Ауданда ауқымды істер атқарылмақ

273 Views

Қазіргі болып жатқан дүние жүзін жаулаған коронавирус дерті барша халықты алаңдатуда. Жақында ғана Қазақстан Республикасының Президенті Қасым-Жомарт Тоқаевтың халыққа жолдаған мәлімдемесін ықыласпен қарсы алдық. Ондағы шағын және орта бизнеске қолдау көрсету, үкіметтік жанар-жағар майдың нарықтық бағасын он бес пайызға арзандатуы, дәрігерлерге және медицина қызметкерлеріне үш ай бойы қосымша үстемақы төленетіні, тұрмысқа қажетті заттар мен азық-түлік тегін алатын азаматтардың қатары көбеюі, инфляцияның артуына байланысты зейнетақы мен мемлекеттік жәрдемақы және атаулы әлеуметтік көмек мөлшерін өсіру мәселелері -халықтың әл-ауқатын көтеру жолындағы ауқымды істер.
Мемлекет басшысы төтенше жағдай кезінде орындалуы тиіс бәрімізге ортақ жұмысты айқындап берді: «Індетке шалдыққан адамдарға барлық жағдай жасалып, көмек көрсетеміз. Осы тұрғыда дәрігерлер бүгінгі күннің батырлары және олардың ерен еңбектері ескеріліп, оларға 3 ай бойы үстемақы беріледі» — деді. Расында да медицина қызметкерлері — бүгінгі күннің батырлары, олар барлық ықылас пен құрметке лайық абзал жандар. Сонымен қатар, Мемлекет басшысы зейнетақы мен АӘК алатын азаматтарға, кәсіпкерлерге, мүгедек жандарға және мүгедек азаматты қарап отырған азаматтарға, ресми тіркелген-тіркелмеген жұмыссыз азаматтарға да мемлекет тарапынан қолдау білдіріп, көмек көрсетілетінін жеткізді. Оған бөлінген және қарастырылған қаржы да қомақты, тапсырылған міндеттер мен мақсаттар да орынды. Қазіргі жағдай – ол уақытша қиындық. Біз оны бәріміз бірге міндетті түрде жеңеміз! Бастысы -шыдамдылық, сабырлық және жауапкершілік!
Алты қырды асып келіп, алты құрлықты ауыздықтаған індетке қарсы Үкімет ауқымды жобаларды қолға алды, нарықты, экономиканы тұрақтандыру шарасына басымдық беріп, ауылдық жерлерде жұмыс көзінің ашылуын, шағын және орта бизнесті, аграрлы саланы дамытуға ерекше көңіл бөлуі- көңіл қуантарлық жағдай. Үкіметтен бастау алған игі істер ауданда жалғасын тауып, елдің әлеуетін арттыруға сеп болмақ.
Өткен жылы аудан аумағында 9 жаңа медициналық нысан салынып, халық игілігіне пайдалануға берілген болатын. Атап айтсақ, жаңа медпункт құрылысы Қорағаты, Жалпақсаз, Көкдөнен, Көгершін, Алғабас, Малдыбай, Көкарық, Сәлімбай және Сөгеті елді мекендерінде бой көтеріп, сол мезетте аталған ауылдардың халқы шын пейілмен риза болысқанын көз көрді.
Бұл әрине, біріншіден, «Әкім бол, халқыңа жақын бол» деген қағиданы өзінің қызметтік принципіне балайтын аудан әкімі Садырқұлов Ерболат Салқынбекұлының іскерлігі мен еселі еңбегінің арқасы.
Аудан басшысы Ерболат Салқынбекұлының жүйелі жұмысының нәтижесінде биыл да аудан аумағындағы ұзақ жылдан бері шешімін таппай келе жатқан өзекті мәселелердің түйткілі реттелейін деп отыр. Мәселен, биыл ауылдық елді мекендердегі және аудандық маңызы бар асфальт жолдарын орташа жөндеу жұмыстарына 796 млн.739 мың теңге қаражат бөлінген. Бұл дегеніңіз — 2020 жылы да жол мәселесі бойынша ауқымды тірліктер атқарылады деген сөз.
Бұдан бөлек биыл Тасшолақ, Бәйтелі мен Әбжапар ауылында су құбыры желілері мен су іркуіш құрылысы, Құмарық пен Жарлысу ауылына су құбыры желісі мен су алғыш құбырын салу, сондай-ақ, Құлан ауылындағы орталық су алғыш құрылысын реконструкциялау жұмыстары да жүргізілетін болады.
2020 жылы білім беру мекемелерінде ауыз толтырып айтарлықтай ауқымды тірліктер атқарылады. Мәселен, Қазақ ауылындағы Мұхтар Әуезов атындағы орта мектепке мәжіліс залы және екі пән кабинетінің құрылысы салынып, Рахым Сәбденов ауылындағы Ақбұлақ, Көгершін ауылындағы Ақтоған, Құмарық ауылындағы Болтай батыр, Қарақыстақ ауылындағы Бауыржан Момышұлы және Қызылшаруа ауылындағы № 3 шағын орталықты орта мектептеріне күрделі жөндеу жұмыстары жүргізіледі. «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасындағы қалалардың және аудандық елді мекендердің объектілерін жөндеу шеңберінде жүзеге асатын аталмыш мектептердің құрылыс жұмыстарына 1 млрд.60 млн. 369 мың теңге қара­жат бөлініп отыр. Бұдан бөлек, ау­дан орталығындағы ордалы білім оша­ғы­ның бірі болып саналатын жүз жыл­дық тарихы бар №1 мектеп-лицейі­не, Әлихан Бөкейханов және Шоқан Уәлиханов атындағы шағын орталық­ты орта мектептеріне де күрделі жөндеу жұмыстары жүргізіледі. «Жұмыс­­пен қамтудың жол қартасы – 2020» мем­ле­кеттік бағдарламасы аясында жү­зе­ге асатын күрделі жөндеу жұмыста­рына 893 млн. 60 мың теңге қаражат бөлінген.
Жыл басында Тараз қаласында орын алған оқыс оқиға жұрттың жаға­сын ұстатқанын білесіздер. Содан кейін, қоғамда оқушыларды сыртқа шы­ғар­май, әжетхананы жаппай мектеп іші­не орналастыру керектігі сөз болды.Тіпті көптеген білім ошақтары бұл ұсынысқа қолдау көрсетіп, әжетхана­ны мектеп ішіне орнатып та үлгерген еді. Ауданда бұл бойынша да жүйелі жұмыстар жасалып жатыр. Атап айтсақ, аудан аумағындағы 39 мектептің 26-на әжетхана орнатуға 142 млн.60 мың теңге қаражат бөлініп отыр. Бұл- өте дұрыс шешім. Өйткені мек­теп оқушысы қырғидай тиетін қаныпе­зер қаскөйлерден қорқып емес, сан салалы сабақты алаңсыз оқып, мұғалім дәрі­сін мұқият меңгеріп, алға ұмтылуы қажет.
Осы аталмыш құрылыс жұмыс­та­рына барынша ауыл азаматтарын қамтып, ауылдық жерде жұмыс­сыз­дықты қысқарту шаралары, жастар­дың, ауыл тұрғындарының ел игілігі жолындағы істерге белсенділік таны­туы басты мақсат саналуда.
Елімізде жарияланған төтенше жағдайға байланысты 2020 жылғы 2 сәуірде ҚР Президенті «Әскери мін­деттілерді арнаулы жиындарға шақыру туралы» №296 Жарлыққа қол қойды. Бұл шара карантин жағ­дайында қоғамның қауіпсіздігін қам­тамасыз ету және Төтенше жағдай режимін ұстап тұруда мемлекетке жәрдемдесу үшін қажет. Осылайша, ел басшылығы елдің қалыпты өмірге келуі үшін барлық ресурстарды пай­далануда. Арнаулы жиындар – жұ­мыл­дыру емес. Мұндай жиындар – жыл сайын әрбір өңірде өткізіле­тін жалпы қабылданған тәжірибе. Қазіргі сәтте Жарлықты қабылдау оның ішінде жастардың көптеген бастамаларымен де байланысты. Қазақстандық жастар – патриоттар. Өз күш-жігерін іске асыру және Отаны мен халқына кө­мек көрсету үшін ТЖ кезеңінде қоғам қорғаушыларының қатарына қо­сылуға ұсыныстар мен ті­лектер келіп түсуде. Жарлыққа сәйкес әскери міндетті қазақстандықтарды меди­циналық қызмет атқаруға, оның ішінде дезинфекциялау жө­ніндегі іс-шараларды қамтамасыз етуге тартатын болады. Сондай-ақ, жиындарға шақырылған азаматтар тасқынмен күреске, елді мекендерде және бекеттерде құқықтық тәртіпті күзетуге жәрдем көрсететін болады. Кешегі күннен бастап облыс көлемін­де карантиндік режим жарияланды. Соған қарамастан, аудан тұрғында­ры арнайы бекітілген тәртіпке сай тұрақты жұмысын, ауыл шаруашылық жұмыстарын, құрылыс және жол жөн­деу, ауыз су құрылысы жұмыста­рын, шағын кәсібін жалғастырып, ау­дан эко­­номикасын көтеру бағытын­да­ғы жұмыстарына үлес қоса бермек. Ал ағайынның қосар үлесі сол- бекітілген талап­тарды орындап, төтенше жағдай кезінде карантиндік режим талапта­ры­на бағыну, ынтымақты тірлік пен бірлік­ті ұстану. Бірлігі асқан елдің бере­кесі таситынын жадымызда ұста­найық, ағайын!

Марат Диханбай.

Поделиться ссылкой: