«Мектептен тыс тәрбиелеу әдістері арқылы балалардың шығармашылық әлеуетін дамыту» тақырыбына арналды
404 Views
Аудандық білім бөлімінің және балалар мен жасөспірімдер орталығының іс-шаралар жоспарына сәйкес, жақында Т.Рысқұлов атындағы мектеп-лицейінде мектептен тыс тәрбиелеу әдістері арқылы тұлғаның шығармашылық мүмкіндіктерін дамыту, теорияны тәжірибелік іс-әрекетпен ұштастыру мақсатында «Мектептен тыс тәрбиелеу әдістері арқылы балалардың шығармашылық әлеуетін дамыту» тақырыбында аудандық семинар өтті.
Семинарға қосымша білім беру ұйымдарының директорлары, орынбасарлары, қосымша білім беру педагогтары және жалпы білім беретін орта мектептің көркем еңбек пәнінің мұғалімдері қатысты.
Семинарды аудандық білім бөлімінің басшысы М.Базарова сөз сөйлеп ашып, мекеме әкімшілігін және семинарда ашық сабақ, шебер, тәжірибеліксабақ көрсететін мұғалімдерге сәттілік тіледі.
Бағдарлама бойынша теориялық бөлімде «Қосымша білім беру жүйесінде мектептен тыс ұйымдардың оқу-тәрбие үдерісіне қатысты мемлекеттік әдістемелік және нормативтік құжаттары туралы» баяндама оқылды.
Семинар барысында келген қонақтарға үйірме тәрбиеленушілерінің арнайы дайындаған «Өнерге қанат қаққандар» атты балалар шығармашылық концерті көрсетілді. Концерт облыстық «Ақ шағала» би байқауының жүлдегерлері «Жас бишілер» тобының әсем биімен ашылып, аудандық «Жас Ұлан жұлдызы!» ән байқауының жеңімпазы «Жас қанат» квартетінің бірнеше әндерімен, «Домбырашылар» ансамблінің күйімен, облыстық көркем сөз оқуларының шеберлері Дильназ Төлен мен Алина Тоқтардың өлең оқуымен жалғасты. Концертті мекеменің өнерлі оқушысы Ажихан Жұлдыз жүргізе отырып, орталықтың «Іңкәр сән» үйірмесінің жетекшісі Азата Ырғалбекованың, үйірме тәрбиеленушілерінің қолынан шыққан ұлттық нақыштағы сән үлгілерінің топтамасымен таныстырылым жасады.
Практикалық бөлімде «Іңкәр сән» үйірмесінің жетекшісі А.Ырғалбекова «Тігіссіз пішу арқылы жасалатын жамылғы», «Бояулар әлемі» үйірмесінің жетекшісі Г.Нұрпаш «Тоқыма өнері арқылы сәндік брошь және шаш қыстырғыш», «Сәулет және дизайн» үйірмесінің жетекшісі Ұ.Мамырбаева «Балауыз арқылы коллаж, декоративті кішігірім кілт ілгіш», «Киімді құрастыру және үлгілеу» үйірмесінің жетекшісі Н.Шыныбекова «Ши тоқу және орау», «Домбыра» үйірмесінің жетекшісі Г.Айымбекова Нұрғиса Тілендиевтің «Құстар әні» шығармасын ансамбльмен орындау тақырыбындағы шебер сыныптарымен бөліссе, «Жас физик» үйірмесінің жетекшісі А.Тойланова «Тоқтың жұмысы мен қуаты», «Шебер қолдар» үйірмесінің жетекшісі С.Юсупов «Pencil 2d» бағдарламасы мен мультфильм қозғалысын көрсету», «Жас талант» үйірмесінің жетекшісі Н.Джуманова «Сәндік аппликация» тақырыбындағы тәжірибелік сабақтарын көрсетіп, іс- тәжірибелерімен бөлісті.
Келген қонақтардың көңіл-күйін сергіту мақсатында мекеме психологы С.Жабанова танымды тренинг ұйымдастырды. Семинардың қорытынды бөлімінде кері байланыс (рефлекция) парағы таратылып, қатысушылар семинардан алған әсерлері, алған ақпараттары, көрген сабақтары туралы өз пікірлерін білдірді.
Семинарды аудандық білім бөлімінің бас маманы А.Базарқұлова қорытындылап, семинардың өте жоғары деңгейде ұйымдастырылғанын, сабақтардың көңілінен шыққанын айта келе, «QR код» және «Kahoot», «Pencil 2d» бағдарламасы мен мультфильм қозғалысы әдістері ұнағандығын айтып, осындай семинар жиі және облыс көлемінде ұйымдастырылса деген ұсынысын білдірді.
Г.Сейтбаева,
аудандық балалар мен жасөспірімдер орталығы
директорының оқу-тәрбие ісі жөніндегі орынбасары.