Төрағалар қайта сайланды
362 Views
Бүгінде «Nur Otan» партиясының аудандық филиалына қарасты бастауыш партия ұйымдарының төрағалары жыл бойы атқарылған жұмыстарды тізбектеп, партия мүшелеріне есеп беруді бастады. Солардың қатарында «Каменка» мен «Қарақат» бастауыш партия ұйымдары да бар. Олардың бірі өз іс-шарасын Бауыржан Момышұлы атындағы орта мектептің акт залында ұйымдастырса, екіншісі – аудандық «Сұлутөр» кинотеатрында өткізді. Айта кету керек, аталмыш есепті жиындар індетті өршітпеу әрі атқарылған жұмысты кеңінен ақпараттандыру мақсатында онлайн және офлайн форматында ұйымдастырылды.
Жиындарда сөз сөйлеген қос бірдей бастауыш партия ұйымының төрағалары Мұратжан Мейманханов пен Мереке Айнақұлов ең алдымен 2019-2020 жылдары атқарылған жұмыстарымен таныстырды. Сондай-ақ, төрағалар өз баяндамаларында партияның әрбір бағытының орындалуы басты бақылауға алынғандығын және партия төрағасы Н.Ә.Назарбаевтың алға қойған міндеттерін жүзеге асыруда бастауыш партия ұйымдарының белсенділігі аса маңызды екеніне ерекше тоқталды. Сонымен қатар аталмыш жиындарда алдағы жылдыққа бюро мүшелері сайланып, аумақтық партия филиалының конференцияларына қатысатын делегаттар анықталды.
Жиын соңына қарай жарыссөзге шыққан партия мүшелері төрағалар жұмыстарына өздерінің оң бағасын берді. Ізінен оларды бастауыш партия жұмысын әрмен қарай жүргізуге, тізгінін ұстауға лайық деп танып, төрағаларды қайта сайлады.
«Құлан таңы» ақпарат.