Балуан Нұрданат

Құланнан шыққан Ислам Байрамуков, Ақжүрек Таңатаровтың есімі елге белгілі. Екеуі де еркін күрестен Олимпиада ойындарының жүлдегерлері. Ислам – Сиднейде күміс, Ақжүрек – Лондонда қола медальға ие болды. Бұны ел ұмытқан жоқ, ұмытпайды да. Өйткені, ол – тарих.
Қазір Ислам да, Ақжүрек те спорттың басы-қасында жүргенімен, әлдеқашан спорттағы карьерасын аяқтаған. Құланнан шыққан тағы бір апайтөс балуан Әділет Дауланбаевтың да есімі мұқым қазаққа таныс. Ол талай байрақты додада ел намысын абыроймен қорғаған, қорғап та жүр. Оның күресін экраннан көрдік жақында. Яғни, «Болат Тұрлыханов кубогі» рейтингтік турнирінде. Жасы отыздан асса да Әділет әлі бабында екен. Еркін күресте атой салып жүрген тағы бір жерлесіміз Әлішер Ерғалиды біз жазбай-ақ сіздер біліп отырсыздар.
Әлішер тіпті Токиоға барды. Нашар белдескен жоқ. Барын салды. Бірақ, болмады. Дегенмен, Әлішердің болашағы жарқын екенін біз біле­міз. Қазіргі таңда алдыңғы толқын ағалардың жолын қуып, тағы бір жасөс­кін жігіт жетіліп келе жатыр. Оның есім-сойы – Нұрданат Айтанов.
Жақында Қырғызстан астанасы Бішкек қаласында өткен жасөспірім­дер арасындағы Азия чемпионатын­­да Нұрданат жеңімпаз атанды. Яғни, тұғырдың ең биік сатысынан көрініп, Көк байрағымызды Көкте жел­бі­рет­ті. Нұрданат былтыр Венгрия елінде өткен әлем біріншілігінде қола медаль иеленген болатын. Оны біз газетке жаздық та. Тізбектей берсек, Нұрданатта жетістік көп. Ол еркін күрестен жасөспірімдер арасында ел чемпионы. Биыл Түркияның Анталия қаласында өткен «WIKTORIA CUP» халықара­лық турнирінде де жеңімпаз болды. Дәл қазіргі сәтте Нұрданат Айтанов облыстық мамандандырылған спорттағы дарынды балалар мек­теп-интернатында оқиды. Сонда шеберлігін шыңдап жатыр. Ол – «Спорт шеберіне үміткер». Негізі­нен, жас балуанның алғашқы бап­кері – Асхат Телекеев. Яғни, Нұрданатқа күрестің қыр-сырын алғаш үйрет­кен бапкер – Асекең.
Жуырда Нұрданат туған жерге келді. Жас өренді аудандық денешынықтыру және спорт бө­лімінің басшысы Ерлік Шабеев, №25 балалар мен жасөспірімдер спорт мектебінің директоры Асхат Жаманбаев қарсы алып, сый-құрмет көрсетті. Ерлік Тоғанбайұлы мен Асхат Тұрсынханұлы қазіргі таңда бұқаралық спортты да­мытуға мемлекет тарапынан қолдау көп екенін тілге тиек етіп, Нұрданат Айтановты жеңісімен құттықтады. Салтанатты іс-шара соңында жас балуанға Ерлік Өскенбаевтың демеушілігімен сыйға тай берілді.

Марат Жолдасбекұлы.

Поделиться ссылкой: