Жәрдемақы жүйесіне енген жаңа өзгерістер түсіндірілді

442 Views

Көп балалы аналар мен тұрмыстық ахуалға байланысты аз қамтылған отбасы мүшелеріне мемлекет тарапынан берілетін атаулы әлеуметтік көмек жәр­демақысына енген жаңа өзгерістер мер­­­зімді баспасөз беттерінде аз жа­зы­­лып жүрген жоқ. Аталмыш жәр­­дем­ақының жаңа төлемдері тура­лы аудандық, облыстық, тіпті, рес­­публикалық ауқымда түсіндіру жұ­­мыстары жүргізілуде. Апта басында ау­дан әкімдігінің үлкен мәжіліс залында ауыл әкімдерінің және осы салаға жа­уапты мамандардың қатысуымен өткен алқалы жиын бұл пікіріміздің дәлдігін арттыра түседі.Аудан әкімінің орынбасары Руслан Оразханның төрағалығымен өрбіген жиналысқа облыс әкімдігі жұмыспен қамтуды үйлестіру және әлеуметтік бағдарламалар басқармасының бөлім басшысы Марал Ділдәбекова мен Жамбыл аудандық халықты жұмыспен қамту орталығының маманы Медет Ізетқұлов арнайы келіп, тұшымды әрі дәйекті ақпараттармен бөлісті.
– Баршаңызға белгілі, биыл атаулы әлеуметтік көмек жәрдемақысының сипаты өзгеріп отыр. Аталмыш жәр­­­демақының қалай төленетіні тура­сында ел Президенті Қасым-Жомарт Кемелұлы Тоқаев былтыр қыркүйек айында Қазақстан халқына арнаған «Сындарлы қоғамдық диалог – Қазақ­станның тұрақтылығы мен өркендеуінің негізі» атты Жолдауында айтты. Биылдан бастап, 2002 жылдан бері төленіп келген ескі ме­ханизмге оралып отырмыз. Яғни, атаулы әлеуметтік кө­мек отбасының жиынтық табысы жан басына шаққанда кедейшілік шегінен аспаған жағдайдағы айырмасымен сараланып, төленеді. Тұрар Рысқұлов ауданында 7 ассистент және 1 консультант қызмет атқарады. Барлығы білікті мамандар. Олар да өз кезегінде сіздерге мазмұнды ақпараттар таратып отыр деген сенімдемін. Сіздер де жергілікті тұрғындарға ауылдың әкімі ретінде шынайы мағлұмат беріп, түсіндіру жұмыстарын жүргізулеріңіз қажет,-деді Марал Аманжолқызы.
Бұдан кейін Абай ауылдық округінің әкімі Мұрат Арыстанбеков пен Құлан ауылдық округі әкімінің орынбасары Серік Баймұратов атаулы әлеуметтік көмек жәрдемақысы жайында өз ой­ла­рын білдірді. Өз кезегінде қойылған сұрақтарға нақты мысалдармен үн қатқан Марал Аманжолқызы жиында көтерілген пайымды пікірлерді ескеріп, министрлікке ұсыныс жолдайтынын жеткізді. Сондай-ақ, Марал Ділдә­бекова атаулы әлеуметтік көмек туралы ай­шықты ақпаратты ауыл тұрғындары жер­гілікті әкімдіктерден немесе аудан­дық жұмыспен қамту орталығынан біле ала­тындықтарын айтты.

Марат Диханбай.

Поделиться ссылкой: