«Жан жылуының» жақсылығы

611 Views

«Болашаққа бағдар: рухани жаңғыру» мақаласы елдің дамуына, әл-ауқатының өсуіне ерекше әсер еткен бағдарлама болып тарихта қалатыны ақиқат. Себебі, осы бағдарлама аясында талай толайым тірлік­тер атқарылуда. Әсіресе, елі­міз­дің тұңғыш Президенті Нұрсұлтан Назарбаев ұсынған «Туған жерге туыңды тік» акция­сына үн қосып, алыстан ауылын іздеп келіп, қолдан кел­генше көмегін көрсеткен жан­дардың қатары күннен күнге толыға түсуде.
Елбасы өз мақаласында қазақ халқы «Туған жерге туың­ды тік» деп бекер айт­па­ған­дығын, сондай-ақ, патрио­тизм кіндік қаның тамған жеріңе, өскен ауылыңа де­ген сүйіспеншіліктен бастала­ты­нын ерекше атап өткен еді. Елбасы дүйім жұртқа «Туған жер» бағдарламасын қолға алу­­ды ұсына отырып, оның ерек­ше­­ліктеріне тереңірек тоқ­тал­ған болатын. Елбасы өз мақаласында:– «Ауылым – әнім» атты әнді айт­қанда, «Туған жерін сүйе алма­ған, сүйе алар ма туған елін» деп шырқайтын едік қой. Бажайлап қарасақ, бұл – мағынасы өте терең сөздер. Бағдарлама неге «Туған жер» деп аталады? Адам баласы – шексіз зерденің ғана емес, ғажайып сезімнің иесі. Ту­ған жер – әркімнің шыр етіп жерге түскен, бауырында ең­бектеп, қаз басқан қасиетті мекені, талай жанның өмір бақи тұратын өлкесі. Оны қайда жүрсе де жүрегінің түбінде әлдилеп өтпейтін жан баласы болмайды. Туған жерге, оның мәдениеті мен салт-дәстүрлеріне айрықша іңкәрлікпен атсалысу – шы­найы патриотизмнің ма­ңыз­ды көріністерінің бірі. Бұл кез келген халықты әншейін біріге салған қауым емес, шын мәніндегі ұлт ететін мәдени -ге­­­нетикалық кодының негі­зі, — деген болатын.
Жоғарыда біз мысал ре­тінде келтірген Тұңғыш Президен­тіміздің сөзін қапе­ріне қазық қып қағып алған қайырымды жандар жетерлік. Солардың қатарынан ауданы­мыздың аза­мат­тарының да көрінуі көз қуан­тады. Құрылған­дарына екі жыл ғана болса да, талай тір­­лікті аяғына жеткізген қор­дың бірі – «Жан жылуы». Осы күнге дейін Луговой ауылына мешіт соғып беріп, мұқтаж жан­дарға қол ұшын соз­ған қайырымдылық қорына Жәнібек Жүсіпов есімді азамат жетекшілік етеді. Жуырда Жәні­бек бастаған 400-ге жуық қор мүшелері төрт бірдей отбасыға баспана сыйлап, Тәуелсіздік күні қарсаңында тарту етті. Баспаналы болған жандармен аталмыш қуанышты бөлісу үшін тоғыз жолдың торабында орналасқан Луговой ауылына біз де бардық. Жасырып қай­теміз, «Жан жылуы» жасаған жақсылыққа көз тастап, еріксіз қайран қалдық! Осы жылдың мамыр айында құ­рылысы басталған төрт бірдей үй бір-біріне жапсарлас салынған. Әр отбасына үш бөлмеден бұйырған үй­де барлық жағдай жасалыпты. Тіпті, көгілдір отын мен ыстық су да ішке кіргізілген. Бөлмелердің барлығы соң­ғы үлгіде жабдықталып, әрлеу жұмыстары сапалы жүргізілген. Бір қуан­тарлығы, құрылыс жұмыста­ры­на ауыл жастарынан құралған ерік­ті­лер барынша атсалысқан. Атал­мыш мәліметтердің барлығын бізге қайырылымдық қорының жетекші­сі Жәнібек Жүсіпов баяндап берді: «Қазақта «Көп түкірсе – көл» деген тәмсіл бар ғой. Сол секілді бұл бір адамның күшімен бітетін тірлік емес. «Ыңғайы келсе, атымызды атап өтпеші» деп өтініш жасаған қайырымды жан­дар бар еді. Соған қарамастан, жақ­­сы­лық жасауға әзір жандардың есім­дерін атап өтпеске болмас. Мәселен, бізге құрылыс заттарын саудалайтын дүкендердің көмегі көп тиді. Солар­дың бірі – «Арнат» құрылыс дүкені. Сон­дай-ақ, ауыл жастарының, аудан және жергілікті әкімдіктің тигізген кө­ме­гі көп. Бұл қатарда кәсіпкерлер де бар­шылық. Бірі келіп терезесін орнатса, екіншісі есіктерін орнатып беріп жат­ты. Ал ауыл жастары ортадан қаржы жинап, үйдің шатырын жабуға көп көмек көрсетті. Әрдайым қасымызда болып, атсалысқан әрбір жанға бас­пана иесі атанған жандардан және өзімнің атымнан шексіз алғысымды білдіремін» деп аты аталған тұрғын үйлердің аймақ басшысы Бердібек Сапарбаевтың бастамасымен қолға алынған «Асарлатып үй салу» жобасы аясында салынғанын атап өтті. Соны­мен қатар, Жәнібек Жалғасұлы үй­лер­дің кілті аз қамтылған, көпба­ла­­лы, мүмкіндігі шектеулі, жетім қалған жан­дарға беріліп жатқандығын тілге тиек етті.  Тұрғын үйлердің кілтін табыстау рәсіміне аудан әкімінің орынбаса­ры Жандос Ордабаев, ауыл әкімі Мұратбек Сванов, орталық мешіттің бас има­мы Сұлтаншәріп Жадыраев, Алматы қаласынан арнайы келген орталық мешіттің наиб имамы, дін­та­нушы Ермек Көкрекбаев және эстрада жұлдыздары Ерболат Төлегенов пен Жасұлан Базарбаев қатысты. Аты аталған азаматтардың барлығы да сал­танатты жиында сөз сөйлеп, шаңырақ иелеріне үйдің символикалық кілтін табыс етіп, жүрегі жомарт Жәнібектей ұлды дүниеге әкеліп, дұрыс тәрбие бере білген әкесі Жалғас пен анасы Зиядаға шексіз алғыстарын жеткізді. Өз кезегінде келген қонақтардан өз үй­лерінің кілтін салтанатты түрде ал­ған тұрғын үй иелері де Жәнібектің ата-анасына ауыл жастарын бір шаңырақ астына ұйыстыра алатын, жоқтан барды қиыстыра алатын көшбасшы ұл тәрбиелеп өсіргендігі үшін шексіз ризашылықтарын білдірді.  Расымен де, Жәнібекпен тілдесу ба­рысында біз оның бойынан ата-ана­ға деген құрметті байқадық. Тек өзінің ғана емес, өзгелердің де ата-анасына деген құрметі шексіз. Оған мына бір сөзі айқын дәлел бола алады. «Білесіз бе, әке-шешем «Атаңның емес, адамның баласы бол» деген сөзді жиі айтып отырады. Бала кезімізден бастап осы сөзбен тәрбиелеп өсірді. Сондықтан болар, қолымнан келгенше мұқтаж жандарға көмектесуге дайын тұра­мын. Бірақ, Аллаға шүкір мен жалғыз емеспін. Қасымда дәл өзімдей ойды берік ұстанатын көптеген бауырларым бар. Жақсылық жасаудан жалықпайтын «Жан жылуы» қайырылымдық қоры мұнымен тоқтап қалмақ емес. Алдағы уақытта тағы да бірнеше отбасының қуанышына себепкер болғымыз келеді» деп алдағы жоспарларымен де бөлісті.  Иә, көп біріксе, алынбайтын қамал жоқ. Сонау ата-бабамыздан мирас болып бүгінгі күнге дейін жеткен «Асарлатып үй салу» дәстүрін қайта жаң­ғыртып, қолға алу дер кезінде іске асы­рылған баянды бастама деп біле­міз. Осынау жоба аясында биыл аймақ бойынша 117 үйдің іргетасын қалау жоспарланған. Оның біразы бүгінгі күнге дейін пайдалануға беріліп те үлгерді. Жүрекке жылу сыйлайтын дәл осындай форматтағы бастамалар көп болса нұр үстіне нұр болар еді.

Жәнібек БАЗЫЛБЕКОВ.

Поделиться ссылкой: