Алғыс айту – парызым

619 Views

Менің әділет іздегеніме міне, төрт жылға жуық уақыт болып қалды. 64 бас қойым мен екі сиырымды ұрлаған Нұрсұлтан Әлдибаевтан менің пайдама «1 миллион 850 мың теңге өндірілсін» деген сот үкімі шықса да ол: «Беретін түгім жоқ» деп мені де, құзырлы органдарды да алдап келді. Мен бас Прокуратураға дейін шағым­дан­дым. Соның нәтижесінде жә­не ауданымыздың полиция бөлі­міне жаңадан басшы болып келген Олжас Омарбековтің тікелей араласуы­мен сот үкіміне сәйкес маған тие­сілі қаражат малдай өндіріліп, ұрлан­ған малым­ның орны түгенделді. Осы үшін поли­ция подполковнигі, аудан­дық поли­ция бөлімінің басшысы Ол­жас Төлегенұлы Омарбековке, полиция капи­таны, учаскелік инспектор Жандос Нүсіповке, тергеушілер С.Бақбергенов пен А.Арыстанбековке шын ризашылығымды білдіремін.
Қазақ: «Қайтқан малда қайыр бар» демей ме? Осы іске ара­ласып, оның тезірек шешілуіне түрткі болған аудандық Қоғамдық кеңес мүшелеріне де алғысым шексіз. Айту ләзім, осы жер­де ауданымызда болып жатқан оң істерді де айтқым келіп отыр. Осы­дан біраз уақыт бұрын түн мезгілінде аудан орталығындағы алаңға түн­нің жарымында жастар жиналып алып, автокөлік­терімен жарысып апат­қа ұрынатын. Сол көліктердің соқты­ғысу оқиғалары нәтижесінде, адамдар әртүр­лі деңгейде жарақат алып ауру­ханаға түскен, тіпті адам өлімі де орын алған кездер де болды. Осы жүгенсіздік О.Омарбеков келгелі бері тоқтады. Бұл келеңсіздік туралы Қоғамдық кеңес мүшелері Б.Іңкәрбеков пен Р.Әбдіқадыров мәселе де көтерген болатын. Кеңес төрағасы Пазыл Сүлей­менов аудан орталығындағы үш мектепке баратын оқушылар көлік көп қатынайтын жолды жиі кесіп өте­тінін, кейде бағдаршамның істен шығып қалатынын, сөйтіп жолда жүру ережесіне нұқсан келетінін айт­қан бола­тын. Осыны ескерген поли­ция бөлімі­нің бастығы орталық алаңға күз­ет қойып, қоғамдық тәртіп­­ті қадағалауды қолына алды. Полиция­ның кезекші қызметкерлері арнайы көлік­­пен бағдаршамның жанын­да таң­ғы сағат 6-дан бастап қадағалайтын болды.
Мен ауданымыздың поли­ция бөлімі­не іскер де жас басшы келгеніне риза­мын. Сондықтан оған айтар алғы­сым шексіз.

Бейсембай Таңбаев,
аудандық Қоғамдық кеңес мүшесі, «Тұлпар» шаруа қожалығының жетекшісі.

Поделиться ссылкой: