БАБАЛАР ЕСІМІ – ел есінде

357 Views

Егемен ел болып, тәуелсіздік ал­ғанымызға жыл соңында 30 жыл толады. Тәуелсіздік жо­лында біздің батыр бабаларымыз не көрмеді десеңізші… Қазақ халқы азап­ты күндер мен аштықты, тіпті, сұра­пыл сұм соғыстың небір түрін бастан өткерді. Дәлірек айтар бол­сақ, ХХ ғасыр біздің еліміз үшін қай­ғылы сәттермен есте қалды. Солар­дың бірі – Ұлы Отан соғысы.
Адамзат тарихындағы ең сұмдық со­ғыс­тың аяқталғанына биыл – 75 жыл. Екінші дүниежүзілік соғыстың шешуші кезеңіне айналған ұрыста қазақ батырлары да жанқиярлықпен күресті. Ресми деректерге сүйенетін болсақ, сол сәтте елімізден май­дан­ға 1 миллион 200 мың жауын­гер аттанған. Қазақстандық жауын­герлердің көбісі Украинаны, Бе­ло­руссияны, Балтық бойын, Мол­довияны азат етуге қатысты. Мыңдаған қазақ жі­гіттері Кеңес әскерінің құрамында бо­лып, Шығыс Европа халықтарын Гит­лердің қатыгездігінен азат етуіне ат салысты. Майдан даласына түс­кен жерлестеріміз бірінші күн­нен бастап-ақ жұдырықтай жұмылып, ерлікпен күресе білді. Со­ғыс жылдарында жауынгерлік ерліктері үшін жүздеген мың қа­зақ­стандық орден-медальдармен марапатталып, 500-ден астам жауынгер Кеңес Одағының Батыры, 100-ге жуық майдангер «Даңқ» орденінің иегері атанған. Төрт бірдей жерлестеріміз екі мәрте Кеңес Одағының Ба­тыры атанды. Олардың қатарында — Талғат Бигелдинов, Сергей Луганский, Иван Павлов және Леонид Беда сынды батыр әрі ержүрек ұлдар бар. Сондай-ақ, Кеңес Одағы Батырларының қатарына қазақтың қаршадай қос қызын да қосыңыз. Оның бірі — мерген Әлия Молдағұлова болса, екіншісі — пулеметші Мәншүк Мәметова.
Көптен күткен Жеңістің туын Рейхстагта желбіреткен жа­уын­гердің бірі қазақ екенін жақ­сы білесіздер. Рахымжан Қош­қарбаевтың бұл ерлігі де өскелең ұрпақтың мәң­гі есінде қалатыны сөзсіз. Одан бөлек жау тылында болып, пар­тизандардың қатарында өз мін­де­тін мүлтіксіз атқарған Қасым Қай­сеновтің ерлігін де ұмытуға бол­майды. Ал танымал қолбасшы, әс­кери жазушы, жуалылық жауын­гер Бауыржан Момышұлы мен елі­мізде жасақталып, Мәскеуді қа­сық қаны қалғанша қорғаған 28 панфиловшылардың ерлігін біл­мейтін қазақ жоқ шығар, сірә! Дәл осындай батыр бабаларымыздың есімдері ел есінде мәңгі сақталуы тиіс. Себебі, олар — Жеңісті жақын­дат­қан сарбаздар.
Майдан даласына ауданымыздан 6235 сарбаз аттанып, оның 3017-сі ту­ған жеріне аман-есен оралған. Бірақ, өкінішке орай жыл өткен сайын сол батырлардың қатары сиреп барады. Бүгінде арамызда сұрапыл соғысты өз көзімен көрген 3 қана жерлесіміз бар. Игенбек Құр­банов, Асаубай Сүлейменов, Жахан Мыр­захметов ақсақалдардың жағ­дайы біздің жіті назарымызда. Мәселен, мереке қарсаңында аудан әкімі Ерболат Садырқұлов бастаған топ аты аталған қарияларды құт­тық­тап, қал-жағдайын біліп қайт­­ты. Мемлекет басшысы Қасым-Жомарт Тоқаевтың құт­тық­­тау хатын табыстауды да ұмыт­­қан жоқ. Сондай-ақ, биыл Же­ңіс­тің 75 жылдығына орай, ау­дан ау­ма­ғындағы Ұлы Отан со­ғысы ба­тыр­ла­рының құрметіне қойылған ес­керт­кіш тақталарға жөн­деу жұмыстары жүр­гі­зілді. Осы іске бастамашыл бо­лып, жұмысқа белсене атсалысқан азаматтарға ай­тар алғы­сым шексіз.

Қожайхан БИЖАНОВ,
аудандық ардагерлер
Кеңесінің төрағасы.

Поделиться ссылкой: