Жаңатұрмысқа газ келді

Жағымды жаңалық

Осы сүйінші жаңалық ең алдымен отын жарып, көмір­ге көміліп, күл шығарып, қолдары күйелеш болып, суық­тан жарылып кеткен үй шаруасындағы әйел­дер­дің есіктегі басын төрге шы­ғар­­ғаны ап-анық. Егер Жаңа­тұрмыс ауылында 420 түтін болса, соның 250-і үйіне «көгілдір отын» кір­гі­зіп, көңілдері жайланып, жағалары жайлауда отырған жайлары бар. Осы газ кіргізудің машақаты айдан – айға, жылдан – жылға созылып, жыр болғанын да жасырмаймыз. Құландағы жұрт бұл отынды осыдан отыз жыл шамасы бұрын үйлеріне кіргізіп алған десек, жаңатұрмыстықтардың төзіміне таң қалмай-ақ қойсаңыз болады.
Сонымен Тартыдан тартылған газдың шекарада жатқан ауылға дейінгі арақашықтығы 28 шақырымды құрады. «Байзақ­газ­сер­вис» жауапкершілігі шектеулі серіктестігінің басшысы Талғат Әбденовтың айтуына қараған­да, экология­лық жағынан таза отынды жаңатұр­мыстық­тар жыл аяғына дейін толық алып бітпейтін сыңайлы. Өйткені кейбір үйлердің техникалық жағдайы газ кіргізуге әлі әзірленбеген көрінеді. Оның үстіне 360 мың теңге төлемақы мөлшерінен тыс әр үйге пеш қою мен қосымша газ құбырын тарту да аула иелерінің өз мойнында. Өйткені оған да әр азамат өз қалтасынан ақша төлейді.
– Мен өзім жаңағы 360 мың теңгеден бөлек газды үйіме кіргізіп бергені үшін оларға тағы да 390 мың теңге ақша төледім. Әйтеуір, «Айта-айта Алтайды, Жамал апа қартайдының» кері келмесін деп, қымбат бағаға қарамай қаражатты қиналмай төледім. Ең бастысы міне, жиырма күннен бері бойымыз жылып, ошақтың қызуын анық сезе бастадық. Соған да шүкіршілік етіп отырмыз,- дейді ауыл қариясы Көшкімбай Құрманалиев. Біз Досымбек көшесі №1-ші үйде тұратын үй шаруасындағы әйел Еңлік Үкіметованың шаңырағында болып, маздап жанған оттың қызуын сезініп, үй ішінде жеңіл киініп жүрген балаларды көріп, олардың жарқын-жарқын күлкісіне сүйсіндік.
Ауыл халқы мердігерші ұйымнан ауылға келіп, көптің көңілін тауып газ кіргізіп беріп жүрген инженер Нұрсұлтан Мұратқалиев, дәнекерлеушілер бригадасының бригадирі Айдос Шерәлиев, қатардағы жұмысшы Нұрдәулет Байдосовтарға дән риза. Жаңатұрмыс ауылдық округінің әкімі Ерсайын Талғатұлы күн суыта бастағанда ауылға «көгілдір отын» кіріп жатқанын жақсылықтың нышанына жорыды. Ол: «Бұл Тәуелсіздігіміздің, Президент күнінің жоралғысы, дәлірек айтқанда, осы айшықты күндерге лайықты мердігершілердің тартуы десе де болады» дейді. Қалай десеңіз де, байзақтық мердігершілер көрші жатқан Қазақ ауылынан 100 үйге, Каменка ауылынан 300 үйге «көгілдір отын» кіргізіп үлгеріпті. Расында бұл осы жылуды сарыла күткен ауыл халқына айтулы тарту болды.

С.Қожеке.
Суретте: Жаңатұрмыс ауылындағы Досымбек көшесі №1-ші үйдегі үй шаруасындағы Еңлік Үкіметованың қолы жеңілдеп қалды. Өйткені оның үйіне «көгілдір отын» келді.

Поделиться ссылкой: