Мемлекеттік қызметкерлермен кездесті
701 Views
«Мемлекеттік қызметкердің статусы қай деңгейде?», «Азаматтармен қарым-қатынас жасаудың тәртібі қандай?», «Іскерлік киімнің үлгісі қандай болуы керек?» деген сан түрлі сауалдарға нақты жауап беру үшін өткен аптада Жамбыл облысы әкімінің әдеп жөніндегі уәкілі Мәди Мәтен және Қазақстан Республикасы Мемлекеттік қызмет істері жөніндегі және сыбайлас жемқорлыққа қарсы іс-қимыл Агенттігінің Жамбыл облысы бойынша департаментінің басқарма басшысы, әдеп жөніндегі уәкілі Азамат Ануарбеков ауданымызға арнайы іс-сапармен келді. Шара барысында аудандық мемлекеттік қызметкерлермен кездесіп, оларға қатысты ақпараттармен бөлісті.
Жиын барысында мінберге бірінші болып көтерілген аудан әкімінің орынбасары, әдеп жөніндегі уәкіл Руслан Оразхан ауданда атқарылып жатқан жұмыстар туралы баяндап, қысқаша хабарлама жасады. Одан соң ҚР Мемлекеттік қызмет істері жөніндегі және сыбайлас жемқорлыққа қарсы іс-қимыл Агенттігінің Жамбыл облысы бойынша департаментінің басқарма басшысы Азамат Ануарбеков мемлекеттік қызметкерлерге қатысты кодекстің мақсат-міндеттерін, оларға қойылатын талаптарды, мінез-құлықтың жалпы стандарттарын, қарым-қатынас нормаларын, іскерлік киімнің үлгісін, қызметтен тыс өзін-өзі ұстау тәртіптерін кеңінен әңгімелеп берді. 
Аталмыш нормалар жайында облыс әкімінің әдеп жөніндегі уәкілі Мәди Мәтен де ой бөлісіп, мемлекеттік қызметшілердің әдеп кодексі талаптарын қатаң түрде сақтау керектігін айтты. «Мемлекеттік қызметкерге қойылған талаптар өте қиын. Оларды орындау және қатаң түрде сақтау біздің тікелей міндетіміз. Жасыратын несі бар, сол бір кей талаптар өкінішке орай өз деңгейінде орындалмай жатады. Олардың көбісі қызметтен тыс уақытта орын алуда» деп бірнеше қойылатын талаптарға тоқталып өтті. Атап айтар болсақ, жұмыс барысынан тыс уақытта мемлекеттік көлікті пайдалану немесе оны мас күйінде басқару, әлеуметтік желіні жиі қолданушыларға сыпайы, нақты дәлелдермен жауап қайтару, той-томалақта өзін-өзін дұрыс ұстау, әлеуметтік желіні сапалы әрі дұрыс қолдану керектігін айтты. Мәди Мейірбекұлы тіпті телефонмен сөйлесу барысында да байыпты жауап қайтара білудің өзі аса маңызды екенін түсіндіріп, жиынды қорытындылады. Кездесу соңында мемлекеттік қызметшілерден сауалнама алынды.
Іс-сапар барысында әдеп жөніндегі уәкілдер аудан әкімдігінің үлкен мәжіліс залында жеке қабылдау өткізді. Қабылдау кезінде мемлекеттік қызметкерлер тарапынан қойылған сауалдарға нақты жауап қайтарылып, әр түрлі кеңестер берілді.
Жәнібек БАЗЫЛБЕКОВ.