ХАЛЫҚ ӨЗ ТАҢДАУЫН ЖАСАДЫ

Кезектен тыс Президент сайлауы өз мәресіне жетті. Халық өз таңдауын жасады. Бұл біздің қазақстандықтар үшін отыз жылдан кейінгі демокра­тия­лық таңдаудың жемісі дер едім. Сайлауға  көппартиялы  топтар қатыс­қандықтан болар тартысты өтті. Өйт­кені бұл топтың ішінде оппозиция өкілдері де болды ғой. Біз барлық президент­тікке кандидаттардың өмір­баянымен және сайлауалды бағ­дар­ла­маларымен жете танысуға мүм­кіндік алдық. Халық ішінде Ә.Қосанов­ты қолдаушылар да болды. Сайлау қо­ры­­тындысы бойынша оған сайлау­шы­лардың он бес пайыздан астамы дауыс бергенін кейін білдік. Бұл да де­мократияның жемісі деу керек.

Мен өзім зейнеттегі адаммын. Қасым-Жомарт Тоқаев басқарып отыр­ған Үкімет зейнеткерлер мен көп ба­лалы отбасына көп жәрдемін тигізді. Бюджеттік мекемелердегі табысы тө­мен қызметшілердің де жалақысын кө­тер­ді. Оның үстіне бұған дейін еліміз­де тұрақтылық сақталып келгенін Елбасы Н.Ә.Назарбаевтың еңбегі дер едім. Ал, Тоқаев болса кемеңгер сая­сат­кер әрі «Нұр Отан» партиясының біл­гір көшбасшысының бастаған ісін одан әрі қарай жалғастырып келе жатқан бірден бір адам болатын. Сон­дықтан да біз өз отбасымызбен түгел­дей дерлік Қ.Тоқаевқа дауыс бердік. Айтайын дегенім, Президент Қасым Жомарт Тоқаевтың елді басқарып отыр­­ған кезінде мен ұлттық «Мерейлі отбасы» байқауының екінші кезеңінде бас жүлдеге ие болдым. Бұл байқау ме­нің отбасыма үлкен қуаныш әкелді. Мен бүгінгі Үкіметтің жүргізіп отыр­ған саясатын қолдаймын. Тоқаев ел басқаруға нағыз лайықты кандидат болатын. Ол кісі еліміздің ішкі және сыртқы саясатын терең меңгерген бі­лім­ді де білікті адам. Сондықтан мен оған сенемін. Оның алдағы уақытта да еліміздің халқының әл-ауқатын кө­теруге көп жұмсайды деп ойлаймын.

Бекқұлы Әлі, Республикалық ұлттық «Мерейлі отбасы» облыстық байқауының жеңімпазы, ауданның Құрметті азаматы, тарихшы-өлкетанушы, зейнеткер.

Поделиться ссылкой: