Қоғамдық кеңестің құрамын бекітуге билік араласпайды

Әлеуметтік желіде, кейбір БАҚ беттерінде жарияланып жатқандай «Жамбыл облысының әкімі облыстық мәслихат депутаттарын екіге бөлді» деген ақпарат шындыққа жанаспайды.
Жамбыл облыстық мәслихаттың кезекті ХV сессиясында «Жамбыл облысы Қоғамдық кеңесі» құрамын бекіту мәселесінде депутаттар арасында келіспеушілік туындады.
Сессия облыс әкімінің емес, облыстық мәслихаттың төрағалығымен өтті. Бердібек Сапарбаев аймақ басшысы ретінде басқосуға қатысып отырды.
Сессия барысында қаралған бірнеше мәселенің бірі – облыстық Қоғамдық кеңестің құрамын бекіту. Бұл мәселе бойынша мәслихат депутаты, Қоғамдық кеңес құрамын қалыптастыру жөніндегі комиссия төрағасы Ерқанат Манжуов баяндама жасады. Ол ұсынылған 15 адамға тізім бойынша толықтай дауыс беруге шақырды. Облыстық мәслихаттың хатшысы, сессия төрағасы Махметғали Сарыбеков әрбір үміткерді қоғам, депутаттар дұрыс танымайды, сол себепті жеке-жеке дауыс беруге ұсыныс білдірді, бұл ұсынысты депутатардың басым бөлігі қолдады.
Жекелей дауыс беруге келіспей, қарсы болған облыстық мәслихат депу­таттары Е.Манжуов, Е.Саурықов, Б.Тлебаев, С.Рысбаева, Ш.Абдрахманов, Т.Жолтаев орындарынан тұрып, залдан шығып кетті.
Сессияда қалған 22 депутат дауыс беру тәртібі бойынша әрбіріне жеке-жеке дауыс берді. Көпшілік ұсыныспен 15 үміткердің 11-і Қоғамдық кеңестің мүшелігіне өтсе, 4 адам өтпеді. Облыстық мәслихаттың сессия шешімі бойынша облыстық қоғамдық кеңеске 11 адам сайланды. Бұдан бөлек, ережеге сәйкес конкурстан тыс екі адам өтті.
Айта кетейік, Қоғамдық кеңесті бекітуге арналған конкурс бірнеше кезеңнен тұрады. Алдымен, мәслихат БАҚ-қа хабарландыру береді. Хабарландыру бойынша конкурс арқылы комисссия және байқаушылардың құрамы мәслихат хатшысының шешімімен бекітіледі.
Жергілікті билік, яғни облыс әкімі бұл конкурсқа араласпайды. Кандидаттар тізімін жасақтау жұмыс тобының құзырында. Облыс әкімі сессияға дейін де, сессия барысында да комиссияның жұмысына немесе депутаттардың дауыс беру құқығына араласқан жоқ. Жергілікті халықпен кездесулерде тұрғындар тарапынан Қоғамдық кеңестің құрамы мен жұмысына қатысты көптеген ұсыныс-өтініштер айтылатынын ескеріп, депутаттарға бұл мәселеге жауапкершілікпен қарауды жеткізді.
Қоғамдық кеңес құрамын қалыптастыру жөніндегі комиссия ашық дауыс беру арқылы облыстық мәслихатқа Қоғамдық кеңес мүшелерінің тізімін ұсынады. Құрамды бекіту немесе бекітпеу мәселесін мәслихат шешеді.

Жамбыл облысы әкімінің баспасөз қызметі.

Поделиться ссылкой: