Ерікті болу — ерлік

615 Views

Қазақстан Президенті Қасым-Жомарт Тоқаев 2020 жылды «Еріктілер жылы» деп жариялады. Өз еркімен қоғамға пайдасын тигізуді көздейтін еріктілердің катары жыл санап артып келеді. Бүгінде әлем халқының 970 миллионы волонтер болса, оның ішінде әрбір сегізінші қазақстандық еріктілер қатарын толықтыруда.
«Еріктілер — жаны» таза адамдар. Белсенді азаматтық үстанымдары­ңыз мемлекеттің дамуына айтарлық­тай септігін тигізетіні сөзсіз» — деді Президент. 26 тамызда Мемлекет басшысы қаулыға қол қойды. Ол бойынша Үкіметке Волонтер жылын өткізу бойынша қажетті шаралар қа­былдауды тапсырды.
Заңда көрсетілгендей еріктілер қызметі — жеке тұлғаларға, кәсіпорын — компанияларға, әлеуметтік топтарға көмек көрсету, қоршаған ортаны қорғау, азаматтық позицияны қалыптасты­ру, өзін-өзі ұйымдастыру, әлеуметтік жауап­кершілік, өзара көмек көрсету жә­не қоғамда қайырымдылық жасау.
Ел Президентінің 2019 жылғы 10 желтоқсанында өткен Жастар жылы­ның жабылуы және Еріктілер жылы­ның басталуы рәсімінің қорытынды­лары бойынша берілген тапсырмаларын орындау туралы хаттамасына сәйкес, Қазақстан Республикасының Әділет министрлігі халықтың құқықтық сауаттылығын арттыру және азамат­тарға құқықтық мәселелер бойынша консультациялық көмек көрсету жө­ніндегі жұмысқа ерікті-заңгерлерді тар­ту бойынша жауапты орындаушы болып бекітілген.
Осыған байланысты Жамбыл облыстық Әділет департаментінің 2020 жылға арналған іс-шаралар жос­парына сәйкес Тұрар Рысқұлов ау­дан­аралық Әділет басқармасы­ның ұйымдастыруымен жұмыстар атқа­рылуда.
Аудан мекемелерінде, «Азаматтар­ға арналған үкімет» мемлекеттік кор­порациясында, сонымен қатар, Жастар орталығында ерікті заңгерлердің, ад­во­каттардың, нотариустардың және сот орындаушылардың қатысуымен аза­маттарға консультациялық көмек көрсетіліп және туындаған сұрақтары­­­на толыққанды жауаптар беріліп, білік­­ті заң көмегі көрсетілді.
Ерікті болу — ерлікпен тең. Сөз со­ңында айтарымыз, еріктілердің ерен еңбегі ақталып, азаматтық қо­ғам дамуында белсенділік жаңа дең­гей­ге көтерілетініне сенім мол. Әрбір қа­зақстандықтың бойында белсенді өмір сүруге дағды қалыптасса, алын­байтын асу жоқ.

Бақыт Мұхтарова.
«Қазақстан Заңгерлік Одағы» қоғамдық бірлестігінің Жамбыл облыстық филиалының мүшесі.

Поделиться ссылкой: