Құрылыс қарқыны бәсеңдемеуі қажет

«СOVID – 2019» вирусы аш айда­һардай араңын ашып, әлем елдерін жаулауды әлі де болсын доғарар емес. Оны жұқтырғандардың саны күн сайын ұлғайып, өкінішке орай өсіп келеді. Бір қызығы оған қауіпті дертті емес, тек өзімізді кінәлауға мәжбүр болып отырмыз. Себебі, атын атауға ауыз бармайтын індетті жеңу өз қолымызда екендігін кеш түсініп жатырмыз. Бірақ, мұның бәрі өтпелі кезең екенін ұмытпағанымыз абзал. Бойымызда күш-жігер мен саф алтындай сабырлық болса, басымызға түскен қиындықты оңай еңсеретінімізге сенімдімін.
Қауіпті дертпен күрес аяқталғаннан кейін сарапшылар әлем бойынша дағдарыс болатынына аса қатты сенімді. Осы бір көңілді күпті қылған болжамға қарамастан, мемлекет басшыларының ел аумағында құрылыс жұмыстарын қарқынды түрде жүргізуін өз басым батылдыққа балаймын. Бұл қадам бір жағынан ескі нысандардың жаңаруына өз септігін тигізсе, екін­ші­ден – табысынан айырылған азамат­тарға дағдарыс кезінде қаржы­лық қиындықтан құтылуға мүмкіндік бермек. Бүгінде осы бағытқа бюджет­тен қыруар қаражат бөлініп те үлгер­ді. Нәтижесінде жоспарланған жұмыс­тар мерзімінен бұрын бастау алып, құрылысшылар өз міндеттеріне ерте кірісті. Оны аудандағы құрылыс жұ­мыстары бойынша атқарылып жат­қан ауқымды істерге қарап-ақ айтуға болады.
Расымен де, биыл аудан аумағында ауыз толтырып айтарлықтай жұмыстар атқарылмақ. Бірден 8 мектепке күрделі жөндеу жұмыстары жүргізілсе, 90-нан астам автокөлік жолдарын қайта қалпына келтіру көзделіп отыр.
Қыруар қаржы қарастырылған құрылыс жұмыстарының сапалы жүр­гізілуін қадағалау да аса маңызды бол­мақ. Осыған байланысты «NurOtan» партиясының мүшелері аудан аума­ғындағы құрылыс жұмыстарына арнайы бақылау жүргізетін болады. Топ құрамында бас партияның қыз­меткерлері, аудандық мәслихат депу­тат­тары және өзге де белсенді азамат­тар бар.
Жуырда аталмыш партияның мү­шелері білім ошақтарына барып, онда­ғы атқарылып жатқан жұмыстармен жақын танысты. Топ құрамында «Nur Otan» партиясы аудандық филиалы төрағасының бірінші орын­басары Қанат Арыстанбеков және топ мүшелері Қайрат Мадалиев пен Батыржан Ауғанбаев болды. Олар ең алдыменен Қарақыстақ ауылдық округіне қарасты Каменка ауылын­да орналасқан Бауыржан Момышұлы атындағы мектепке бас сұқты. Онда «Қаратау Құрылыс — 2030» мердігер компаниясының өкілі Мейрамбек Яхияевпен тілдесіп, құрылыс жұмыс­тарына көз жүгіртті. Құрылысты сәуір айының 20-шы жұлдызында бастаған 60-тан астам жұмысшы біраз істі еңсерген. Қазіргі таңда қабыр­ғаларды қыру, электр сымдарын жүр­­­гізу сынды жұмыстар жүргізіліп жа­тыр екен. Алдағы уақытта білім оша­ғының шатырын, еденін ауыстыру жұ­мыс­тары басталмақ. Сонымен қатар, білім ошағына соңғы үлгідегі есік пен терезелер қойылатын болады. Жалпы 680 оқушыға білім беретін мекеменің жөндеу жұмыстарына 137 000 000 теңге көлемінде қаржы бөлінген. Бақылау жүргізетін партия мүшелері жергілікті ауыл жігіттерін де жұмысқа тарту керектігін айтып, құрылыс басшысы­на ұтымды ұсыныс тастады. «Жұмысқа жергілікті жердің азаматтарын алу­ды сұранамыз. Бұл қадам – жұ­мыс­­сыздыққа тап болған ауыл тұр­ғындарына таптырмас мүмкіндік болар еді. Сонымен қатар, сіздерде жұ­мысты сапалы аяқтау үшін көптеген уақыт бар. Бірақ соған қарамастан, құрылыс қарқыны бәсеңдемеуі қажет. Жауапты мамандарыңыз құрылыс жұмысын сапалы жүргізеді деген сенімдеміз» деген партия мүшелері құрылысшыларға сәттілік тіледі. Ал, құрылыс басшысы Мейрамбек Сәрсенұлы қазірдің өзінде 10-ға жуық ауыл азаматы құрылыс жұмыстарында қызмет ететінін айтып, артылған сенімді ақтауға тырысатынын жеткізді.
Қанат Дәкенұлы бастаған топ мүшелері дәл осындай мақсатпен Қызылшаруа және Р.Сәбденов ауылдарында орналасқан мектептеге де барып, ондағы атқарылып жатқан жұмыстармен де танысты.

Жәнібек БАЗЫЛБЕКОВ.

Поделиться ссылкой: