Ерлік ешқашан ұмытылмайды

275 Views

15 ақпан, яғни кеше Кеңес әскер­лерінің Ауған жерінен шығарылғанына 32 жыл толды. Осынау айтулы да­таға орай аудан әкімі Ерболат Са­дырқұлов кеше бір топ Ауған соғысы ардагерлерімен кездесіп, оларға мақтау грамотасын табыс етті. Өз сөзінде аудан басшысы 10 жылға созылған Ауған соғысының елімізге тигізген зардабын, майдан шебінде қаншама жауынгер отандастарымыздың жан тәсілім еткенін айтып, ынтымақ пен татулық бар жерде ғана тірлік алға басатынын жеткізді.
– Өз басым сіздердің көрсеткен ерлік­теріңіз бүгінгі жас буынға үл­кен рухани күш жігер сыйлайды деп ойлаймын. Неге десеңіздер, әрбір елдің болашағы жастар екені сіз бен бізге мәлім. Ал жастарымыздың жігері мықты болуы үшін сіздер секілді намысшыл азаматтардың ерліктерін біз ұдайы айтып отыруымыз қажет.Біздің ата-бабаларымыз ұлтарақтай жер үшін намысты нанға сатпаған. Оны көне тарихтан жақсы білеміз. Сіздер де қазақы намысты ұқтырдыңыздар. Біз сіздерді әрдайым мақтан тұтамыз. Дендеріңізге саулық, отбасыларыңызға амандық тілеймін, – деді.
Содан соң аудан әкімдігі денешы­нықтыру және спорт бөлімінің басшысы, аудандық Ауған соғысы ардагерлер ұйымының төрағасы Ерлік Шабеев сөз сөйледі. «Ерболат Салқынбекұлы, бізді қабылдап, айтулы датамен құттықтап, мерейімізді өсіргеніңізге рахмет. Бұл күнді біз жыл сайын жоғары деңгейде атап өтетінбіз. Алайда, елімізде ғана емес, әлемде қалыптасқан жағдайға байланысты аудандағы Ауған соғы­сының ардагерлері халыққа үлгі бо­лайық деп көптеп жиналмауға уағ­даластық. Себебі, аға буын болып біздер үлгі болмасақ, ерлігімізге сын емес пе? Мен де өз тарапымнан Ауған соғысы ардагерлерінің отбасына береке, жұмысына табыс тілеймін» деді ол. Кездесу соңында аудан әкімі Ерболат Садырқұлов Ауған соғысы ардагерлерімен бірге естелік суретке түсті.
Дәл осы күні олар Ауған соғысы ардагерлерінің құрметіне қойылған ескерткіш аллеясына гүл шоқтарын қойды.

Марат Диханбай.

Поделиться ссылкой: