Көшесі 100 % асфальттанған ауылда мәселе жоқ емес
464 Views
Өткен жылы тоғыз жолдың торабында орналасқан Луговой ауылдық округінде іске асырылған ілкімді істер өте көп. Солардың бірі – көше жолдарының ретке келуі. Шындығын айту керек, былтыр Луговойда көшелердің біразына жол төселді. Оның 13-і «Ауыл – ел бесігі» бағдарламасы аясында жөнделіп, іске асырылды. 13,8 шақырымды құрайтын 13 көшенің жөндеу жұмысына бюджеттен 261,3 млн.теңге бөлінген болатын. Бұл – бір. Екіншіден, Луговой ауылында су жаңа спорт кешенінің құрылысы жүргізіліп, оған 369
млн.теңге көлемінде қыруар қаражат бөлінді. Қазіргі таңда нысанның құрылыс жұмыстары аяқталып, кем-кетігі ретке келтіріліп, жуық арада пайдалануға берілмек.
Аудан орталығында «Арай» тұрғын үй алқабы соғылып жатқанын біз жақсы білеміз. Оған қоса облыс басшысы Бердібек Сапарбаевтың бастамасымен қолға алынған «Асарлатып үй салу» жобасы бойынша да мұқтаж жандарға үйлер берілуде. Айта кетейік, аталған жоба аясында өткен жылы 14 мұқтаж отбасыға баспана кілті табысталған. Бірақ аталмыш жұмыстардың барлығы аудандағы баспанаға мұқтаж жандардың үйлі болуы үшін жеткіліксіз. Сондықтан да дәл қазір Луговойда жер телімдерін үлестіру үшін тиісті жұмыстар атқарылуда. Соның бірі – Луговой ауылындағы 1 және 2 кезектегі тұрғын үй алқаптарына электр желісінің құрылысын жүргізу. Тілге тиек етейік, бұл бағытта бюджеттен 708 млн.теңге қаражат бөлінген.
Аталмыш мәліметтердің барлығы аудан әкімі мен ауыл әкімінің Луговой ауылында өткен есепті жиында айтылды.
Жалпы жиында луговойлықтар аудан әкіміне бірнеше сауал жолдады. Атап айтар болсақ, Тұрар Рысқұлов мектеп-лицейіне жапсарлас ғимарат соғу, көшені абаттандыру жұмыстарын жалғастыру, жаяу жүргіншілер жолын салу, жол белгілерін қою, кеден қызметкерлеріне арналып салынған үйлерді мұқтаж жандарға беру, вокзал алаңын көріктендіру, дренаждарды тазарту, балалар алаңын соғу, өткел жолын жөндеу сынды мәселелер көтерілді.
Жалпы жиын соңында ауыл тұрғындары аудан әкімінің және ауыл әкімінің жұмысына көңілі толатынын айтты.
Жәнібек Базылбек