Жер қойнауынан қазып алынып, мұражай төріне қойылған жәдігерлерге қарап, қайран қаласың! Өйткені олар сан ғасырлар бұрын қолданыста болып, бүгінде құнды дүниелерге айналған. Дегенмен, сіз бен біз күнделікті күйбең тіршіліктен босай алмай, өткен күннің тарихы мен бүгінгінің болмысын байланыстыратын мұражайға бара алмай жататынымыз жасырын емес.
Жуырда осы бір олқылықтың орнын аудандық мұражайдың қызметкерлері толтырып, аудан тұрғындарына үлкен мүмкіндік сыйлады. Олар Елбасының «Болашаққа бағдар:рухани жаңғыру» және «Ұлы даланың жеті қыры» атты бағдарламаларын басшылыққа алып, аудан мұржайының есігін кешкісін де ашып қойды. Ерекше іс-шараның басты мақсаты – мұражайға келушілердің санын арттыру, күні бойы жұмыстан басамайтын жандарға қолайлы жағдай жасау.
Эльдар Утембаев басшылық ететін мұражай мамандары көздеген мақсаттарына жетті де. Кешкі сағат 19.00-де ашылып, түнгі 00.00-ге жалғасқан шараға 200-ге жуық адам келіп, тарихи туындыларды тамашалады. 
Мұражайға аудан тұрғындарынан бөлек, Құлан агротехникалық колледжінің білімгерлері де келіпті. Шара барысында мұражай сыртына қойылған туындыларды тамашалап тұрған бірнеше студенттермен тілдесіп те көрдік. «Біз Рамазан, Мұхаметжан үшеуміз бір топта бірге білім аламыз. Ветеренария бөлімінің студенттеріміз. Олар Тараз қаласының жігіттері болғандықтан, колледж жатақханасында бір бөлмеде тұрамыз. Бүгін түнгі музей ұйымдастырылып жатқанын естіп, бірден осында келдік. Шындығын айту керек, бізге қатты ұнады.
Ауданның тарихымен танысып, ерекше күйге бөлендік. Сонымен қатар, Алтын адам, Тұрар Рысқұлов, Абай Құнанбаев, Мэлс Өзбеков, Қамзақ Төлендиев секілді тарихи тұлғалардың рөлін сомдаушылардың образдары да көңілімізден шықты. Енді міне, жергілікті суретшілердің туындыларымен танысып тұрмыз. Дәл осындай шаралар көптеп ұйымдастырылып тұрса деген ұсынысымыз да бар» деді Жаңатұрмыс ауылының тумасы Шайзада есімді жігіт.
Иә, шыныменде 9000-нан аса экспонат қойылған іс-шара көптің көңілінен шықты. Ұлттық рухты көтеретін, тарихтан терең сыр шертетін дәл осындай іс-шаралар көптеп ұйымдастырылса деген тілек бізде де бар.
Жәнібек БАЗЫЛБЕКОВ.
