Екі бірдей медпункт пайдалануға берілді

572 Views

Аудан орталығынан шалғай жатқан ауылдардың бірі – Қорағаты. Шыны керек, бүгінгі таңда бұл ауылдың келбеті жыл өткен сайын ажарланып, жаңару үстінде. Ауылда кез келген іс-шараны жоғары дең­гейде өткізуге лайық ауылдық клуб залы бар. Әкімшілік ғимараты да ауылдың сәнін келтіріп тұрған нысанның бірі. Бірнеше жыл бұрын мектепке де күрделі жөндеу жұмыстары жүргізіліп, оқушыларға барлық жағдай жасалды. Қорағатыдағы басты мәселе медициналық ғимарат еді. Биыл бұл мәселе де өз шешімін тапты. Талай жылдан бері тозығы жеткен әлеуметтік нысанда қызмет етіп келген бұл ауылдың ақ халатты абзал жандары жақында жаңа ғимараттың есігін айқара ашты.
Ел Тәуелсіздігі мен Жамбыл облы­сының 80 жылдық мерекесіне орай ашылған жаңа нысанның ашылу рәсіміне аудандық мәслихат хатшысы Тұрсынхан Жаманбаев пен аудандық орталық аурухананың бас дәрігері Шын­дос Мырзалиев қатысып, ізгі тілектерін айтты. Тұрсынхан Есімқұлұлы өз сөзінде:
– Халқыңа қызмет ет,
Ізгілерге ізет ет.
Жаны жақсы жайсаңдарды құрмет тұт,
Асылдарды әрқашан жадыңда ұста,- деген Қожа Ахмет Яссауи баба­мыздың ұлағатты сөзі бар. Біз өткен­ді ұмытпауға тиіспіз. Қазақ халқы қаншама қиындықты бастан өткерді. Табандылықтың арқасында біз соның бәрінен мойымай, бүгінгі қой үстіне бозтарғай жұмыртқалаған заманға жеттік. Бұның бәрі Тұңғыш Президентіміз Нұрсұлтан Әбішұлы Назар­баевтың алысты болжай біл­ген көрегендігі мен салиқалы саяса­ты­ның арқасы. Әлі талай тынымды тірлік­тер­дің атқарылатынына да сенемін. Бүгінгі ашылып отырған медицина­лық нысанның құрылысына қолдау көрсеткен тікелей облыс басшысы еке­нін айтқым келеді. Қорағаты гүлдене бер­­сін. Ауырмаңыздар. Елімізде тек қа­­­на ты­ныштық болсын,-деді. Айта кетейік, Қорағаты фельдшерлік-акушерлік тіре­гі мемлекеттік-жекеменшік серіктес­тік ая­сында 10 келушіге арналып са­лын­ған. Жобалық сметалық құны 30 млн. теңгені құраған жаңа нысанның құры­лыс жұмыстарын «ЖК Әбілов» жауапкершілігі шектеулі серіктестігі жүргізген. Жаңа медпунктте емдеу ісіне қажетті құрал-жабдықтардың барлығы орнатылған екен.
Шара соңында аудандық мәслихат хат­­шысы Тұрсынхан Жаманбаев жалпы тәжірибелік дәрігер Сапар Жұмана­заровқа ғимараттың «Символикалық кілтін» табыс етті. Тәуелсіздік күні мен облысымыздың 80 жылдығына орай өткен аптада Ақыртөбе ауылдық округіне қарасты Малдыбай елдімекенінде 5 келушіге арналған жаңа медициналық ғимарат ел игілігіне пайдалануға берілді. Құрылыс нысанының салтанатты ашылу рәсі­міне аудандық мәслихат хатшысы Тұрсынхан Жаманбаев, аудандық орталық аурухананың бас дәрігері Шын­дос Мырзалиев, Малдыбай ауылдық ақсақалдар алқасының мү­шесі Қайрат Кездікбаев қатысып, жүрекжарды лебізін білдірді.
Бұл қуанышты жаңалықты мал­ды­байлық­тармен бірге бөліскен Тұрсынхан Жаманбаев жаңа меди­циналық нысанның құрылысын жүр­гізген «ЖК Әбілов» жауапкершілігі шектеулі серіктестігінің басшысы Нұрболат Мергенбайұлына алғысын білдіріп, ауыл тұрғындарын алда келе жатқан төл мерекеміз Тәуелсіздік кү­ні­мен құттықтады. Одан кейін, өз пікірін ортаға салған Малдыбай ауыл­дық ақсақалдар алқасының мүшесі Қайрат Кездікбаев өңір жұртшылы­ғына шапағаты тиер ауқымды тірліктер­дің барлығы облыс әкімі Асқар Мырзах­метовтың жүйелі жұмысының арқа­сында жүзеге асырылып отырғанды­ғын тілге тиек етті.
«Жалпы мемлекеттік-жекеменшік серік­тестік шеңберінде салынған бұл қос нысан құрылыстарының мер­дігер компаниясы – «Тараз-Асар-Сер­вис» ЖШС-і. Бірақ, құрылысты жүргізген «ЖК Әбілов» жауапкершілігі шектеулі серіктестігі. Барлығын бақылауда ұс­тап, құрылыс жұмыстарын ұйымшыл­дық­пен атқарып шықтық» дейді Нұрболат Мергенбайұлы бізге берген сұхбатында.
Шара соңында аудандық мәслихат хатшысы Тұрсынхан Есімқұлұлы мен ауыл ақсақалы Қайрат Кездікбаев жа­ңа медициналық ғимараттың лента­сын салтанатты түрде қиды.

 Марат Диханбай.

Поделиться ссылкой: