Аймақтың үздік әкімі анықталды

456 Views

Жамбыл облысында «Үздік ауыл әкімі» республикалық байқауының аумақтық кезеңнің жеңімпазы анықталды. Бұл туралы Қазақстан Республикасының Мемлекеттік қызмет істері агенттігінің баспасөз қыз­ме­ті хабарлады.
Жергілікті байқау комиссияның шешімі бойынша Т.Рысқұлов ауда­нының Абай ауылдық округінің әкімі Мұратбек Дәкенұлы Арыстамбеков облыстың үздік ауыл әкімі атанды. Ол енді Нұр-Сұлтан қаласында өтетін республикалық деңгейдегі байқауда Жамбыл облысының намысын қорғайтын болады.
Еске сала кетсек, ағымдағы жыл­дың 25 мамырында Қазақстан Республикасының Мемлекеттік қыз­мет істері агенттігі мен «Рухани жаңғыру» бағдарламасы аясында жергілікті өзін-өзі басқаруды дамытуға және жергілікті маңызы бар мәселелерді тиімді шешуге үлес қосқан, жұмыста жоғары практикалық нәтижелерге жеткен үздік ауыл әкімдерін анықтауға және көтермелеуге бағытталған «Үздік ауыл әкімі» республикалық конкурсы жарияланған болатын. Сол байқауға қатысқан 11 үміткерлердің арасынан тек 8-і бірінші кезеңнен өтіп, әңгімелесуге жолдама алған еді.
Әңгімелесу барысында өңірлік комиссия үміткерлердің сауалнама­лық деректерін, «Үздік ауыл әкімі» атағына мен неге лайықпын?» эссе тақырыбының ашылуын, жеке жо­балық жұмыстағы ұсыныстардың креативтілігін, мемлекеттік марапат­тар мен жарияланымдардың, ғылыми атақтар мен дәрежелердің болуын, мемлекеттік қызметші әдебін сақтау бойынша әдеп жөніндегі уәкіл жүргізген және жергілікті әкім жұ­мысының тиімділігіне халықтың қа­нағаттануын өлшеу үшін және елді мекен тұрғындары арасында онлайн-дауыс беру сауалнама қорытындыла­рын назарға алды.
Өңірлік комиссияның ше­ші­мі­мен бірінші кезеңнің бар­лық қа­ты­сушыларының ішінен республика­­лық кезеңге Т.Рысқұлов ауданының Абай ауылдық округінің әкімі Арыстамбеков Мұратбек Дәкенұлы ұсынылды.
Мұратбек Дәкенұлы 1965 жылы Т.Рысқұлов ауданы, Абай ауылдық ок­ру­гінде дүниеге келген. Еңбек жолын мұғалім болып бастап, онда директорға дейін жұмыс атқарған. 1999 жылы мемлекеттік қызметтегі еңбек жолын төменгі сатыдан бастап, 2010 жылы Луговой ауылдық округінің әкімі, ал 2017 жылы Абай ауылына әкім болып тағайындалған.
М.Арыстамбековтың ауылда қызмет атқарған жылдары елді мекен­дерде жолдардың жөндеу жұмыстары жүргізілді, электрмен жабдықтау жүйелері жаңартылды. Бірқатар әлеуметтік нысандар күрделі жөндеуден өтіп, артезиан ұңғымалары орнатылды. Сондай-ақ, ауыл шаруашылығын дамыту жобалары сәтті аяқталды. Ауыл тұрғындарының өмір сапасын жақсарту және бизнесті дамыту бойынша жобалар да жоғары деңгейде ұйымдастырылып, бүгінде іске асырылуда.
Короновирус пандемиясына бай­ланысты мемлекеттік мекемелердің қызметкерлері қашықтықтан жұмыс жасау режиміне еш қиындықсыз көшірілген. Бүгінде Абай ауылдық амбулаториясы 1200 адамға медици­налық көмек көрсетіп, науқастарға 920 000 мың теңге көлемінде дәрі-дәрмектер берілді. Сонымен қатар, ауыл әкімінің бастамасыменен елді мекендегі әлеуметтік қолдауға зәру азаматтарға қаржылай көмек көрсетілген.
Дәл осындай маңызды жұмыстар­ды өз деңгейінде атқарып, аймақтың үздік ауыл әкімі атанған жерлесімізді жеңісімен шын жүректен құттықтай­мыз. Алдағы уақытта байрақты бәсе­кеде бағы жанып, үздіктер қатарынан көрінуге тілектеспіз.

Ж.Сәдуақас.

Поделиться ссылкой: