Құрылыстан мән, сападан сән кетіп тұр

204 Views

Жұмыс алгоритміне сәйкес аудан әкімі Ерболат Садырқұлов өткен сей­сенбіде Қорағаты шағын орталықты орта мектебіне барып, аталмыш бі­лім ошағында жаңа оқу жылының ұйымдастырылу процесімен танысты. Бұдан өзге аудан басшысы ауылдағы Абай, Ы.Алтынсарин, М.Әуезов, М.Мәметова, Ә.Молдағұлова және Құрманғазы көшелеріне диодты шамдардың орнатылуын, сонымен қатар Төле би көшесіне жүргізіліп жатқан орташа жол жөндеу жұмысын барып көрді. Қорағаты ауылдық округінің әкімі Бақытбек Аблазимовтың іскер әкім екені белгілі. Бірақ сонда да Ерболат Салқынбекұлы ауылдың әлеуетін арттыру бойынша ауыл әкімімен алдағы жоспарларды талқылап, Бақытбек Жақсымбетұлына өз ұсыныстарын айтты.
Бұдан соң Ерболат Салқынбекұлы Ақбұлақ ауылдық округіне қарасты Бәйтелі бастауыш мектебіне келді. Биыл бұл мектепке ағымдағы жөндеу жұмыстары жүргізілген болатын. Аудан әкімі әлі де арқаны кеңге салуға болмайтындығын сөз етіп, мектеп басшылығына санитарлық талаптарды қатаң сақтау қажеттігін ескертті. Аудан бас­шысы барған кезекті нысанның бірі Қызылшаруа елді мекеніндегі № 3 шағын орталықты орта мектеп болды. Ілгеріректе Қызылшаруа деп аталған № 3 шағын орталықты орта мектептің құры­лысы 1978 жылы аяқталып, пайдалануға берілген екен. Аталмыш білім ошағынан талай дарынды оқу­шы­ның түлеп ұшқанын біз жақсы біле­міз. Бір «әттеген-ай» деген тұсы, әб­ден көнерген білім ошағына күрделі жөндеу жұмысының жүргізілмей, уақыт озды­рып тұрғаны еді. Міне, биыл ұзақ жыл­дан бері шешімін таппай келген мәселе оңды шешімін тауып, құрылыс жұмыс­тары қолға алынды. Мердігерші «Санат — Тараз» жауапкершілігі шек­теулі серіктестігі. Құрылысқа бөлінген қаражаттың жиынтық сомасы 164 миллион теңгені құрайды. Бірақ құрылыс алаңынан компания басшысы Еркебұлан Аханбековті таба алмадық. Ерболат Садырқұлов жұмысшы санын арттырып, мектеп құрылысының аяқталмаған кейбір жұмысын белгі­ленген мерзімде аяқталуын мердігер компанияның өкілдігіне қатаң түрде табыстады.
Одан кейін аудан басшысы Ақбұлақ орта мектебіне жүргізіліп жатқан құры­лыс алаңына барды. Толығымен күр­делі жөндеуден өткен аталмыш мек­тептің құрылысына 222 миллион тең­ге қаражат бөлінген екен. Құрылыс жұмысын тендрден ұтып алған мер­дігерлік компания «Гарейс- строй» ЖШС-і. Алайда, компания өкілдерімен ауыл тұрғындарының, мектеп басшы­лығының араларында бірін-бірі тү­сініс­пеушілік орын алған тәрізді. Сондықтан да құрылыс жұмысы тым баяу жүргізілуде. Өкінішке орай бұл жақтан да компания басшыларын көре алмадық. Құрылыс жұмысының сапасы да айтарлықтай мәз емес. Қыркүйектің 15-іне дейін жөндеу жұмыстары «біте қояды» деуге сену қиын болып тұр. Ерболат Салқынбекұлы бұл мектептің әбден тозығы жетіп, бірнеше жылдан бері күрделі жөндеу көрмей тұрған нысан­ның бірі екенін ескертіп, «қал­таға түсетін» қаражатты емес, адам бойындағы ізгі қасиеттің бірі жауап­кершілікті алдыңғы орынға қою керек­тігін баса айтты. Мердігер компанияның өкілі құрылыс жұмысын белгіленген межеге дейін бітіреміз деп сендірді.

Марат Диханбай.

Поделиться ссылкой: