Екпе салдырмай-ақ вакцинация паспортын сатып алғандар жазаланады

499 Views

Екпе салдырмай-ақ вакцинация паспортын сатып алу туралы ақпарат әлеуметтік желіні желдей есіп жүр. Коронавирус індеті шарықтап тұрған кезде белең алған бұл жағдай қоғамда қызу талқыға түсіп жатыр.
Әлеуметтік желіде тараған ақпаратқа қарағанда, емхана қызметкерлері вакцинация құжатын 15 мың теңгеге сатып келген. Ал Алматыдағы №4 емханада вакцинация паспорты саудаланып жатыр деген ақпарат әлеуметтік желілерде тарады. Дәл осы ақпараттан соң тергеу ісі басталды. Нәтижесінде, дәрігерлер келушілерге екпе салмаса да, төлқұжат жасап бергенін мойындады. Бірі жалған құжатты 15 адамға дайындап беріп, әрқайсысынан 15 мың теңгеден алған. Бұл туралы қоғамдық Денсаулық басқармасына да тұрғындардан шағым түсіпті. Бұл мәселеге қатысты Алматы қаласы қоғамдық Денсаулық басқармасы құқықтық жұмыстар бөлімінің басшысы Мақпал Сералинова: «Бұл әрекетке барған медициналық қызметкерлер өз еркімен жұмыстан шықты. Қазір іс бойынша материалдар құқық қорғау органдарына жіберілді. Тергеу қорытындысына сәйкес, күдіктілер тиісті жазаға тартылады», – деді.
Ал брифингтегі мәжілісте ішкі істер вице-министрі Арыстанғани Заппаров: «Жыл басынан бері полиция органдары барлығы 86 қылмыстық іс қозғады, оның 39-ы вакцинация паспорттарын және 47-сі ПТР-анықтаманы қолдан жасағаны үшін», – деген мәліметті ай­тып қалды. Ішкі істер вице-министрінің сөзіне қарайтын болсақ, вакцинация паспортын сату белең алып бара жатыр.
Вакцина салу немесе салмау – әркім­нің өз еркінде. Алайда, вакцинация пас­портын сатып алып, індетке немқұрайды қарау реанимацияға жолдама алумен бірдей. Сондықтан мемлекет тегін қорғануға мүмкіндік беріп отырған кез­де, жалған құжатқа ақшаңызды жұм­сайтын болсаңыз, өз қолыңызбен ауыруға билет сатып алып жатырмын деп есептей беріңіз.

А.ҚАМШЫБЕК.

Поделиться ссылкой: