ПОЛКОВНИК АҚЖОЛОВ

236 Views

Ауылда Аязбай қария туралы сөз бола қалса олардың өскен-өнген әулет екенін екінің бірі жаңылмай айтып бе­ре алады. Елден естуімше үлкен ата­ла­ры Ақжол да, Аязбай ақсақал да дене­лі, қазанаттың өзі әрең көтеріп жүре­тін батыр тұлғалы кісілер болған екен. Аязбай шалдың көзін көрдім, ауылда­ғы Жұматай мен Әубәкір аталар сияқты найзаға түсіп, жиынды жерде білек сы­банып біреумен белдеспесе де ел ол кісінің сесінен сескенетін. Одан өрбі­ген ұрпақ та кейін атан жілікті азамат бо­лып өсті. Солардың біреуі Аязбай кісі­нің кіндігінен тараған Бұрхан (оны жұрт Бақтыбай деп те атап кеткен) да балуан денелі қарулы жігіт болып өсті. Ол Қаратау қаласындағы тау-кен құрылыс техникумын тәмамдап, Луговой­ға келгеннен құрылыста істеді. Жан жары Айнагүл екеуі дүниеге төрт ұл әкеліп, оларды оқытты, үйлі-жайлы етті, сөйтіп екеуі де зейнет демалысына шықты. Енді сол төрт ұлдың балала­рын әлпештеп, айналып-толғанып отыр.
Бәкеңнің ұлдары спортқа бейім болып өсті. Сондықтан болар, олардың барлығы күрессе жауырыны жерге ти­мейтін нағыз балуанның өзі болатын. Ұлдың үшеуі әскери қызметті таңдады. Үлкен ұл Нұрлан қазір Меркіде поли­ция майоры, ал, ең кенжесі Нұрсұлтан Қазақстан Қарулы Күштерінің лей­тенанты. Нұрғали ғой физрук. Біз әң­гімемізге арқау еткелі отырған ортан­шы ұл – Нұрмахан да әскери адам. Енді оның өмірбаян жолдарына үңі­ліп көрейікші…
– Отбасымызда төрт ұл болған соң оларды ата-баба дәстүрімен Отан қор­ғауға, елін, жерін сүюге баулыдым,-дейді Бұрхан Аязбайұлы Ақжолов.-Біздің ауылымызда әскери шені бар азаматтар бұған дейін болған емес. Әйтеуір ататек шежіресінен білетіні­міз Тоғызақ, Таңабай, Жанкісі, Досқожа сынды батыр аталарымыз болған деп балаларға айтып отыратынмын. Осы Нұрмаханым Әлихан Бөкейханов (бұрынғы Варошилов) мектебін бітіре салысымен Алматыдағы Қазақстан Қарулы Күштерінің Академиясына құжаттарын тапсырып, оқуға түсіп кетті. Сол Кеңес Одағының маршалы Қонев атындағы Академия­­­ны бітірген соң Теміртау қаласында әс­ке­ри қызметін өтей бастады. Балаң­ның әрбір басқан қадамы әкеге қуа­ныш әкеледі екен. Ол офицерлік жолды дұ­рыс таңдапты. Өмірлік жарын да осы салада жүріп тапты. Қазір Құралай келінім Қазақстан Қарулы Күштері Министрлігінің кадрлар бөлімінде жұ­мыс істейді. Ал, Нұрмахан болса қызметтегі орындаушылық қабілеті­нің арқасында тез өсті. Сөйтіп, әскери қызмет оның өмірінен айшықты орын алды.
Иә, әке балаға сыншы. Десек те, Нұрмахан өте принципшіл, айтқан бетінен қайтпайтын өте табанды аза­мат болып өсті. Соның арқасында Қа­рулы Күштерді әскери қару жарақ­пен қамтамасыз ететін бас басқармада да мінсіз қызмет етті. 2007 жылы ағыл­шын тілінен үздік тест тапсырған, оны командирлері Америка Құрама Штаттарына кәсіптік шеберлігін шыңдау үшін тоғыз айлық оқуға жіберді. Нұрмахан мұхиттың ар жа­ғындағы елдің Президенті Буштың қолынан диплом алып елге оралды. Сөйтіп, ол 2010 жылдан бастап Қазақстан Республикасының Қорға­ныс министрлігінде әскери-техника­­лық саясат Басқармасында майор ше­­нін алып, қызметін одан әрі жалғыс­­тыр­ды. Сөйтіп, ол ел Қарулы Күштерін­де тұңғыш рет өткізілген әскери-тех­никалық көрменің куәсі болды. 2014 жылы подполковник Нұрмахан Ақжолов тағы да АҚШ-қа барып кә­сіптік шеберлігін арттырып қайтты. НАТО-ның Иордания аумағында өт­кізген командалық-штабтық оқу-жат­тығуларына қатысып келген соң оны басшылар бір әскери бөлімге басқарма басшысы етіп тағайындады.
4 мамыр Нұрмаханның туған күні. Ал, 7 мамыр Отан қорғаушылар Күні Н.Б.Ақжоловқа кезекті полковник ше­ні берілді. Әрине, бұған Нұрмаханның әкесі мен шешесі де қатты қуанды. Әу­лет­­тің осы қуанышын Нұрмахан­ның он бір жыл білім алған мектебімен, әсі­­ресе, оның ұстазы Татьяна Васильев­на Паршинамен бірге бөліскіміз келді. Өйткені, ол кісі осы Нұрмахан сияқты Отан қорғаушы патриот тәрбиелегенін білсін дедік.

С.Қожеке.
Суретте: полковник Нұрмахан Бұрханұлы Ақжолов.

Поделиться ссылкой: