50 мыңға жуық жамбылдық жұмыспен қамтудың белсенді шараларына тартылады

346 Views

Жамбыл облысының әкімі Нұржан Нұржігітовтің төрағалығымен өткен аппараттық кеңесте халықпен кері байланысты нығайту, халықты жұмыспен қамту, «Мейірім» жобасын жүзеге асыруға қатысты бірқатар мәселелер қаралды.
Облыс әкімінің кеңесшісі Нұрмұхаммед Ниязбеков әлеуметтік желіде көтерілген өзекті мәселелер туралы хабарласа, баспасөз қызметінің жетекшісі Данияр Асқарұлы мемлекеттік органдардың ресми сайттарының ақпарат-жаңалықтармен қамтылу деңгейіне жасалған талдау қорытындысын баяндады. Жамбыл облыстық «Бірыңғай диспетчерлік қызметінің» басшысы Бақкелді Тұрсынбек тұрғындардың өтініштеріне жауап беру барысы туралы айтты.
Аймақ басшысы Нұржан Нұржігі­тов көтерілген әрбір мәселе бойынша жауапты тұлғаларға нақты тапсырмалар жүктеді.
– «Халық үніне құлақ асатын мемле­кет» тұжырымдамасы – қо­ғам мен билік арасындағы диа­лог­тың, өзара іс-қимыл мен ынты­мақ­тастықтың негізі. Әр апта сайын біз мемлекеттік органдардың халықпен кері байланысын нығайту мәселелерін қарастырудамыз. Бірақ әлі күнге дейін жұмысты жүйелей алмай отырған аудандар мен басқармалар бар. «Жұмыс жасаймыз, қолға аламыз…» деген сылтаулар қабылданбайды. Құр­ғақ уәдемен емес, іспен көрсетіңіздер, – деді облыс әкімі.
Күн тәртібіндегі екінші мәселе бойын­ша жұмыспен қамтуды үйлес­тіру және әлеуметтік бағдарламалар басқармасының басшысы Еркін Келесов сөз алып, атқарылып жатқан жұмыстар, алдағы жоспар, өзекті мәсе­лелерге жан-жақты тоқталды. Оның айтуынша, биыл «Кәсіпкерлікті дамы­ту­дың 2025 жылға дейінгі Ұлттық жобасы» аясында халықты жұмыспен қамтуды арттыру мақсатында 7,5 млрд. теңге бөлінген. Ақылы қоғамдық жұмыстарға Ұлттық қордан 2,6 млрд.теңге қаралуда.
Ағымдағы жыл басынан бері жұмыс­­пен қамтудың белсенді шара­ларымен 15741 адам қамтылды. Жыл соңына дейін 49500 жамбылдық қамтылатын болады. Осы жылдың 1 маусымындағы жағдай бойынша 7438 отбасына (38 871 адам) АӘК тағайындалған. Өткен жылмен салыстырғанда АӘК алушылар саны 23,2 пайызға азайған. Мемлекет басшысының тапсырмасы бойынша «Отбасының цифрлық картасын» құру жұмыстары жүзеге асуда. Бұл жоба – балалары бар, табысы жоқ, көпбалалы отбасы, мүгедек, асыраушысынан айырылған тағы басқа санаттағы адамдардың деректерін, әлеуметтік төлемдер мен жәрдемақылар алмау себептерін анықтау бойынша қайта тексеруді жүзеге асыру, олардың деректерін осы жүйеге енгізуді көздейді.
Нұржан Нұржігітов тиісті салалық басқарма мен бірқатар аудан әкімдіктерінің осы саладағы жұмыстарын сынға алды.
– Басқарманың нақты жоспары жоқ. Әрбір бағыт бойынша нақты іс-қимыл жоспары әзірленуі тиіс. Ал ол үшін ағымдағы жағдайға терең талдау жүргізу қажет. Аудан, ауыл әкімдіктерінің де бұған барынша атсалысуы маңызды. Ешкімде нақты ақпарат жоқ. Кімнен сұрасаң да «Жұмыс істейміз, шара қабылдаймыз» деген бір ғана жауапты аламыз. Халықты нәтижелі жұмыспен қамту – біздің басты міндеттеріміздің бірі, – деді Нұржан Нұржігітов.
Аймақ басшысы тиісті басқармаға Тараз қаласы, аудан әкімдіктерімен бірлесе отырып, жаңа тұрақты жұмыс орындарын ашу, жастарды жұмыспен қамтудың белсенді шараларын жүргізу, әлеуметтік қызметтердің қолже­тімділігін арттыру бойынша шаралар қабыл­дауды тапсырды.
Жиында ата-анасының қамқор­лығын­сыз қалған балаларды әлеу­мет­тік қолдау мақсатындағы «Мейі­рім» жобасының орындалу бары­сы да тал­қы­ланды. Жоба аясында барлығы 1334 бала қамтылды. Олардың есеп­шотына 36 миллион теңгеден астам қаржы аударылған.
Жамбыл облысы әкімінің баспасөз қызметі.

Поделиться ссылкой: