Ардагерлерді құттықтады
305 Views
Жеңістің 75 жылдық мерейтойы қарсаңында аудан әкімі Ерболат Садырқұлов бастаған топ аудан аумағында тұратын Ұлы Отан соғысы ардагерлерінің үйлеріне арнайы барып, қал-жағдайын біліп, ізгі тілектерін арнады. Құттықтаушы топ құрамында аудан әкімінен бөлек оның орынбасары Бейсенбек Әлпейісов, мәслихат хатшысы Тұрсынхан Жаманбаев, аудандық ардагерлер кеңесінің төрағасы Қожайхан Бижанов, ішкі саясат бөлімінің басшысы Ләззат Утеулиева болды. Жылдағы дәстүрге сәйкес өткізілетін аталмыш іс-шара биыл өзге форматта өрбіді.
Биыл еліміздің әр аймағында тұратын ардагерлерге Мемлекет басшысы Қасым-Жомарт Тоқаев арнайы құттықтау хатын жолдаған. Аталмыш хатта: « Құрметті ардагер (ардагердің аты-жөні жазылған)! Сізді Ұлы Отан соғысындағы Жеңістің 75 жылдығымен шын жүректен құттықтаймын! Сіздердің адамзат тарихындағы ерен ерліктеріңіз бүгінгі бейбіт өмірімізге, жарқын болашағымызға жол ашты. Бұл ешқашан ұмытылмайды. Ардагерлеріміздің даңқты өмір жолы – Отанға құрмет етудің және патриотизмнің озық үлгісі. Өскелең ұрпақ әрдайым өздеріңізге қарап бой түзейді. Сізге зор денсаулық, амандық және бақ-береке тілеймін!» делінген. Дәл осындай мәтіндегі Президент құттықтауын аудан әкімі ең алдыменен Құланның қадірлі қариясына айналған соғыс ардагері Жахан Мырзахметовке табыстады. Сонымен қатар, жасы 96-ға келген қарияға арнайы даярланған сыйлық пен тәтті салынған себетті және ішінде 1 000 000 теңге көлемінде қаржысы бар конвертті қолына ұстатты. Ізінен құттықтаушы топ мүшелері ақсақалға зор денсаулық тілеп, ардагердің майдан шебінде орын алған әсерлі әңгімелеріне құлақ түрді.
Ерлікке толы естеліктерді, майдан ортасында орын алған оқиғаларды құттықтаушы топ мүшелері Жақсылық ауылының тұрғыны, соғыс ардагері Асаубай ақсақалдың аузынан да ести алды. Майданға 1942 жылы аттанған ақсақал аудан басшыларына Сталинград түбіндегі шайқастарды, екі рет қатты жараланғанын әңгімелеп берді. Одан бөлек әскерилендірілген құрылыс батальонының құрамында болып, бомбыланған теміржолдарды қайта қалпына келтіру жолында еңбек еткенін де атап өтті. «Қанды шайқастар, түскен жерін бірден опырып жіберетін ауыр снарядтар, дамылсыз атылып жатқан автоматтар, көк аспанды күңірентіп ұшып жүрген ұшақтар, табиғатты жайпап, жайратып келе жатқан танктер. Осының бәрі майдан даласына ең алғаш рет аяқ басқан жас жауынгердің көзіне сұмдық болып көрінеді. Біз осының бәрін басымыздан өткердік. Сол сұрапыл соғысты бүгінгі ұрпақ көрмесін. Бейбіт заманның берекесіне бөленіп, жамандықтан аулақ болыңдар. Бар арманым да, тілегім де – осы!» — деп келген қонақтарға алғысын жеткізіп, батасын берді Асаубай қария.
Соғыс жылдарында майдан шебіне ауданнан 6000-нан астам сарбаз аттанған екен. Өкінішке орай бүгінде солардың 3-еуі ғана ортамызда жүр. Оның екеуі жоғарыда есімдерін атап өткен ардагерлер болса, үшіншісі – Игенбек Құрбанов. Жасы 98-ге жуықтап қалған ақсақал да құттықтап келгендерді көргенде қуанышын жасыра алмады. Өзінің өмір жолын әңгімелеп, майданда орын алған бірқатар оқиғаларды көзіне жас ала отырып, баяндап берді. Игенбек ақсақалға да Президенттің құттықтау хаты, сыйлықтар мен қомақты қаржы берілді.
Бір қызығы үш ардагеріміз де соғыс жылдарындағы ең ауыр шайқастардың бірі саналатын Сталинград қаласындағы ұрыстарға қатысыпты. Сондықтан болар, олар кейінгі ұрпақты құдды бір келісіп алғандай бейбіт күнді қадірлеуге, бірлікке бекем болуға шақырды.
Жәнібек БАЗЫЛБЕКОВ.