МАЗАСЫ КЕТКЕН МОБИЛЬДІ ТОП

511 Views

Дүниежүзілік денсаулық сақтау ұйымының дерегіне сүйенсек, еліміз індетке шалдыққандардың саны бо­йынша 221 мемлекеттің ішінде 109-шы орында тұр екен. Қазақстанда ақпан­ның 1-нен бастап жаппай вакцина егу басталады. Ал енді «COVID-19»-дың біздің ауданымыздағы ахуалы қандай? Аудандық қоғамдық кеңестің мүшелері осыған алаңдаушылық білдіріп, шұғыл кеңес отырысына жиналды.
Иә, оған да себеп бар болатын. Жа­қында аудан әкімі жанынан ін­дет­ке байланысты құрылған мо­биль­дік топты басқаратын топтың бас­шысы, аудан әкімінің орынбасары Е.Қалыбаев осы дерттен қайтыс бол­ды. Аудан «жасыл» аймақта тұр, де­генмен аудандық санитарлық-эпи­де­миялық басқарманың басшысы С.Өскенбаевтың айтуына қарағанда, бір айдың ішінде 90 адамнан ауру шыққан екен. Сонымен ке­ңес отырысына мобильді топ басшы­сы­ның орынбасары С.Тастанов та сырқат­танып, қатыса алмады.
Отырыста аудандық қоғамдық кеңестің төрағасы П.Ә.Сүлейменов осы мәселелерге бей-жай қарауға бол­майтынын айта келіп, аудан әкім­дігінің кәсіпкерлік және өнеркәсіп бөлімінің жетекші маманы Дариға Әкетаевадан мобильді топтың қазіргі таңдағы жұмысы туралы айтып беруін сұрады.
– Мобильді топта тоғыз адам бар. Топ мүшелері күн құрғатпай тойха­на мен дәмханаларды, базарлар мен дүкендерді аралап, тексеру жүргі­зіп тұрады. Жыл басынан бері 40 хат­тама толтырдық. 3 миллион 766 мың теңгенің айыппұлын салдық. Біз олар­ды бес негізгі талап бойынша қа­даға­лаймыз. Әйткенмен, облыстың бас мем­лекеттік санитарлық дәрі­гері­нің (27.10.2020 ж) №39-шы қаулысында көрсетілген көпшілік іс-шараларды және адамдар көп жиналатын жиын­дарды өткізуге тиым салу туралы нұс­қауын жұрт жүре тыңдайтын болды. Біздің мобильді топ мүшелері «Ақ бо­са­ға», «Наурыз» мейрамханаларына 319 мың теңгеден бір-бір жолы айыппұл салды. Ал Н.Чубақбаевтың «Наурыз» мейрамханасына осындай ескертумен екі мәрте бардық. Екінші жолы барғанда ол мейрамханасын өзге біреуге жалға бергенін айтып, жалтарды. Тойхана администраторы тіпті бізге дауыс көтеріп, ішке әрең кіргізді. Мобильдік топтың мүшелерін мал базарын тек­серуге шақырған едік, біразы келмеді. Полиция қызметкерлерінің өзі шақыр­ған жерге кешігіп келеді. Топтың міне­тін көлігі жоқ, жаяумыз. Қысқасы той­ха­налар тексеруші топ кеткен соң арт­қы есігін ашып, жұртты ішке кіргізіп алады, – дейді ол.
Д.Әкетаеваға кеңес мүшелері көп сұрақ қойды. Осы топтың жұмысын алға сүйрелеп жүрген адам болған соң ол барлық сұраққа мүдірмей жауап берді. Кеңес мүшелері оның шынайы берген жауаптарына ризашылығын білдірді. Осы мобильді топтың мүшесі полиция майоры, әкімшілік полициясының инспекторы Серік Сиқымбаев та өз кезегінде осынау өзекті мәселе төңірегінде орамды ой қозғап, орынды ұсыныс айтты.
– Мен Әкетаеваның айтқан уәж­дерін құптаймын. Меніңше ауданда мұндай бес мобильді топ болуы керек. Қызметкерлердің бәрінің негізгі жұ­мыс­тары бар, сондықтан оларды алмас­тыратын резервте адам болуы тиіс. Енді тексеру туралы айтсам, бұрын біз әкімшілік Кодекстің №476-шы қау­лы­сымен өзіміз-ақ, тексеріп, тәртіп бұзу­шыларға айыппұл сала беретінбіз. Қазір бізді бұл құқықтан айырды. Топ мүшесі ретінде біз тек қоғамдық тәртіпті сақ­тауды қадағалаймыз. Иә, біз топ мү­шесі ретінде жіберілген кемшіліктер мен тәртіп бұзушылықтарды жіпке тізіп, хаттама толтырып, оны тиісті органдарға жолдаймыз. Тексерудің одан арғы тағдыры аудандық санитарлық-эпидемиялық басқарманың немесе аудан прокурорының құзырында қа­лады. Сондықтан мобильді топқа про­куратура мен СЭС-тің мамандарын да енгізу керек деп ойлаймын, – деді.
Кеңеске келіп қатысып отырған аудандық санитарлық-эпидемиялық бақылау басқармасының басшысы С.Өскенбаев мырзаға сұрақ көп қо­йыл­ды. Дәлірек айтқанда, корона­ви­русқа байланысты дезинфекциялау шаралары туралы қойылған сұраққа ол: «Бұл жұмыс сараптау орталығының міндетіне кіреді (басшысы Е.Жақияев). Сараптама қорытындысы бойынша індеттің 54 ошағы тіркелген болатын, олардың барлығына дезинфекция жасалды. Қазір індеттің екін­ші толқыны келді. Адамдар індеттен өз бетінше емделіп, ауруын асқын­ды­­рып алуда. Мәселен, Каменка ауыл­дық амбула­ториясына осы күнге дейін бірде бір науқас жұқпалы ауруы бойынша ке­ліп қаралмаған. Сондықтан сақ болайық. Сақтанайық!».
Кеңес отырысында қоғамдық ке­ңес­­тің мүшелері Ж.Дидаев пен Р.Әбді­­қадыров осынау өзекті мәсе­лені тал­қылауға қозғау салып, ауру­дың ал­дын алуға байланысты шара қол­дан­бай отырған аудан басшы­ларының атына да орынды сын айтты. Кеңес мүше­лері мобильді топтың мар­дымсыз жұмысына көңілдері толмай­тынын айта келіп, топты 5 топ етіп құрып, оның құрамын жаңартуды, олар­ды көлік­пен, басқа да қажетті құ­рал-жаб­дық­тармен жабдықтау керек­тігін аудан әкімінен және аудандық про­кура­турадан сұрау үшін тиісті орын­дарға арнайы хат жолдауды ұйғарды. Осынау өзекті мәселені үнемі назарда ұстап, оның орындалуы туралы ақпарат алып отыруды және бұл туралы газет бетінде материал жариялауды ұсынды.
Осынау күн тәртібіндегі маңызды мәселе туралы кеңестің отырысын аудандық Қоғамдық кеңестің төрағасы Пазыл Әбілдаұлы Сүлейменов қоры­тындылай келіп, былай деді: «Көте­рілген мәселелердің барлығы дер ке­зінде өз шешімін табады деп ойлаймын. Сондықтан әр ауылдық округте осын­дай мобильді топтар құрып, олардың жұмысын үнемі бақылауға алып отыру қажет деп ойлаймын».

С.Қожеке.

Поделиться ссылкой: