Азық-түлік бағасын негізсіз өсіргендерге айыппұл салынады

513 Views

Атының өзі қолайсыздау есті­летін коронавирус індеті қазіргі таң­да телеэкранның да, газет біткен­нің де басты тақырыбы болып тұр. Теледидарды қосып, жа­ңа­лық тыңдасаңыз да, еліміздегі республика­лық, облыстық, аудандық дең­гейдегі бұқаралық ақпарат көздерін оқып шық­саңыз да, қолына микрофон мен қа­лам ұстаған журналистердің сюже­тін көріп, мақалаларын оқисыз. Демек ел басына қиын сәт туғанда журналистер де халықпен бірге.
Халықпен бірге дегеннен шығады, аудан әкімі Ерболат Садырқұловтың 2020 жылдың 31 қаңтардағы №08-ө өкі­мімен ауданда азық-түлік, жанар-жағармай және халық тұтынатын тауарлар бағасын тұрақтандыруға ық­пал етуге байланысты арнайы штаб құрылған. Штабтың төрағасы аудан басшысы Ерболат Салқынбекұлының өзі. Айта кетейік, қоғамдық штабтың құрамында 15 адам бар. Олар бес-бестен үш топқа бөлінген. Мына нәрсені ашық айтқан абзал. Ерболат Садырқұловтың жетекшілігімен құрылған осы қоғам­дық штаб мүшелері дәл осындай қиын сәтте халықты бірлікке шақырып, азық-түлік бағасының тұрақтылығын бақы­лауда ұстап, ауқымды жұмыстар атқарып келеді.
Өткен сейсенбіде қоғамдық штаб­тың құрамындағы бестік, яғни аудан­дық кәсіпкерлік және өнеркәсіп бөлімінің басшысы Сақтасын Тас­танов, аудандық Қоғамдық кеңес мү­шесі Әбдіқадір Оңалбеков, жеке кәсіп­кер Ертіс Тұғылшиев, «Құлан таңы» газетінің директор-бас ре­дакторы Мұратбек Өмірзақов және аудандық статистика басқармасының маманы Сандуғаш Өкенова орталық базар ішіндегі бірқатар дүкендерді, сондай-ақ, «Эконом Плюс», «Сопы», «Аяжан» сынды аудандағы ірі сауда орталықтарын аралап, ондағы азық-түлік бағаларына мониторингтік тал­дау жасады. Талдау нәтижесі бары­сында «Эконом Плюсте» «Мадина» макарон өнімінің, ал «Аяжан» сауда орталығында қарақұмықтың (гречка) бағасы едәуір өскендігі байқалды. Дүкен қожайындары аталған өнім­нің баға­сын өздері емес, тауар тасымал­даушы тараптың өкілдері қымбатта­тып отырғанын айтады. Алайда, штаб мүшелері бағаны шарықтатуға ешқандай негіз жоқ екенін айтып, дүкен қожайындарының қолына Қазақстан Республикасы Үкіметінің 2020 жылғы 21 наурыздағы №133 қаулысымен бекітілген ҚР ұлттық экономика, ауыл шаруашылығы, сауда және интег­ра­ция министрлігінің «Әлеуметтік ма­ңызы бар азық-түлік тауарларына шек­ті бөлшек сауда бағаларын енгізу туралы» бірлескен бұйрығын көрсетті. Ол бұйрықта «Бірінші сортты бидай ұнының келісі — 149 теңге, макаронның (өлше­ніп сатылатын) келісі – 206 теңге, күріш – 258 теңге, сиыр еті (сүйекті жауырын-төс бөлігі)- 1774 теңге, I санатты тауық жұмыртқасы (ондық) – 271 теңге, күнбағыс майының ба­ға­сы – 418, ас тұзының бағасын («Экстра» тұзынан басқасы) – 52 теңге­ден асырмау қажеттігі» жазылған. Аталған бұйрықпен жіті танысқан дү­кен қожайындары алдағы уақытта баға тұрақтылығын сақтауға уәде етіп, азық-түлік өнімдерін қымбаттатпаймыз деп сендірді. Мониторингтік талдау жұмы­сы кезінде осы жағдайды пайда­ла­нып, ба­ғаны негізсіз өсіріп, оңай ол­жаға ке­нелгісі келетіндерге заң жүзінде шара қол­данылып, айыппұл салы­на­тыны ескер­тілді.

Түйін: Қазір елге танымал азаматтар мен азаматшалар әлеуметтік желідегі парақшаларында ұлтқа басу айтып, елді бірлікке, татулыққа шақыратын видеолар салып жатыр. Есім сойылы мұқым қазаққа белгілі талантты актер Бекжан Тұрыстың ілгеріде жазған мына бір ой толғауы көпшілікті таңдатқаны рас. Ол «Қазақ қазақ болғалы талай зобалаң көрсе де, тарықса да, біржола үмітсіздікке берілмей іштей рухани медет іздеп өсіп-өнген ел. Атынан ат үркетін «оба», «сүзек» сияқты індеттің болғаны да, айналаны лаң қылып ойранға салғаны да рас. Оны еске түсіру үшін өткенге көз салсаңыз, мысалы жетіп жатыр. Осыған дейінгі «құс тұмауы», «шошқа тұмауы» деп те үрей ұшырған кез болған. Бірақ бұл жолғы коронавирустың – (сәтсіз аударылса да) тәжтажалдың дүниежүзін дүрліктіріп дүрбелеңге салып отырғаны да ақиқат. «Сабыр түбі – сары алтын» дегенді айтқан да, түсінген де халықтың баласымыз ғой, Алла ақырын, құдай түбінің қайырын берсін. Осындай қауіп-қатердің есебінен байып қалуды көздейтін ниеті жамандардың пасықтығына да жаның ауырады. Мұндайда кез келген адам керісінше кісіліктен аттамай, адамгершілікті ұмытпай, бір үйдің баласындай біріне-бірі жанашырлық танытқаны жөн ғой. Олай болса, Үкімет басындағылардың ескертіп жатқан сақтық шарасын отбасыңызда да сақтаңыз» деп жазды актер өзінің инстаграмм парақшасында. Шындығында да, «Бірлік бар жерде тірлік бар» ардақты ағайын. Мемлекет нұсқаған пәрменді барынша қолдауға тырысайық.

Марат Жолдасбекұлы.

Поделиться ссылкой: