Жамбыл облысында аудан әкімдерінің сайлауы өтеді

61 Views

Қанатқақты жобаға алғашқы болып Тұрар Рысқұлов және Жуалы аудандары қатысады

Аймақ басшысы Ербол Қарашөкеевтің қатысуымен өткен облыстық мәслихаттың кезектен тыс алтыншы сессиясында аудан және облыстық маңызы бар қала әкімдерін сайлау мәселесі қаралды. Мәслихат депутаттары сайлауға қатысатын аудандар мен саяси науқанның күнін белгіледі.
Сессия отырысына қатысқан облыс әкімі Ербол Қарашөкеев күн тәртібіндегі мәселенің өңіріміздің өркендеуі үшін маңызы зор екендігіне жан-жақты тоқталып, алдағы саяси науқанға дайындықты күшейту керектігін ескертті.         

– Мемлекет басшысы биылғы Жолдауында аудан және облыстық маңызы бар қала әкімдерін сайлау басталатындығы туралы айтып кетті. Бүгінгі сессияда сіздермен Президенттің осы саяси реформасын іске асырудың алғашқы қадамын жасамақпыз. Өңірде 121 аудандық маңызы бар қала, ауыл әкімдерінің сайлауы өтті. Жергілікті атқарушы органдары мен сайлау комиссиялары сайлау өткізуде мол тәжірибе жинады. Менің ойымша аудандық, облыстық маңызы бар қалалардың сайлауына толықтай дайынбыз, – деді Ербол Қарашөкеев.
Мұнан соң облыстық мәслихат депутаттары Мейрамбек Дөненбаев қанатқақты жоба бойынша Тұрар Рысқұлов ауданы әкімінің сайлауын, ал Керімқұл Бегалиев Жуалы ауданы әкімінің сайлауын ұсынды. Аталған аудандар бойынша ұсыныс бір ауыздан мақұлданды. Ал облыстық мәслихат депутаты Дауыл Бейсенқұлов алдағы жылыту маусымына дайындық секілді маңызды шараларды ескере келе, сайлау күнін 5-ші қарашаға белгілеуді ұсынды. Айтуынша, апта соңына түсетін бұл күн саяси науқанды ұйымдастыруға қолайлы. Сессия соңында аталған мәселелер мен ұсыныстар бойынша шешім жобасы қабылданып, облыс әкімі алдағы саяси кезеңге сәттілік тіледі.

Жамбыл облысы әкімінің баспасөз қызметі.

Поделиться ссылкой: