Ұсыныстар айтылып, нақты тапсырмалар берілді

271 Views

Көшпелі қоғамдық қабылдау

Өткен жұмада аудан әкімі Ерболат Садырқұловтың қатысуымен өрбіген көшпелі қоғамдық қабылдау Көкдөнен ауылында өтті. Аталған шараға прокуратура, полиция қыз­меткерлерімен қатар аудан әкім­дігінің бөлім басшылары қатысты. Еске сала кетсек, дәл осындай көшпелі қоғамдық қабылдаулар бұған дейін Құлан, Абай, Луговой, Қарақыстақ ауылдық округтерінде өткен болатын.
Көкдөнен ауылдық округіне қарасты екі елді мекен бар. Олар: Жақсылық және Құмарық бекеті. Соңғы аталғаны болашағы жоқ ауылдардың санатына кіреді. Аймақ орталығы Көкдөнен мен Жақсылық ауылдарының ажары жыл өткен сайын ажарланып келеді. Көкдөнен ауылында балалар бөбекжайы да, мәдениет үйі де, дәрігерлік амбулатория да бар. Ал, Жақсылыққа жаңа медпункт салу күн тәртібінде тұрған алғашқы мәселелердің бірі. Бірақ былтыр ғана салынып, пайдалануға берілген Көкдөнендегі медициналық пункттің жыл өтпей жатып сыртқы пішінінің өңі кете бастапты. Бұл мәселені ауыл тұрғыны Жомарт Төлеуішов көшпелі қоғамдық қабылдауда қынжыла айтты. Сондай-ақ, ол ауыл ішінде орналасқан бағдаршамға бейнебақылау қондырғысын орнату жайы да «сылдыр сөз» кейпінде қалып келе жатқандығын тілге тиек етті. Аудан басшысы бұл сұрақтарға рет-ретімен жауап беріп, алдағы уақытта мәселені бақылауға алып, жұмыс жасайтынын жеткізді. Ауыл тұрғыны көтерген проблемены хаттамалық негізге енгізуді тапсырды. Ал, балық шаруашылығы бойынша жоғары оқу орнын тәмамдаған Раушан Қанатова бітірген мамандығына сәйкес жұмыс таба алмай отыр екен. Ерболат Садырқұлов дәл осы шаруашылықпен өкінішке орай ауданда «Луговой жылқы зауыты» жауапкершілігі шектеулі серіктестігі ғана айналысатынын жан-жақты мысалдар арқылы жеткізіп, қолдан келген көмекті жасайтынын айтты. Көшпелі қоғамдық қабылдауда тұрғындар тарапынан бұдан өзге көше шамдары мен жол белгілерін орнату, мешіт маңына асхана соғуға жер телімін заңдастыру, тау суын тиімді пайдалану, кәсіп ашуға несие рәсімдеу секілді сұрақтар қойылды. Барлық қойылған сұраққа аудан басшысы нақты мысалдармен жауап беріп, жауапты сала мамандарға тапсырма жүктеді.

Марат Диханбай.

Поделиться ссылкой: