«БОЛТАЙ ҰЛАНДАРЫ» КОМАНДАСЫ ЖЕҢІМПАЗ ДЕП ТАНЫЛДЫ
157 Views
Қазіргі таңда елімізде рейтингісі өте жоғары бағдарламалардың бірі – «Жайдарман» ойындары екеніне ешкім дау айта қоймас. Жастар көп көретін веб-сериалдардың да сценариін жайдарманшылар жазады. Сондықтан да қазіргі күні жастарымыздың «Жайдарман» ойындарына деген құрметі ерекше. Оны жақында аудандық Мэлс Өзбеков атындағы аудандық мәдениет үйінде өткен «Жайдарман» ойынының ақтық кезеңінен де байқадық.
Жалпы, ауданымызда «Жайдарманға» деген ықыластың ерекше екенін жаздық. Қайбір жылдары тіпті, ауданымыздың жас жайдарманшылары облыс, республикалық сайыстарда атой салғаны бар. Оны біз газетке де жазғанбыз. Атқарушы биліктен қолдау болса, жас жайдарманшыларымыздың талабы зор негізі. Осыны түсінетін шенеунік болса, тіпті қатып кетер еді.
Ауданда «Жайдарман» ойындары жыл сайын өтеді. Оны ұйымдастырып жүрген аудандық «Жастар ресурстық орталығы» коммуналдық мемлекеттік мекемесінің қызметкерлері. Олардың да көксегені – біреу. Аудан жастары «Бос уақытын тиімді пайдаланып, шығармашылықпен айналысса» деген ой ғана мекеме қызметкерлерінің бар ойлағаны. Тегінде, ол – дұрыс. Сондықтан оған қолдау көрсету керек. Біз ойын басталмай тұрып, аудандық «Жастар ресурстық орталығы» КММ директорының орынбасары Әбіләшім Мырқасымовтан блиц-сауал алған едік. Оның жауабы төмендегідей болды.
«Бүгін міне, ақтық кезеңге де таядық. Маусымашар ойындарынан бастап көрген болсаңыз, көптеген қызықты әзілдер болғанын байқадыңыз деп ойлаймын. «Жайдарман» өткізудегі басты мақсатымыз – тек арзан күлкі емес. Басты мақсатымыз – аймақта жастар саясатын жүзеге асырып, қазақ тілінің қолдану аясын кеңейту. Жастарымыздың бір-бірімен достық қарым-қатынасын нығайту. Біз әрқашан талабы зор жастарды қолдауға әзірміз» деп жауап қайырды.
Сонымен Мэлс Өзбеков атындағы аудандық мәдениет үйінде өткен «Жайдарман» ойынының ақтық кезеңінде 6 команда өнер көрсетті. Олар: «Ауылдың қара домалақтары», «Болтай ұландары», «Бөкейхан лидерс», «Қанағат», «Он бір мысық, бір пысық» және «Гугл» командалары. Сайыс 2 кезең бойынша өрбіді. Алғашқы кезең әдеттегідей «Сәлемдесу», екінші кезең «Үй тапсырмасы». «Үй тапсырмасының» тақырыбы – «Біз бақытты жастармыз!» деп аталды. Не керек, ақтық кезең өте тартысқа толы болды. Қағытпа әзіл де айтылып жатты. Ең бастысы, залға «өз еркімен келетін» жастардың қарасы көп. Соған қатты қуанасың.
Тартысқа толы өткен «Жайдарман» ойынының қорытынды кезеңінде қазылар алқасының шешімімен жүлделі үшінші орынды Райымбек Смайлов атындағы орта мектептің «Ауылдың қара домалақтары» командасы еншілесе, жүлделі екінші орын Әлихан Бөкейханов атындағы орта мектептің «Бөкейхан лидерс» командасына бұйырды. Ал жүлделі бірінші орынды Болтай батыр атындағы орта мектептің «Болтай ұландары» командасы жеңіп алды. Сайыс соңында жүлдегер әрі жеңімпаз атанған командаларға арнайы дипломмен қоса, бағалы сыйлықтар табыс етілді.
Марат Диханбай.