О Алланың елшісі! Мен Алла Тағаладан мені саған салауат айтушылардың бірі етуін сұраймын. Мен саған қанша рет салауат айтайын?»-деп сұрайды. Пайғамбарымыз (с.ғ.с): «Қанша қаласаң сонша»-дейді. Сахаба: «Мен салауатқа уақытымның төрттен бірін арнаймын»-дейді. Пайғамбарымыз (с.ғ.с): «Қалауың білсін, егер арттырсаң одан да жақсы» -дейді. Сонда сахаба: «Мен салауатқа уақытымның жартысын арнаймын»-дейді. Пайғамбарымыз (с.ғ.с): «Қалауың білсін, егер арттырсаң одан да жақсы»-дейді. Сахаба: «Мен салауатқа уақытымның үштен екі бөлігін арнаймын»-дейді. Пайғамбарымыз (с.ғ.с): «Қалауың білсін, егер арттырсаң одан да жақсы»-дейді. Сахаба: «Онда мен саған әрдайым салауат айтатын боламын»-дейді. Сонда Алланың елшісі: «Сен уайымнан құтыласың және сенің күнәларың кешіріледі»-деген екен. Олай болса, бүкіл ғаламға мейірім ретінде жіберілген Елшінің (с.ғ.с.) есімін ардақтау, сүннетіне амал ету – сауапты іс.
Ақиқатында, Алла Елшісі (с.ғ.с.) жаны жай тапқанша үмметіне деген үгітін еш үзбеді, көңілдердегі кірді, қайғы-қасіретті кетірді, әлсізді демеді, шектен асқанды сабасына түсірді, күллі адамзаттың рухани әлемін дүр сілкіндірді, зұлымдық пен надандықтың қараңғылығын сейілтті, ізіне ерген ізгілерді жақсылыққа жұмылдырып, жарқын болашаққа бастады. Үмметіне, яғни Сіз бен бізге пәни дүниеде бағдаршымыз болатын Алланың кәләмі Құран кәрім мен Өзінің (с.ғ.с.) жан адам адаспайтын сара жолы – сүннетін қалдырды. Оны (с.ғ.с.) досымен қатар дұшпаны да мойындады.
Ардақты ағайын!
Шарапаты мол Мәуліт мерекесі біздің халқымызға да құтты болсын! Осынау айтулы мейрамның аясында Алла Елшісін (с.ғ.с.) көбірек танып, өсиеттерін тереңірек түсінуді нәсіп етсін. Осы мереке адамдар арасындағы рақым-мейірімнің, имандылықтың, бауырмалдықтың арта түсуіне бір сеп болғай. Пайғамбардың (с.ғ.с.) әміріне мойынсұнып, тыйымынан тыйылуға түрткі болғай.
Құрметті аудан тұрғындары!
Сіздерді жылдағы дәстүр бойынша аудандық «Сұлтан» орталық мешіті Пайғамбарымыздың (с.ғ.с) туған күнінің құрметіне арналған «Қош келдің Мәуліт» атты мерекелік кешке шақырады. Рухани кеште Пайғамбарымыздың (с.ғ.с) өмірбаяны және өсиеттері жайында насихаттар айтылады. Пайғамбарымыздың (с.ғ.с) арнап арабша мәліт оқылады. Тақырыпқа сай діни әндер, сахыналық көріністер және адамзаттың ардақ тұтар тұлғасы жайында бейнефильм көрсетіледі.
Мәуліт 23-ші желтоқсан күні сағат 14.00-де аудандық мәдениет үйінде өтеді. Келем деушілерге есік ашық.

Аудандық «Сұлтан» мешіті.

Поделиться ссылкой: