Облыстық турнирде топ жарды

566 Views

Мемлекеттік қызметте еңбек ететін әрбір адам өз ісіне жауапты әрі берілген тапсырманы тыңғылықты орындауы тиіс. Одан бөлек оның бойында сан түрлі қасиеттердің де болғаны абзал. Өйткені аталмыш мамандықтың жұмыс барысы өте күрделі. Бұл мамандықта туындаған мәселелерді нақты нәтижеге бағыттап шешу үшін ептілік пен ұшқыр ойлай білу аса маңызды.

Күнделікті күйбең тірліктен бір сәтке болса да арылту, қызметкерлер арасында тығыз қарым-қатынас орнату мақсатында әр түрлі бағытта шаралар ұйымдастырылып тұрады. Дәл осындай шарапаты мол іс-шараның бірі Халықаралық әйелдер күні қарсаңында облыс көлемінде ұйымдастырылған болатын. Байрақты бәсекеге мемлекеттік қызметтегі әйелдер қатысып, олар спорттың үстел теннисі түрінен бақ сынады. Айта кетейік, аты аталған дүбірлі дода Қазақстан Республикасы Мемлекеттік қызмет істері агенттігінің облыстық Департаменті мен Жамбыл облысы әкімдігінің дене шынықтыру және спорт басқармасының қолдауымен өткізілді. Турнирге облыстың түпкір-түпкірінен келген, әр түрлі деңгейдегі мемлекеттік органдардан құралған командалар бақ сынады. Жалпы іс-шараға 50-ден аса мемлекеттік әйел қызметшілер қатысып жарыстың көркін қыздырды. Оның ішінде біздің ауданның құрамасы да бар.
«Тараз – Арена» спорт кешенінде өткен жарыс екі санат бойынша өткізілді. Нақтылап айтар болсақ, қатысушылар 35 жасқа дейінгі және 35 жастан жоғары межелері бойынша жарысқа түсті. Нәтижесінде Т.Рысқұлов ауданы әкімдігінің құрама командасы I орынды, Жамбыл ауданы әкімдігінің құрама командасы II орынды, Талас ауданы әкімдігінің құрама командасы III орынды қанжығасына байлады.
Құраманың биіктен көрінуіне, жүлделі орындарға ілінуіне өзіндік үлесін қосқан мемлекеттік қызметкердің бірі — Гүлжазира Нұрмағамбетова. Көкдөнен ауылдық округі әкімдігінде бас маман болып қызмет атқаратын Гүлжазира жекелей санаттар бойынша бақ сынап, өзге әріптестерінен басым түсті. Осылайша турнирдің жеңімпазы атанып, басқарманың арнайы мара­патына ие болды.
Аудандағы мемлекеттік қызмет­шілердің мерейін үстем еткен Гүл­жазираны мереке қарсаңында аудан басшысы Ерболат Садырқұлов та қа­былдап, өз алғысын жеткізді. Білікті маманның табандылығына риза екенін жеткізіп, жұмысына сәттілік тіледі.

Жәнібек БАЗЫЛБЕКОВ.

Поделиться ссылкой: