Жарқын болашағымыздың бағдары

294 Views

Президентіміз Қасым-Жомарт Тоқаев осы мақаласында «Азаттық таңын өз көзімен көрген алдыңғы буын болмаса, қазіргі жастар өткен ғасырдың 90-ыншы жылдарындағы тарихи оқиғалардың тереңіне бойлап, мәнін түсіне бермейтінін» атап көрсетті. Сондай-ақ, Қасым-Жомарт Кемелұлы өзінің Қазақстан халқына Жолдауында «Жаңарған ұлт қана жаңғырған елдің жетістігін жаhан жұртына таныстыра алады» деп тағылымды сөзге тоқтал­ғанын баршамыз білеміз. Біз, қазіргі ардагерлер, Тәуелсіздік алған ең алғашқы күннен бастап, еліміздің жүріп өткен тар жол, тайғақ кешулі жолдары мен алған биік белестерінің куәгерлеріміз.
Иә, жаңа заманның ырғағына ілесу оңай болған жоқ. Өзіміз еңбек еткен ортада халқымызбен бірге бұрын ойымызға да келмеген қиындықтарды жеңе білдік. Сондықтан қазіргі әлемдік жаhандану жағдайында жастарымыз­дың еліміздің тарихын, мәдениетін, әдебиетін, өнерін танып, біліп өсуі үшін үгіт-насихат жұмыстарын жүргізумен ғана шектелмей, халқымыздың сан ғасырлық өмірінің негізі болған салт-дәстүрімізді, дініміз бен ділімізді, ұлттық құндылықтарымызды өс­ке­лең ұрпағымыздың бойына сіңі­ріп тәрбиелеуіміз керек. Ұрпақтар сабақтастығына байланысты сали­қалы ой-пікірімізді ел болашағы жас­тарымызға түсіндіруіміз қажет деп есептеймін.
Мемлекет басшысы осы мақаласын­да қасиетті кең байтақ жерімізді, ана­ның ақ сүтімен бойымызға дарыған қас­тер­­лі тілімізді және елімізде бейбітші­лік пен тұрақтылықты қамтамасыз етіп отыр­ған берекелі бірлігімізді егемен­ді­гі­міз­дің мәңгілік үштағаны екенді­гін атап көрсетті. Аталмыш мақалада халқымыздың осы құндылықтарын көздің қарашығындай сақтауға әр­қайсымыз міндетті екендігімізді еске салды. Бұл құндылықтарды бөле жаруға болмайды. Президентіміз бұл мақаласында біздің көпұлтты мем­лекетімізді бір бағытқа біріктіре­тін күш – мемлекеттік тіл екеніне тағы да баса назар аударғанын атап кету ке­рек. «Қазақстанның мемлекеттік тілі қазақ тілі екені Конституциямызда 90-шы жылдардағы күрделі кезеңнің өзінде нақты жазылған. Мемлекеттік тілді білу – Қазақстанның әрбір аза­матының парызы» деді. Сонымен қа­тар мемлекеттік тілді үйренуге де­ген қызығушылықты арттыру басты міндет екенін еске салды. Ол үшін біз жастарымыздың бойында қазақ тілін үйренуге деген құлшынысын бала кезден оятып, сол бағытта тың әдіс-тәсілдерді кеңінен қолдану керек деп ойлаймын. Көп тілмен қатар мемлекеттік тілді жетік меңгерген аза­маттың мерейі үстем болатынын жас­тарға түсіндіріп, соған қол жеткізуге тал­пынған жастарға жағдай жасауы­мыз керек.Тарихын, әдебиетін, мәдение­тін, өнерін дәстүр-салтын жақсы біліп, тарихтан тағылым алған жастарымыз тәуелсіздіктің оңайлықпен келмеге­нін түсінеді. Осылай болған жағдайда жастарымыз келешекте біздің ұлттық жаңғыруымыздың көшбасшылары бо­ла алады.

С.Өтегенов, аудандық  Қоғамдық  келісім
кеңесінің  төрағасы.

Поделиться ссылкой: