Кітап – сөзбен өрілген шексіз әлем

Бүгінгі таңда кітап – білім мен ру­ха­ният­тың сарқылмас қайнары. ал оны сыйға тарту – адамзатқа ортақ мә­дени мұраны сақтауға және та­ра­ту­ға қосылған зор үлес. Жуырда, яғни 14 ақпан – Халықаралық кітап сыйлау күніне орай аудандық кітапханада «Кітап – сөзбен өрілген шексіз әлем» атты bookstory өтті.
Осы орайда аудандық кітапханаға көптеген кітап жанашырлары мен оқырмандар құнды кітаптарды тарту етті.
Атап айтқанда, аудандық ардагерлер Кеңесінің төрағасы Қожайхан Қазыбайұлы, аудандық билер кеңесінің төрағасы Тұрсынхан Есімқұлұлы, аудан әкімінің баспасөз хатшысы Нұрболат Аманжол және кітапхана оқырманы Күләйша Исаева өз тараптарынан кітапхана қорына құнды еңбектерді сыйға тартты.
Іс-шара барысында кітаптар ту­ра­лы қызықты деректер айтылып, «Кітап арқылы ашылған сырлы әлем» атты кітап көрмесіне шолу жа­салса, кітапхана оқырмандары жыр шумақ­та­рын оқып, көрермендермен қызықты ойын ойнатылды.
Бұл игі бастама кітапхана оқырман­дары үшін үлкен маңызға ие. Себебі жаңа кітаптар білімге құштар жандар­дың таным көкжиегін кеңейтіп, олар­дың ізденісіне жол ашады. Бүгінде Тұрар Рысқұлов аудандық кітапханасы – тек кітап қоры­ның сақтаушысы ғана емес, соны­мен қатар білім мен мәдениеттің орда­сына айналып отыр.
Осы күнгі шара – кітапқұмар қауым­ның бір-біріне рухани сый жасайтын ерекше мерекесі. Кітапханамызға тарту етілген әрбір кітап жас ұрпақтың білімін тереңдетуге, ой-өрісін кеңейтуге, болашаққа жарқын қадам жасауына септігін тигізері сөзсіз.
Осындай игі іске атсалысқан барлық азаматтарға кітапхана атынан зор ал­ғыс білдіреміз. Кітап оқу – ойды кемел­дендіріп, сананы жаңғыртады. Сон­дық­тан әрдайым білімнің шамшырағы сөн­бесін.

А. Искакова,
аудандық орталық кітапхананың кітапханашысы.

Поделиться ссылкой: