Түйткілді мәселелер талқыланды

447 Views

Ауыл әкімдерінің округке қарасты елдімекен тұрғындары алдында есеп беру жиындары 27-29-ы қаңтар күндері өтті. Құлан, Қайынды, Ақыртөбе, Тереңөзек, Көкдөнен ауылдық округ әкімдері өздеріне тиесілі ауылдарды аралап, халықпен кездесіп, тұрғындар алдында есеп берді. Есеп беру жиын­дарында жыл бойы атқарылған жұ­мыс­тар жіпке тізіліп, алдағы уақытта да атқарылар жұмыстар сөз болды. Ай­та кету керек, аталмыш кездесулерге ау­дан әкімдігіне қарасты бөлімдердің бас­шылары да қатысты.
Мәселен, Тереңөзек ауылдық ок­ру­гіне қарайтын Көкарық ауылында өт­кен жиналысқа халықты жұмыспен қамту орталығы директорының орын­ба­сары Д.Балпанов қатысты. Есеп бе­ру жиынында алғашқы болып ауыл әкі­мі М.Мұсаев сөз алып, өткен жылы ок­руг­­те атқарылған жұмыстарды баян­да­ды. Атап айтар болсақ, ауыл әкі­мі кө­біне білім, денсаулық, кәсіпкерлік, жол, жарықтандыру мәселелері бой­ын­ша сөз қозғады. Ізінен сөз кезегі халықты жұмыспен қамту орта­лы­ғы директорының орынбасары Д.Балпановқа берілді. Орталықтың өкілі ауыл тұрғындарына көп балалы ана­­ларға берілетін атаулы әлеуметтік кө­мек­­тің шарттары өзгергендігін айтып, әлеу­­мет­тік қолдаудың жаңа шарт­­та­рын тү­сін­діріп берді.
Жиын барысында тұрғындарға да сөз беріліп, ұсыныс тілектері тыңдалды. Атап айтар болсақ, ауыл тұрғыны Жексентай Сүйінбаев ауылдық клуб­қа күрделі жөндеу жұмыстарын жүргі­зу керектігін айтса, Натибай Әбішев Көкарық ауылындағы М.Әуезов жә­не А.Жүнісқадіров көшелерінің бұры­­лы­сына асфальт төсеу керектігін жеткіз­ді.Тұрғындардың тілегі бірден хатта­ма­ға енгізілді.
Тереңөзек ауылының әкімі М.Мұсаев Шолаққайынды елдіме­кен тұр­ғындарымен де кездесіп, есеп берді. Онда тұрғындар Т.Байдосов кө­шесіне су құбырын тарту керектігін алға тартты. Сонымен қатар, жиында электр жүйесінің кешқұрым әлсіз жа­нып тұратыны туралы да сөз болды. Жалпы жиын соңында қос ауылдың тұрғындары ауыл әкімінің жұмысына «қанағаттанарлық» деген баға берді.
Дәл осындай баға Сөгетті және Мамай елдімекен тұрғындары тара­пы­нан Қайынды ауылдық округінің әкімі Азамат Асанбайға да берілді. Дегенмен, тұрғындар ауыл әкімнің жұ­­мысына баға бермес бұрын бірнеше сұ­рақтар қойды. Дәлірек айтар болсақ, тұр­ғындар ауыз су, мектеп алдына жол ережесін тежейтін белгілер қою, тау­­дан келетін судың жолын реттеу сын­­ды мәселелерді көтерді. Тұрғындар кө­терген барлық мәселелерге ауыл әкі­мі нақты жауап қайтарды.
Суға қатысты мәселе келесі күні Малдыбай ауылында өткен жиналыста да айтылды. Ақыртөбе ауылының әкі­мі А.Әбішев есеп беріп болғаннан кей­ін, оған ауыл тұрғыны Қайрат Кездікбаев үйді-үйге су тарататын құбырлардың ескіргенін айтып, ауыстыру керектігін жеткізді. Аталмыш сауалға ауыл әкімі мәселені шешудің алғашқы жұмыста­ры жасалғанын, қаржыландыру үшін бюджетке сұраныс берілгендігін тілге тиек етті. Жиында ауылға жаңа мектеп соғу, ескі ғимаратты басқа мақсаттар­­ға пайдалану секілді ұсыныстар ай­тыл­­ды. Одан бөлек жер алу мәселесі де қоз­ғалды. Сауалдарға нақты жауап бер­ген ауыл әкімнің жұмысына жергілік­ті тұрғындар оң бағасын берді.
Тұрғындар тарапынан көптеген сұрақ­тарға жауап берген әкімдер­дің бі­рі – Төлеген Атабаев. Көкдөнен ауылы­ның әкімі округке қарасты Жақысылық ауылы тұрғындарының сан түрлі сауалдарына жауап беруіне мәжбүр болды. Сөгеттіктер секілді мұн­дағы тұрғындар да тау суын ауыл ір­ге­сіне жеткізуді көздейді. Осы мәселеге байланысты сұрақ қойған ауыл тұр­ғы­ны Қожамұрат Байтумановқа ауыл әкімі аталмыш мәселе басты назарда тұрғандығын, орын алған олқылықты реттеу жұмыстары жүргізілгенін ай­тып, нақты жауап берді. Жиын бары­сын­да интернет желісі, көшелерге жол төсеу, қаңғыбас иттердің көптігі және Құмарық бекетіне апаратын жолды жөндеу секілді мәселелерді округ тұр­ғындары баса айтты. Сауалдарға нақ­ты дәлелдермен жауап берген Төлеген Атабаевқа жиын соңында ауыл тұр­ғын­дары Халықберді Дүкенбаев пен Мұратбек Биғазиев есеп беруі кез­де­суі­не қанағаттанарлық деп баға беріп, ауыл әкімінің жұмысына табыс тіледі.
Құлан ауылдық округінің әкімі М.Иманбаевта округке қарасты Қарақат, Шөңгер ауылдарына барып, халық алдында есеп берді. Аталған ауылдарда да тұрғындардың талабы көше жолын жөндеу, көше жарығы мен ағын судың жайы болды. Ауыл әкімі көтерілген мәселелердің барлығын назарда ұстап, тиісті жұмыстар атқарылып жатқанын атап өтті.

Жәнібек Базылбеков.

Поделиться ссылкой: