Жастар жұмыспен қамтылады

568 Views

«Білікті маман боламын» деген мақсатпен білім алып, бүгінде дипломға қол жеткізген жас мамандар сәрсенбінің сәтті күнінде аудан әкімдігінің «Халықты жұмыспен қамту орталығына» жиналды. Дәл осы күні орта­лықта бос жұмыс орындарының жәрмеңкесі өткен болатын. Сонымен қа­тар, жәрмеңкеге жастардан бөлек жұмысқа орналасуға ниет білдірген аудан­ның өзге де тұрғындары мен жұмыс беруші мекемелердің өкілдері қатысты.

Мамандығының қыр-сырын мық­тап меңгерген жастарға еңбек нары­ғында қашанда сұраныс көп. Алайда, оқуды жаңа аяқтаған студенттер жұ­мыс іздеу кезінде көптеген қиын­дықтарға тап болып, түрлі жағ­дай­ларға түсіп жатады. Олардың бірі тәжірибесінің жоқтығынан жұмысқа қабылданбай жатса, енді бірі меке­ме­лерде бос жұмыс орындарының бары­нан хабарсыз. Дегенмен, бүгінде мем­лекетіміздің ұстанған басты ба­ғыты – халықты жаппай жұмыспен қамту. Бұл – күн тәртібіндегі маңызды мәсе­лелердің бірі болып қала бермек.
Шара барысында халықты жұ­мыс­пен қамту және әлеуметтік бағ­дар­ламалар бөлімінің басшысы Бе­рік Шамаев сөз сөй­леп, жәрмеңкені ашып берді. «Жұмыс­сыз жүрген азаматтардың өз мамандықтары бойынша жұмысқа орналасуларына мүмкіндік туғызу үшін бос жұмыс орындарына жәрмеңке ұйым­дас­тырып отырмыз. Шындығын айту керек, маңызыды іс-ша­раға жастардың көптеп келіп қа­тысуы көңіл қуантады. Өйткені, «Жастар жылында» аталмыш буын өкілдеріне көптеген мүм­кіндіктер қарастырылған. Біз осы жігерлі жастар мен әлеуметтік жағынан аз қамтылған от­ба­сы­лардың мүшелерін бірінші ке­зекте жұмыспен қамтуға ты­рысатын боламыз. Бүгінгі жиынға қатысып отырған жұ­мыс берушілер өздерінің сұра­ныстарында жұмыс орын­дарының түрін, санын, оған қойы­латын біліктілік талаптары мен шарттарын көрсетіп отыр. Егер соның бәріне сай кел­сеңіздер, мекеме өкілдерімен жеке тілдесе аласыздар. Әңгімелесу арқылы көкейіңіздегі бар сауалға дәл осы жерде жауап алуға болады» — деп қатысушыларға сәттілік тіледі.
Оқуды жаңа аяқтаған жастарға және ауданның жұмыссыз жүрген тұрғындарына арналған іс-шараға ауданның 20-дан астам мекемесі қатысты. Олар жәрмеңкеде 52 тұрақты жұмыс орнын ұсынды. Бір байқағанымыз жәрмеңкеде ұстаздық мамандықтарға деген сұраныс көп. Мектеп директорлары көбіне ағыл­шын, география, орыс тілі және дене шы­нықтыру пән мұғалімдеріне маман іздеп келген. Сонымен қатар, медбике, көлік жүргізуші, психолог, спорт мектебіне бапкер, тәлімгер, тәрбиеші секілді басқа да жұмыс түрлеріне сұрау салынды.
Бос орындардың тізімі таныс­тырылғаннан кейін, жұмыс іздеушілер мен мекеме өкілдері жеке жолығып, өзара пікір алмасты. Солардың қата­рында Тараз мемлекеттік педа­го­ги­ка­лық университетін жуырда ғана аяқтаған Аяулым Тынышбек те бар. Аяулым аталмыш оқу ордасында «Мектепке дейінгі оқыту және тәр­бие­леу» мамандығы бойынша білім алған. Сапалы білімге сусындаған жас маманның ендігі арманы — аудан бала­бақшаларының бірінде тәрбиеші болып жұмыс атқару. «Дәл осындай фор­матта өткізілетін жәрмеңкелер жұмыссыз жүрген жандар үшін өте қолайлы. Әсіресе, бұрын соңды жұмыс істеп көрмеген, еңбек өтілі жоқ жастар үшін таптырмас мүмкіндік дер едім. Сол үшін де, ұйымдастырушыларға айтар алғысым шексіз. Қазір «Бала­пан» балабақшасының өкілімен же­ке тілдесіп көрдім. Әңгімелесу бары­сын­да еңбек шарттары мен маған қойы­латын талаптарды түсіндіріп берді. Аталған шарттар мен талаптар мені толықтай қанағаттандырады. Сон­дықтан, балабақша өкілі мені ер­теңге сұхбаттасуға шақырды» — деп қуа­ны­шымен бөлісті.
Жиын соңында өзге де қатысу­шы­лар жұмыс берушілермен жеке-жеке тілдесті.

Жәнібек БАЗЫЛБЕКОВ.

Поделиться ссылкой: