Сот көп балалы әкеге төлем қабілеттілігін қалпына келтіру арқылы несие жүктемесін азайтуға көмектесті

Азамат Тұрар Рысқұлов ауданы­ның сотына сот арқылы төлем қабілеттілігін қалпына келтіру туралы арызбен жүгінді.
Сот өтініш берушінің кредиторлар – бес банк алдында ақшалай міндет­те­ме­лері бар екенін анықтады. Берешектің жалпы сомасы 12,5 млн теңгені құрады.
Сотта өтініш беруші Т. несиелер бойынша қарыздарын төлеуге мүм­кін­дігі жоқ, бірақ тұрақты табысы бар, асырауында кәмелетке толмаған 2 баласы, емделуге қомақты қаражат жұм­салған III топтағы мүгедек әкесі, жүкті және декреттік демалыстағы жұбайы бар екенін түсіндірді. Үлкен несиелік жүктемеге байланысты сот­тан ай сайынғы төлем сомасын азайта отырып, 60 ай ішінде банктер алдындағы берешек сомасын төлеуге мүм­кіндік беруді сұрады.
Сот 393 мың теңге мөлшеріндегі кре­диттер бойынша ай сайынғы төлем­дердің мөлшері азамат Т.-ның ай сайынғы табысынан асып түсетінін анықтады.
Бес кредитордың төртеуі соттан арызды қанағаттандырудан бас тартуды сұрады. Салық органының өкілі шешімді соттың қарауына қалдырды.
«Азаматтардың төлем қабілеттілігін қалпына келтіру және банкроттық туралы» ҚР Заңына сәйкес, төлем қабілеттілігін қалпына келтіру жоспа­рын орындау мерзімі 5 жылдан аспауға тиіс.
Жоғарыда айтылғандардың негізінде сот Т.-ның өтінішін қанағаттандырды және төлем қабілеттілігін қалпына кел­тіру процедурасын қолданды. Кре­ди­торлар алдындағы 12,5 млн теңге мөлшеріндегі берешек сомасы төлем қабілеттілігін қалпына келтіру жос­парына сәйкес, ай сайын 60 ай ішінде 204 мың теңге мөлшерінде төленетін болады.
Сондай-ақ, сот шешім заңды күшіне енген күннен бастап 2 айдан кешік­тірілмейтін мерзімде төлем қабілет­тілігін қалпына келтіру жоспарын ұсынуды міндеттеді.
Шешім заңды күшіне енді.

«Құлан таңы» ақпарат.

Поделиться ссылкой: