Қайыңды ауылдық округінің әкімі лауазымына үміткер Біржан Ноянұлы Жамбаевтың өмірбаяны мен сайлауалды бағдарламасы

65 Views

Өмірбаяны
Біржан Ноянұлы Жамбаев 1985 жылдың 19 қазанында Тереңөзек ауылында дүниеге келген. Тараз қала­сындағы М.Х.Дулати атындағы Тараз мемлекеттік университетін «Тоқыма және жеңіл өнеркәсіп авто­маттары мен машиналарын құрастыру және оның сервисі» мамандығы бойынша бітірген. Білімі – жоғары.
Еңбек жолын 2011 жылы Халыққа қызмет көрсету орталығының Тұрар Рысқұлов аудандық филиалында инспектор болып бастаған. 2011-2012 жылдары Халыққа қызмет көрсету орталығының Тұрар Рысқұлов аудан­дық филиалында инспектор болып жұмыс жасаған. 2015-2019 жылдар аралығында Тереңөзек ауылдық округі әкімі аппаратының жетекші маманы болып еңбек еткен. 2019 жылдан қазіргі уақытқа дейін Тереңөзек ауылдық округі әкімі аппаратының бас маманы болып абыроймен қызмет атқарып келеді.
Отбасылы. 4 бала тәрбиелеп, өсіріп отыр.
Сайлауалды бағдарламасы
Құрметті Қайыңды ауылдық окру­гінің тұрғындары, қадірлі сайлаушылар! Қайыңды ауылдық округі бірлігі мен тірлігі жарасқан ауылдық округтің бірі. Қайыңды ауылдық округі ауданнан шалғай жатқан ауылдық округ болса да, кейінгі жылдары бұл ауылдық округте көптеген тірліктер атқарылып жатыр. Қайыңды ауылдық округіне қарасты Сөгеті және Мамай ауылдарының тұрғындары көптен күткен сапалы ауыз суды тұтынуға да жақын қалды. Былтырдан бері бұл елді мекендерге жаңа су іркуіш имараты салынып, ауылішілік көшелерге тұтастай дерлік ауыз су құбырлары жүргізілуде.
Қадірлі ауыл тұрғындары! Менің мемлекеттік қызметте еңбек етіп келе жатқаныма биыл – 10 жыл болды. Осы жылдар ішінде көп тәжірибе жинадым десем болады. Мемлекеттік қызметте жұмыс жасап жүріп, көпшіліктің пікі­ріне әрқашан құлақ асуды үйрендім. Мені қолдасаңыздар, өзімнің алға қой­ған мақсат-мүддемді ауылдық округ­тің игілігі үшін іске асырар едім. Егер­де Қайыңды ауылдық округінің әкі­мі лауазымына сайланатым болсам, алды­мен ел Президентінің мемлекеттің мүддесі үшін жасап жатқан негізгі реформаларын, ҚР Үкіметінің, облыс әкімінің, аудан әкімінің тиісті жұмыс жоспарын халыққа кеңінен түсіндіріп, қолымнан келетін бар мүмкіндікті ауыл тұрғындарының кәдесіне жаратар едім. Жаңа сөз басында да атап өттім ғой. Қайыңды ауылдық округінде бірқатар ауқымды жұмыстар атқарылды. Алда әлі де атқарылар жұмыс аз емес деп ойлаймын. Мен өзімнің сайлауалды бағдарламамда мына жайттарға басым­дық бергенді құп көрдім. Алды­мен ауылдық округ әкімінің құзіре­тін пайдалана отырып, округ тұрғындарының жағдайын дамыту бағытында тұрақты жұмыс атқарсам деймін. Одан кейін уақыт талабына сай жергілікті өзін-өзі басқаруды дамыту бағытында жұмыс жасап, жергілікті қауымдастық, ардагерлер кеңесі, отбасы және әйелдер ісі кеңесі сияқты қоғамдық ұйымдардың жұмысын дамыта отырып, мемлекеттік басқарудан халықтық басқаруға қол жеткізу. Жергілікті жерде қоғамдық бақылауды енгізу арқылы ауылдағы ахуалға ауыл тұрғындарының ықпалын арттыруға қол жеткізу, сондай-ақ, төменгі пайызды несиелер арқылы шағын және орта кәсіпкерлікті дамыту. Мектеп жасындағы және мектепке де­­йінгі балалардың тәрбиесіне мән бере отырып, олардың жазғы де­малы­­сын ұйымдастыру, ауыл тұр­ғын­дарына әлеуметтік көмек көр­се­ту жұмыстарын қадағалау, аз қам­тылған отбасылардың, қарттар мен мүгедектердің тұрмыс жағдайларын тұрақты түрде назарда ұстап, мұқтаж жандарға көмекті ұйымдастыру, ауыл мәдениетінің дамуына, абаттандыру мен көгалдандыру жұмыстарын тұрақ­ты түрде жүргізу – менің жұмыс жоспарымның басты бағыттарының бірі болмақ.
18 мамырда сіздер маған дауыс береді деген үміттемін.

Поделиться ссылкой: