Қауіпсіздік шаралары күшейтілуде
432 Views
Дәл қазір күллі дүние жүзі халқы қытай елінен бастау алған коронавирустан сақтануды мейлінше күшейтіп, жұқпалы аурудың салдарымен хал-қадірінше күресіп-ақ жатыр. Өкінішке орай, әлем елдеріне тараған коронавирус індетімен ауырғандар саны күн өткен сайын азаяма десек, керісінше өсіп барады. Өздеріңіз жаңалықтардан көріп, газеттерден оқып та отырған боларсыздар, аталмыш індетті жұқтырған отандастарымыз да жоқ емес, бар. Халықты әуре-сарсаңға салған жұқпалы дерт турасында Мемлекет басшысы Қасым-Жомарт Тоқаев елге төтенше жағдай енгізді. Сондай-ақ, ел Президенті шұғыл түрде республикалық телеарналарға тікелей байланысқа шығып, халыққа Үндеу жариялады. «Құрметті отандастар! Біз – тарихымызда небір қиындықты бастан өткерген халықпыз. Сол сынақтардан, ең алдымен, береке-бірліктің арқасында сүрінбей өттік. Бүкіл халықты жұдырықтай жұмылуға, сабыр сақтауға шақырамын. Бұл күрделі жағдайды бәріміз бірге еңсереміз деп сенемін! Халқымыз аман, жұртымыз тыныш болсын. Біз біргеміз!» деді өз Үндеуінде Қасым-Жомарт Кемелұлы.
Шындығында да, Мемлекет басшысы сөз еткендей, қарға тамырлы қазақ халқы нендей жағдайды бастан өткерсе де, тонның ішкі бауындай ұйысқан берекелі бірлігі мен мызғымас татулығының арқасында ол қиындықтарды еңсере білген. Сондықтан бұған алаңдаудың, абыржудың еш реті жоқ. Қазақ халқы бұл қиындықтан да аман шығады. Себебі, біз, Жұбан Молдағалиев жырлағандай, «мың өліп, мың тірілген» рухты халықпыз.
Ел аумағында төтенше жағдай енгізілгендіктен аудандық атқарушы билік өкілдері барша аудан халқына алыс жолға шықпауға кеңес береді. Аудан әкімі Ерболат Садырқұлов тіпті халық көп шоғырланатын орындар мен мекемелерді жіті назарда бақылап, жұқпалы індеттен сақтанудың шараларын күшейту қажеттігін тапсырды.
Берілген тапсырмаға сәйкес өткен сейсенбіде аудан басшысы Ерболат Салқынбекұлы тұрғындар көптеп келетін «Азаматтарға арналған үкімет» мемлекеттік корпорациясы коммерциялық емес акционерлік қоғамының Жамбыл облысы бойынша филиалы Халыққа қызмет көрсету орталығының Тұрар Рысқұлов ауданының бөлімшесі» мекемесінде болып, жасалып жатқан қауіпсіздік шараларының ұйымдастырылуымен танысты. Әңгімелесу барысында аудандық халыққа қызмет көрсету орталығына тұрғындар көптеп келетіндіктен аудан басшысы мынадай сөз қозғады. Яғни, Ерболат Садырқұлов тұрғындар өздеріне қажетті түрлі санаттағы анықтамалар мен құжаттарға ауылдық округтерде ашылған «Цифрландырылған орталықтар» жұмысы арқылы қол жеткізе алатындықтарын айтып, халыққа ақпараттық технология мүмкіндіктерін түсіндіру шараларын күшейтуді тапсырды. Тазалық пен тәртіп, сонымен қатар, халықтың санитарлық ережеге бағынуын бақылауды, ғимаратқа кіру реттілігін ұйымдастыруды мекеме басшысына нықтап қадағалауды жүктеді. Халықтың қауіпсіздігі басты назарда екенін тілге тиек еткен Ерболат Салқынбекұлы айшықты ақпараттар барлық әлеуметтік желілер мен аудандық басылым бетінде жарық көріп отыру қажеттігін айтып, тиісті сала басшыларына тапсырма берді.
Марат Диханбай.