Ерсің сен, ЕРСЕН!

Спортта жанкешті еңбек етпесең, жетістікке жете алмайсың. Осы мысалды талай мықты спортшылардан сұхбат алып, сан мәрте естідік. «Қаншама әділетсіздікке ұшырасаң да, спортты тастамау керек» дейді солардың көбісі. Ерсен Станбек те сол қатардағы спортшы.
Ерсен туралы газетке көптеген мақа­лалар жаздық. Менің таңқа­ла­тыным, ол – бесаспап спортшы. Жасы небәрі – 18-де. Ал енді жет­кен жетістігін санасаңыз, бас шай­қауы­ңыз­ға тура келеді. Айталық, әуелі мүмкіндігі шектеулі жасөспірімдер арасында Ерсен өзінің бағын үстел теннисінен сы­нап көрді. Бұл спортпен ол жай ғана айналысқан жоқ. Алдына мақсат қой­ды. Және сол мақсатқа жетті де. Жасөс­пірімдер арасында Қазақстан чемпионы болды.Одан соң, Ерсен суда жүзу спортына да ден қойды. Жүзуден Қазақстан чемпионы болмаса да, жүл­делі ІІІ орын иеленді.
Содан соң, жас өреннің назары армрест­лингке ауды. Армрестлингтен, яғни қол күресінен Ерсеннің бағын­дыр­ған белесін біз былтыр газетімізде жазған­быз. Көкдөнен ауылында дүниеге келген қайсар жігіт былтыр Швеция елінің ас­та­на­сы Стокгольмде өткен әлем чемпио­натында көпшілікті таңқалдырды. Ол 55 келі дәрежесінде әлем чемпионы атанды. Сондай-ақ, Ерсеннің қол күресінен Азияның үш дүркін чемпионы деген дардай атағы бар. Оған «Халықаралық дәрежедегі спорт шебері» деген атақты тағы қосыңыз. Ал үстел теннисінен Ерсен Станбек – «Спорт шеберлігіне үміткер».
Ерсеннің өмірге деген құштарлығы ерекше. Сан мәрте ота жасатса да, тегеурінді төзімнің арқасында соның бәрін жеңе білді. Біз жақында Ерсенмен әңгіме­лестік. Басқа спортқа ауысыпты. Ол – пауэрлифтинг. Бұл спорттан да айтарлықтай нәтиже көрсетіпті. Наурыз айында Қазақстан чемпио­натында топ жарған да екен. Ерсен осы жарыста чемпион болып, пауэрлифтингтен Біріккен Араб Әмірліктерінің Дубай қаласында өтетін әлем чемпионатына қатысуға жолдама еншілеген екен. Аталмыш жарыс тамыз айының 14-і мен 30-ы аралығында өтетін көрінеді. Ерсеннің еңбекқорлығын біз жақсы білсек керек-ті. Бағанадан бері жазғанымызда сол ғой. Қайткенмен де Ерсен өз-өзін қамшылап келе жатқан спортшы.
Оның «бай-бағлан» көкесі де жоқ. Әкесі өмірден озып кеткен. Анасы да қарапайым азаматша. Ерсен біздің ауданымыздың мақтанышы.
Чемпион болып, ауданның мерейін талай рет аспандатты ол. Былтыр Стокгольмнен оралғанда ауылдастары оған ат мінгізді.
– Мен алдыма мақсат қойдым. Және мақсатыма жетпей қоймаймын. Бекзат Саттарханов ағамыз 3 рет Олимпиада чемпионы болуды армандаған екен. Ол арманына жете алмады. Мына біз секілді жас спортшыларға осы сөз ой салу керек. Пауэрлифтинг – олимпиадалық спорт түріне жатады. Өзіңіз білесіз Марат аға, мен үстел теннисінен де, жүзуден де, қол күресінен де бағымды сынап көрдім. Көптеген белестерді бағындырдым. Енді пауэрлифтингке бет бұрдым. Бұйыртса, бұл спортта да биік шыңдарды бағындырамын деп ойлаймын. Өздеріңіз секілді тілеулес, ниеттес ағалардың жылы сөздері маған үлкен қолдау. Олимпиада төрінде елімнің Көк Туын көкте желбіретсем деген арманым бар, – дейді жас спортшы.
Ерсенге сеніңіздер! Ол – мықты спортшы. Уәдесін екі етпейді.
Дубайда өтетін әлем чемпионатында ол елдің абыройын асқақтатып қайтатынына бек сенімдіміз.

Марат Жолдасбекұлы.

Поделиться ссылкой: