Тауар бағасына талдау жасалды

Қытайдан бастау алған коронавирустың қазір бүкіл әлемге таралды. Соның сал­дарынан Дүниежүзілік ден­сау­лық сақтау ұйымы бұл індетті пандемия деп жариялап, әлем елдері өз қауіпсіздіктерін кү­шейтіп жатыр. Қазақстанда да қауіпсіздік шаралары кү­шейтілді. Соған қарамастан елімізде COVID-19 коро­нави­русын жұқтырғандар тіркелді. Ал, бұл жаңалық елді елең еткізбей қойған жоқ. Дүрліккен халық дәріханалар мен дүкендерге сабылып, ұзын-сонар кезекті қолдан жасады. Тиісінше баға да құбыла бастады.
Халықтың қауіпсіздігін қамтамасыз ету мақсатында ел Президенті Қасым-Жомарт Тоқаев елге төтенше жағдай енгізді. Сондай-ақ, кеше теле­визиялық Үндеу жасап, елді сабырға шақырды. Осындай күрделі ахуал кезеңінде бар­лық деңгейдегі билік өкілдері де тиісті шаралар қабылдап, вирустың алдын алу, азық-тү­лік пен дәрі-дәрмек тапшылы­ғын болдырмау жолдарын қарастырып жатыр. Аудан әкімі Ерболат Садырқұловтың аудандық орталық базарға барып, ондағы базар бағамына баса мән беруі соның айқын дәлелі. Азық-түлік бағасын жеке-жеке талдап, тиісті сала басшыларына бағаның тұрақты болуын қадағалап отыруды тапсырды. Сонымен қатар, базардағы сауда нүктелерінде санитарлық талаптардың қатаң сақталуы керектігін де жеткізді. Аудан әкімдігінің кәсіпкерлік және өнеркәсіп бөлімінің басшысы Сақтасын Тастанов пен Құлан ауылының әкімі Мұрат Иманбаевтар берілген тапсырмаларға сәйкес жұмыла жұмыс істейтіндіктерін айтып, көз көрген кемшіліктерді қойын дәптерлеріне түртіп алды.
Аудан басшысы Ерболат Салқынбекұлы «Алтын сарай» сауда үйі мен сол маңайдағы дәріханаларға да барып, онда­ғы нарықты бағамдап көрді. Жұртшылықпен жүздесіп, тұр­ғындарды барлық сақтық шара­ларын сақтауға шақырды.

Мереке Ержанұлы.

Поделиться ссылкой: