Абай ауылдық округі

364 Views

Соңғы кездері аймақ басшысы Бердібек Сапарбаевтың тікелей тапсыр­ма­сымен бірқатар байқаулар мен жоба­лар қолға алынып келеді. Олардың басым көпшілігі тұрғындардың ру­ха­ни байлығын жаңғыртуға, елді мекен­дердегі ақсақалдардың әлеуетін арт­ты­руға, жергілікті жерлерде қылмыс пен тәртіпсіздікті болдырмауға бағыт­тал­ған. Сол жүйелі жоспарларға негіз­делген жобалардың бірі – «Үлгілі ауыл» жобасы.
Аталған байқауға біздің ауданнан екі бірдей ауыл қатысты. Оның біреуі – Көкдөнен ауылы болса, екіншісі – Абай ауылы. Жуырда бірлігі мен ынтымағы жарасқан елді мекендерде атқарылып жатқан ауқымды жұмыстарды әр сала­ның мамандарынан құралған арнайы жұмысшы тобы зерделеп, тексеріп қайт­қан болатын. Оны біз газетіміздің алдыңғы сандарында жазып, ол ту­ралы толыққанды мәлімет беріп, арнайы бетке фоторепортаж жазған бола­тынбыз. Сол сәтте облыстық арда­герлер Кеңесінің төрағасы Еркін­бек Солтыбаев бастап келген ар­найы жұмысшы тобының мүшелері Мұратбек Арыстанбеков басшылық ететін Абай ауылдық округіндегі атқарылып жатқан жұмыстарға ерекше көңілі толған еді. Сондықтан болар, топ мүшелері Абай ауылын жүлделі орындардың біріне лайықты деп таныды.
Дәлірек айтсақ, облыс әкімінің орынбасары Ержан Жылқыбаевтың төрағалығымен өткен отырыста Абай ауылдық округіне жүлделі екінші орын беру жөнінде шешім ұйғарылды. Сол үшін де барша ауыл тұрғындарын шын жүректен құт­тықтаймыз. Іргелі істердің атқарылуына айрықша үлес қосып жүрген ауыл азамат­тарына осындай толағай табыс­тарға жете беруіне тілектеспіз.
Аты аталған отырыстың хатта­масына сүйенсек, Қордай ауданына қа­расты Кенен Әзірбаев ауылы жоба жеңімпазы атанды. Ал, екінші орынды Абай ауылы мен Байзақ ауданына қарасты Мәдімәр ауылы өзара бөлісіпті. Жүлделі үшінші орынға Жуалыдағы Қарабастау, Меркідегі Сұрат және Шу ауданындағы Дінмұхамед Қонаев елді мекендері ие болды.
Редакциядан: Жоба жеңім­паз­дарын марапаттау рәсімі Тұңғыш Прези­дент күніне орай өткізілетін бо­ла­ды.

Жәнібек БАЗЫЛБЕКОВ.

Поделиться ссылкой: