Ауыл халқының алғысына бөленді

Кеше аудан әкімі Ерболат Садыр­құлов Қорағаты және Ақбұлақ ауылдық округ­теріне барып, жыл бойы атқарылған жұмыс­тарды тізбектеп, халық алдында есеп берді. Ауылдық округ әкімдерімен бірлес­кен есеп жиындарына елдімекен тұрғындарынан бөлек аудан әкімінің орынбасарлары, аппарат және бөлім басшылары қатысты.
Елімізде өткен жылы үлкен өзгерістер орын алып, бірқатар басшылардың жұ­мыс жүргізу тәртібіне түзетулер енгі­зілген болатын. Солардың қатарында әр түрлі деңгейдегі әкімдер де бар. Мем­лекет басшысы Қасым-Жомарт Тоқаев ел тізгінін ұстағалы аймақ пен өңір және елдімекендегі әкімдердің жұмыс­­тарына өзгерістер қажет екен­ді­гін алға тартқан еді. Дәлірек айтар бол­сақ, әкімдердің халықпен жүздесу жұмыс­тары тым аз екенін сынға алып, оны дереу ретке келтіруді тапсырды. «Қоғам­дағы әділеттілік, ең алдымен, атқару­шы билікке байланысты. Үкімет­тің, министрлердің, барлық дең­гейдегі әкімдердің, полицияның, про­кура­тура­ның, соттардың басты мақсаты — аза­мат­тардың құқығын қорғау. Жергілікті басшылар халықпен тығыз қарым-қатынаста жұмыс істеуі қажет. Халықпен күн сайын бірге болып, қоян-қолтық жұмыс істеуі керек» — деген еді. Ел Президентінің аталмыш тапсырмасы өткен жылы өз деңгейінде орындалып, облыс және аудан басшылары шалғайда жатқан ауыл-аймақтарды аралап, жергілікті жұрттың тыныс-тіршілігімен жа­қын танысты. Нәтижесінде қара­пайым халық пен билік арасында тығыз қа­рым-қатынас орнап, бірқатар ау­қымды жұмыстар іске қосылды. Тұр­ғындардың ұсыныс-тілектеріне құ­лақ түріп, оларға нақты жауап қайта­рылды. Аудан басшылары мұнымен шек­теліп қалған жоқ. Олар халық тара­пы­нан көтерілген мәселелерді хаттамаға енгі­зіп, сол бойынша ауқымды жұмыстар жүр­гізді.Өткен жылы Жамбыл облысы жергі­лік­ті атқарушы органдарының жұмыс алгорит­мін басшылыққа алып, он бес ауыл­дық округке барып, тұрғындармен кез­дескен аудан әкімі елдімекендерді ара­лауды қайта бастады. Бірақ, бұл жол­ғы бағыты тіптен бөлек. Ерболат Садырқұловтың округтерді аралаудағы басты мақсаты – жылдағы дәстүрге сай жыл бойы аудан аумағында атқарылған жұмыстарды саралап, ауылдық аймақ әкімдерімен бірлесіп, халық алдында есеп беру.
Есеп беру жиыны алғаш болып, Қора­ғаты елдімекенінде өткізілді. Ең алдымен халық алдында ауыл әкімі Бақытбек Әбіләзімов есеп бе­ріп, ауылшаруашылығы, бі­лім беру, кәсіп­керлік, әлеуметтік салаларына кеңі­нен тоқталды. Ауыл әкімінен кейін қорағатылықтар аудан басшы­сы­ның баяндамасына құлақ түрді. Аудан­ның экономика, бюджет, ауылшаруа­шы­лы­ғы, ветеринария, жер қатынастары, ауыз су мен газ, тұрғын үй, құрылыс, білім, денсаулық, жастар, дін істері, мәдениет және спорт салаларына қатысты жұмыстарды мәлімдеген аудан әкімінің баяндамасынан тұрғындар аудан дамуында оң өзгерістер көп екенін аңғарды. Әсіресе, ауыл халқына көгілдір отынға қатысты атқарылған жұмыстар өте қызықты болды. Өйткені, Қорағатыға әлі күнге дейін көгілдір отын тартылмаған. Бірақ, аталмыш елдімекен жақын арада газ тартылатын алты ауылдың қатарына кіреді. Дәл осылай айтқан аудан әкімі ауыл халқын бір қуантып тастады.
Жиын барысында тұрғындарға да сөз беріліп, ауыл халқы мектептегі домбыра үйірмесін қайта ашу, алтын өндіруші компанияның ауылға қол ұшын созуы, ауданға барар жолға жөн­­деу жүргізу сынды мәселелерді кө­тер­­ді. Тұрғындар арасында аудан бас­шыларына алғыс айтқысы келе­тін­­­дер де табылды. Солардың қата­рын­да Гүлмира Исаева да бар. Ауыл тұрғыны денсаулық саласына айрықша тоқталып, өткен жылы 10 келушіге ар­налған медпункттің іргетасы көте­рілгенін, қазіргі таңда ғимараттың ха­лық­қа пайдалануға берілгенін атап өтті. «Қорағаты аудан орталығынан қашық болғандықтан, осы күнге дейін тұр­ғындар ауылға дәрігер мен жедел жәр­дем көлігінің керектігін жыл сайын алға тартатын. Бұл мәселе құрметті Ерболат Салқынбекұлы сіздің ықпа­лыңызбен өз шешімін тапты. Жаңа жыл­дан бастап ауыл тұрғындарына жалпы тәжірибелі дәрігер мен жедел жәрдем көлігі қызмет етуде. Жақында ғана жедел жәрдем көлігі аяғы ауыр келіншектерді ауданға тегін апарып, қайта алып келді. Тұрғындарға тегін дәрі-дәрмектер беріліп те жатыр. Сол үшін де сіздерге айтар алғысымыз шексіз. Жасаған әрбір жұмыстарыңыз жемісті болсын» деп ризашылдығын білдірді.
Аудан басшысына алғысты Қора­ғаты тұрғындары ғана айтқан жоқ. Аудан әкімінің баяндамасын тындап, атқарған жұмыстарын жоғары бағала­ғандардың қатарында Ақбұлақ ауылдық окру­гінің тұрғындары да бар. Аудан және ауыл әкімдерінің бірлескен есе­бін тыңдаған ақбұлақтықтар жылдық есепке «қана­ғаттанарлық» деген баға берді. Әсіре­се, Қызылшаруа ауылының тұрғыны Орынбасар Дәуенов соңғы жылдары ауданның әлеуеті жақсара түскенін және құрылыс қарқыны артып, өндіріс өнеркәсібіндегі жетістіктерді БАҚ беттерінен оқып жүргенін айта келе, аудан басшысына алғысын жеткізді.
Аудан басшысы әлеуметтің әлеуетін арттыру бағытында ауқымды жұмыс жүргізіліп жатқанын алға тартты. Жиын соңында халықты бірлікке, ел мүддесі жолында аянбай еңбек етуге шақырды.

Жәнібек БАЗЫЛБЕКОВ.

Поделиться ссылкой: