Сазгердің шығармашылығы насихатталды

586 Views

Биыл елімізде атап өтілетін мерейтойлар өте көп. Шығыстың шайыры Әбу Насыр әл-Фарабидің 1150 жылдығынан бастап, Абайдың 175 жылдығына дейін тойлайтын боламыз. Тойлағанда да ысырапшылдыққа жол бермей, керісінше, адам бойына рухани азық сыйлайтындай дәрежеде атап өтуіміз қажет.

Бүгінде мерейтойларға қа­тысты іс-шаралар ауданға қарасты елді­мекендерде көптеп өт­кізілуде. Солар­дың бірі Қарақыстақ ауылдық округінде өткізілді. Дәлірек айтар болсақ, аталмыш округ орта­лы­ғында орналасқан мәдениет үйінде елімізге белгілі әнші әрі сазгер Ескен­дір Хасанғалиевтің 80 жылдық мерей­тойы аталып өтті.
Зайтуна Оразалиева басшылық ететін өнер ордасының қызметкерле­­рі сазгердің өмір тарихы мен шығар­ма­шылығын толықтай қамтыған. Тіпті, іс-шарада әншінің өмірлік сері­гімен кездесу сәтін бейнелейтін сах­налық көріністе қойылды. Театрлық қойылымды Бауыржан Момышұлы атындағы мектептің жоғары сынып оқушылары Бауыржан Әуесбай мен Ақерке Асылхан сомдап, көрермен­дер­ге ұсынды. Ал, әншінің «Шақыра­ды көктем», «Есіңе ал», «Анаға сәлем», «Асыл арман», «Әдемі», «Гүлсезім», «Атамекен» әндерін Жұмабек пен Қайрат Сәменқұловтар және Гүлмарал Қорабаева сынды өнерпаздар на­қы­шына келтіре орындап, көптің көңі­лі­­нен шыға білді.
Концерттік бағдарлама барысын­да сазгердің тілшілерге берген сұхбаты, айтқан әндері бейнеролик арқылы көрсетілді. Бір сөзбен айт­қан­да, жоға­ры деңгейде ұйым­дас­тырыл­ған іс-ша­ра­ны ауыл тұрғындары зор ықыласпен тама­ша­лады. Жиын соңына қарай ауыл ақ­са­қалы Бестей Қалымбетов сөз сөй­леп, әншінің өнеріне шолу жасай келе, іс-шараны ұйымдастырушыларға тұр­ғындар атынан алғысын айтты.

Жәнібек Базылбеков.

Поделиться ссылкой: