Мәдениет пен өнер – ұлт тұтастығының қайнар көзі

807 Views

Бұған дейін аудан әкімі Ерболат Садырқұлов аудандық орталық ауру­ха­на, білім қызметкерлері және аудан кәсіп­керлерімен кездесіп, олармен ер­кін форматта пікір алмасқан еді. Өткен жұ­мада Ерболат Салқынбекұлы аудан әкімдігінің үлкен мәжіліс залында мә­де­­ниет саласының қызметкерлерімен кез­­десіп, ауданымыздың мәдени рухани да­муы­на өлшеусіз үлес қосып жүрген атал­мыш сала өкілдерінің әлеуметтік жағ­дайын нысанаға алып, саралап көрді.

Кездесуде аудан әкімдігі мәдениет жә­не тілдерді дамыту бөлімінің басшы­сы Нұрдәулет Жамалбеков баяндама жасап, ағымдағы жылдың 5 айында атқарылған ілкімді іс-шаралардың мә­ні мен мазмұнына тоқталды.

Нұрдәулет Сүйерханұлы өз баянда­масында «Аудан  халқының рухани та­лап тілегін қанағаттандыру жолында бүгін­­гі таңда 54 мәдениет нысандары жұ­мыс атқаруда. Ауылдық мәдениет үйлері, ауылдық клубтар және кітапханалар. Қазіргі таңда аудандық мәдениет үйі жанында 50 үйірме, 10 әуесқой клуб, «Тамаша» ойын сауық отауы, 5 халықтық атағы бар өнер ұжымдары жә­не 4 этно-мәдени бірлестіктер (қа­зақ, өзбек, орыс, қарашай) халыққа қызмет көрсетіп келеді. 2019 жылдың 5 айында 441 іс-шара өткізіліп, көрермен саны 40 мыңнан асты. Ұйымдастырыл­ған шаралардың барлығы аудандық басылымнан бөлек әлеуметтік желілер­де де жарияланып отырды» дей келе, мәдениет саласындағы шешімін табу­ды қажет ететін мәселелерді сөз етті. Са­ла басшысының сөзінен ұққанымыз, өт­кен жылдан бастап ауылдық мәдениет үйлерінің ауылдық округ әкімдіктері­нің балансына берілуіне байланысты қабылданған шешімдер көптеген сыни пікір туғызған екен. Бұл – бір. Екіншіден, 5 елдімекен қарайтын үлкен ауылдық округтердің бірі Өрнекте мәдени нысан жоқ. Үшіншіден, Сөгеті, Көкарық ауылдық клубтарына, соны­мен қатар, Байтелі, Жақсылық, Қазақ ауылдық кітапханаларына ағымды жөн­деу жұмыстарын жүргізу қажеттігі туын­дап отырған көрінеді.

Кездесуде Жаңатұрмыс пен Көгершін ауылдарындағы мәдениет үйле­­рі­­нің мәселесі де нысанаға ілік­кен тақырыптардың бірі болды. Аны­ғында баяндамашының сөзінен кейін аудан әкімі Ерболат Садырқұлов «Сіздер­де қандай сұрақ бар?» дегенде, Көгершін ауылдық мәдениет үйінің меңгерушісі Данагүл Бодауова зама­нында атағы алысқа тараған ауылда­ғы мәдени нысанның әбден тозығы жеткенін айтып, сауал қойды. Данагүл Бодауованың бұл сұрағына аудан басшысы Ерболат Салқынбекұлы атал­мыш мәдениет үйінің іргетасы бе­рік қаланғанын сөз етіп, жобалық сме­талық құжаттары дайын екенін жеткізді. Және келесі жылы бұл мәсе­ле өз шешімін табатынына сенім біл­дір­ді. Басқар Битанов атындағы халық­тық театрдың көркемдік жетекшісі Эльмира Асылбекова «кең сарайдай» болмаса да, шағын бөлменің жоқтығы ауданымыздағы этно-мәдени бірлестік өкілдеріне өз кедергісін келтіріп отыр­ғанын айтады. Бұл сауалға Ерболат Салқынбекұлы еліміздегі ұлт тұтас­ты­ғын сөз ете отырып, жан-жақты мы­салдар арқылы мазмұнды жауап қайырды . Кездесу барысында бұдан өзге де мәселелер сөз болып, тиісті дең­гейде өз шешімдерін тауып жатты. 

 Марат Диханбай.

Поделиться ссылкой: