Мониторингтік талдау жүргізілді

540 Views

Мемлекет басшысы Қасым-Жомарт Тоқаев өзінің алғашқы Жолдауында бірқатар өзекті мәселелерге тоқталып, солардың ішінде сыбайлас жемқорлықпен күресті күшейту керектігін алға тартқан болатын. «Сыбайлас жемқорлықпен жан-жақты күресу мәселесі күн тәртібінен түскен жоқ. Орталық және жергілікті органдардың нормативтік құқықтық актілеріне сыбайлас жемқорлыққа қарсы сараптама жүргізу ісін қайта қалпына келтіру қажет. Бұған сарапшылар мен қоғам өкілдері де атсалысуы тиіс» деген болатын. Бүгінде Президенттің аталмыш тапсырмасы толықтай іске асырылуда. Жергілікті жерлерде құрылған мониторингтік топтар жұмыс жоспарына сәйкес мемлекеттік мекемелердің жұмысын зерделеп келеді. Жуырда білім бөліміне қарасты мекемелерде сыбайлас жемқорлықтың алдын алу бағытында атқарылған жұмыс­тарына сараптама-талдау жүр­гізген мониторингтік топ Ә.Бөкейханов атындағы орта мектептің акт залында семинар-кеңес өткізді. Жиынға топ мүшелерінен бөлек білім бөлімі мен мектеп басшылары және олардың орынбасарлары қатысты. Айта кету керек, жиынға мониторингтік топ төрағасы Серік Өтегенов төрағалық етті.
Ауданда 39 жалпы білім беретін мектеп бар. Оның 8-і бастауыш болса, 28-і орта, 3-уі негізгі мектептер. Бү­гінгі таңда онда 14590 оқушы білім алуда. Аталмыш білім мекемелерінде «Сыбайлас жемқорлыққа қарсы іс-қимыл туралы» Қазақстан Респуб­ликасының Заңы үнемі назарға алы­нып отырады. Тіпті, мектептердің бар­лығында Заң талаптарының сақ­талуы және құқық бұзушылықтың алдын алу бағытында азаматтардың арыз-шағымдарына арналған «Сенім жәшіктері» орнатылған. Сонымен қатар, мектептерде «Адал Ұрпақ» еріктілер клубы жұмыс істеп келеді. Оған ауданның 881 оқушысы мүшелік­ке кіріпті. Ал, аудандық білім бөлімінде сыбайлас жемқорлыққа қарсы күрес шараларын ұйымдастыру бойынша 5 адамнан тұратын комиссия құ­рылып, арнайы «Сенім телефоны» қойылған. Ағымдағы жылы білім беру мекемесіне жеке тұлға өтініштері бойын­­ша барлығы 28 арыз-шағым мен заң­ды тұлғалардан 13 өтініш түсіпті. Осыған байланысты білім бөлімінен жоспардан тыс комиссия құрылып, тексеру жұмыстары жүргізілген. Бұ­дан бөлек, аудандық білім бөлімінің базасында «Сыбайлас жемқорлықтың алдын алу» тақырыбында білім беру мекемелерінің басшылары мен білім бөлімінің әдіскерлеріне семинар-ке­ңес өткізілген. Сондай-ақ, ауданда білім бөлімінің бастамасымен әр түрлі іс-ша­ралар ұйымдастырылып тұрады екен. Атап айтар болсақ, «Біз коррупцияға қарсымыз» тақырыбында плакаттар конкурсы, «Адал және сатылмайтын еңбек» пен «Жастар сыбайлас жем­қорлыққа қарсы» сурет салу бай­қаулары, «Біздің таңдауымыз заңды мемлекет» және «Мемлекеттік қызмет – өмірлік ұстаным» тақырыптарында кездесулер өткізілген. Аталмыш мәлі­меттердің барлығын мониторингтік топ отырысында аудандық білім бөлімі басшысының міндетін уақытша атқарушы Бауыржан Самылтыров мәлімдеп берді.
Бөлім маманының баяндамасы­нан кейін сөз топ мүшелері Қалдан Қойшыманов пен Мереке Айнақұлов­қа берілді. Аты аталған азаматттар білім бөліміне қарасты мекемелерде сыбайлас жемқорлықтың алдын алу бағытында атқарылған жұмыстарына зерделеу жүргізілгендігін айтып, оның қорытындысымен таныстырды. Соны­мен қатар, кей мектептердің құжат жинақтау барысында жіберілген кем­шіліктері туралы да нақты атап өтті.
Жиында мектеп ұстаздары да жа­рыссөзге шығып, баяндама жасады. Олар өз баяндамаларында сыбайлас жемқорлықа қарсы бірлесе күрес жүр­гізу керектігін айтып, қоғам өкілдері ре­тінде Президент бастамасына қол­дау көрсетуге шақырды.

Жәнібек БАЗЫЛБЕКОВ.

Поделиться ссылкой: