Учаскелік инспектордың мәртебесі артады

Мемлекет басшысы Қасым-Жомарт Тоқаевтың бастамасыменен соң­ғы жылдары ішкі істер саласына айтар­лықтай көңіл бөлініп келеді. Одан бөлек қыруар қаражат жұмсалып, құқық қорғау саласының кем-кетігі қа­лыпқа келе жатқанын айрықша атап өтуге болады. Мәселен, қазіргі таңда мамандар қағазбастылықтан толық­тай арылмаса да, цифрландыру жүйесі арқылы бірқатар мәселелер өз шешімін табуда. Сондай-ақ, учас­келік инспекторлардың жұмысын жақсарту мақсатында да көптеген істер атқарылып жатқаны баршамызға мәлім.
Жуырда Мемлекет басшысы өз Жолдауында учаскелік инспекторларға қатысты тағы бір ауқымды мәселені орынды көтерді. Ол — аймақтық инспек­торлардың мәртебесін арттыру болатын. «Барлық озық елдерде поли­ция институты сервистік модель негі­зінде дамып келеді. Біз де мұндай үлгіге көшетінімізді мәлімдедік. Бірақ жұмыс барысында аз ғана нәтижеге қол жеткізілді. «Жұртқа жақын полиция» қағидаты бойынша жергілікті полиция қызметінің мейлінше тұтас реформасын жасау қажеттігі пісіп-жетілді. Осыған орай учаскелік инспектордың рөліне баса мән берілетін болады. Учаскелік инспектордың мәртебесін заңнама арқылы арттырып, оның өнімді жұмыс істеуіне мол мүмкіндік берген жөн. Ол азаматтар алдында танымал, қолжетімді әрі беделді болуға, солардың құқық­тарын қорғауға тиіс» деп көптің көкейінде жүрген мәселені қозғады. Президент осылайша құқық қорғау саласындағы жауапты мамандарға маңызды тапсырмалар жүктеді. Менің ойымша бұл қадам сала жұмысын оңтайландыруға көп септігін тигізуі тиіс.
Сонымен қатар ел Президенті ха­лыққа жолдаған Жолдауында құқық қорғау қызметкерлерін жұртпен ашық әңгіме жүргізуге, қарапайым халықпен тығыз қарым-қатнаста болуға үйретудің маңызы зор екендігін алға тартты. Бұл бағыт бойынша кадрларды даярлау және іріктеу жүйесіне басымдық беру керектігін қадап айтты.
Біздің жұмыста бейнебақылау жү­йесі өте маңызды рөл атқарады. Сон­дықтан болар Қасым-Жомарт Кемелұлы бейнебақылау жүйесін дамыту жөнінде де сөз қозғады. Нәтижесінде алдағы уа­қытта түзеу мекемелеріне және поли­цияның қызметтік ғимараттарына жап­пай бейнебақылау орнатуды тапсырды.
Биылғы Жолдаудың бізге жүктеген міндеттері өте көп. Оларды орындау – баршамызға ортақ міндет деп білемін. Сондықтан да мен өз әріптестерімді мемлекет бас­шыларының бізге деген сенімін ақтап, нәтижелі жұмыс жасауға шақырамын.

Дәулет ТЕРЛІКБАЕВ,
Абай ауылының учаскелік инспекторы, полиция капитаны.

Поделиться ссылкой: