Ақсақалдары бата беріп, ағалары ат мінгізді
658 Views
Бүгінде Тұрар Рысқұлов ауданында бұқаралық спорт қарыштап дамып келеді. Оған Көкдөнен ауылының он алты жасар тұрғыны Ерсін Станбектің Швецияның Стокгольм қаласында жасаған ерлігі айқын дәлел бола алады. Аталмыш қалада өткен дүбірлі додада ол қол күрестен чемпион атанды. Мінбенің ең биік тұғырынан көрінген Ерсінді сейсенбі күні көкдөнендіктер ыстық ықыласпен күтіп алды.
Ерсін бала кезден спортқа жақын өскен жігіт. Жастайынан оның дарынын мектеп мұғалімдері байқап, сан түрлі жарыстарға қосқан. Мектеп оқушылары арасында мерейі үстем болып, жүлделі орындардан көрініп келген. Біз ол туралы газетіміздің өткен сандарында да жазған болатынбыз.
Күні кеше ол тағы да бір биікті бағындырып, туған өлкеге жеңіспен оралды. Көкдөнендегі көпшілік Швециядан келген чемпионды зор ықыласпен күтіп алды. Салтанатты шара барысында оған ауыл ақсақалдары бата беріп, жергілікті жұртшылық құны 1 500 000 теңге тұратын таза қанды ағылшындық арғымақты сыйға тартты.
Жиын соңында сөз сөйлеген жас спортшы барша қолдаған жерлестеріне өз атынан алғысын жеткізді.
«Құлан таңы» ақпарат.